৫০. ইদ্ধিৱিধঞাণনিদ্দেসো

১০১. কথং কাযম্পি চিত্তম্পি একৱৱত্থানতা সুখসঞ্ঞঞ্চ লহুসঞ্ঞঞ্চ অধিট্ঠানৱসেন ইজ্ঝনট্ঠে পঞ্ঞা ইদ্ধিৱিধে ঞাণং? ইধ ভিক্খু ছন্দসমাধিপধানসঙ্খাৰসমন্নাগতং ইদ্ধিপাদং ভাৱেতি, ৱীৰিযসমাধিপধানসঙ্খাৰসমন্নাগতং ইদ্ধিপাদং ভাৱেতি, চিত্তসমাধিপধানসঙ্খাৰসমন্নাগতং ইদ্ধিপাদং ভাৱেতি, ৱীমংসাসমাধিপধানসঙ্খাৰসমন্নাগতং ইদ্ধিপাদং ভাৱেতি. সো ইমেসু চতূসু ইদ্ধিপাদেসু চিত্তং পৰিভাৱেতি পৰিদমেতি, মুদুং কৰোতি কম্মনিযং. সো ইমেসু চতূসু ইদ্ধিপাদেসু চিত্তং পৰিভাৱেত্ৱা পৰিদমেত্ৱা মুদুং কৰিত্ৱা কম্মনিযং কাযম্পি চিত্তে সমোদহতি, চিত্তম্পি কাযে সমোদহতি, কাযৱসেন চিত্তং পৰিণামেতি, চিত্তৱসেন কাযং পৰিণামেতি, কাযৱসেন চিত্তং অধিট্ঠাতি, চিত্তৱসেন কাযং অধিট্ঠাতি; কাযৱসেন চিত্তং পৰিণামেত্ৱা চিত্তৱসেন কাযং পৰিণামেত্ৱা কাযৱসেন চিত্তং অধিট্ঠহিত্ৱা চিত্তৱসেন কাযং অধিট্ঠহিত্ৱা সুখসঞ্ঞঞ্চ লহুসঞ্ঞঞ্চ কাযে ওক্কমিত্ৱা ৱিহৰতি. সো তথাভাৱিতেন চিত্তেন পৰিসুদ্ধেন পৰিযোদাতেন ইদ্ধিৱিধঞাণায চিত্তং অভিনীহৰতি অভিনিন্নামেতি. সো অনেকৱিহিতং ইদ্ধিৱিধং পচ্চনুভোতি.

১০২. একোপি হুত্ৱা বহুধা হোতি, বহুধাপি হুত্ৱা একো হোতি; আৱিভাৱং তিৰোভাৱং; তিৰোকুট্টং [তিৰোকুড্ডং (স্যা.)] তিৰোপাকাৰং তিৰোপব্বতং অসজ্জমানো গচ্ছতি, সেয্যথাপি আকাসে; পথৱিযাপি উম্মুজ্জনিমুজ্জং কৰোতি, সেয্যথাপি উদকে; উদকেপি অভিজ্জমানে গচ্ছতি, সেয্যথাপি পথৱিযং; আকাসেপি পল্লঙ্কেন কমতি [চঙ্কমতি (স্যা.) দী. নি. ১.২৩৮ পস্সিতব্বা] সেয্যথাপি পক্খী সকুণো ইমেপি চন্দিমসূৰিযে এৱংমহিদ্ধিকে এৱংমহানুভাৱে পাণিনা পৰামসতি [পৰিমসতি (স্যা.)] পৰিমজ্জতি; যাৱ ব্ৰহ্মলোকাপি কাযেন ৱসং ৱত্তেতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘কাযম্পি চিত্তম্পি একৱৱত্থানতা সুখসঞ্ঞঞ্চ লহুসঞ্ঞঞ্চ অধিট্ঠানৱসেন ইজ্ঝনট্ঠে পঞ্ঞা ইদ্ধিৱিধে ঞাণং’’.

ইদ্ধিৱিধঞাণনিদ্দেসো পঞ্ঞাসমো.