৩২. আনন্তৰিকসমাধিঞাণনিদ্দেসো

৮০. কথং অৱিক্খেপপৰিসুদ্ধত্তা আসৱসমুচ্ছেদে পঞ্ঞা আনন্তৰিকসমাধিম্হি ঞাণং? নেক্খম্মৱসেন চিত্তস্স একগ্গতা অৱিক্খেপো সমাধি. তস্স সমাধিস্স ৱসেন উপ্পজ্জতি ঞাণং. তেন ঞাণেন আসৱা খীযন্তি. ইতি পঠমং সমথো, পচ্ছা ঞাণং. তেন ঞাণেন আসৱানং খযো হোতি. তেন ৱুচ্চতি – ‘‘অৱিক্খেপপৰিসুদ্ধত্তা আসৱসমুচ্ছেদে পঞ্ঞা আনন্তৰিকসমাধিম্হি ঞাণং’’.

আসৱাতি কতমে তে আসৱা? কামাসৱো, ভৱাসৱো, দিট্ঠাসৱো, অৱিজ্জাসৱো. কত্থেতে আসৱা খীযন্তি? সোতাপত্তিমগ্গেন অনৱসেসো দিট্ঠাসৱো খীযতি, অপাযগমনীযো কামাসৱো খীযতি, অপাযগমনীযো ভৱাসৱো খীযতি, অপাযগমনীযো অৱিজ্জাসৱো খীযতি. এত্থেতে আসৱা খীযন্তি. সকদাগামিমগ্গেন ওড়াৰিকো কামাসৱো খীযতি, তদেকট্ঠো ভৱাসৱো খীযতি, তদেকট্ঠো অৱিজ্জাসৱো খীযতি. এত্থেতে আসৱা খীযন্তি. অনাগামিমগ্গেন অনৱসেসো কামাসৱো খীযতি, তদেকট্ঠো ভৱাসৱো খীযতি, তদেকট্ঠো অৱিজ্জাসৱো খীযতি. এত্থেতে আসৱা খীযন্তি. অৰহত্তমগ্গেন অনৱসেসো ভৱাসৱো খীযতি, অনৱসেসো অৱিজ্জাসৱো খীযতি. এত্থেতে আসৱা খীযন্তি.

অব্যাপাদৱসেন …পে… আলোকসঞ্ঞাৱসেন… অৱিক্খেপৱসেন… ধম্মৱৱত্থানৱসেন… ঞাণৱসেন… পামোজ্জৱসেন… পঠমজ্ঝানৱসেন… দুতিযজ্ঝানৱসেন… ততিযজ্ঝানৱসেন… চতুত্থজ্ঝানৱসেন… আকাসানঞ্চাযতনসমাপত্তিৱসেন… ৱিঞ্ঞাণঞ্চাযতনসমাপত্তিৱসেন… আকিঞ্চঞ্ঞাযতনসমাপত্তিৱসেন… নেৱসঞ্ঞানাসঞ্ঞাযতনসমাপত্তিৱসেন… পথৱীকসিণৱসেন… আপোকসিণৱসেন … তেজোকসিণৱসেন… ৱাযোকসিণৱসেন… নীলকসিণৱসেন… পীতকসিণৱসেন… লোহিতকসিণৱসেন… ওদাতকসিণৱসেন… আকাসকসিণৱসেন… ৱিঞ্ঞাণকসিণৱসেন… বুদ্ধানুস্সতিৱসেন… ধম্মানুস্সতিৱসেন… সঙ্ঘানুস্সতিৱসেন… সীলানুস্সতিৱসেন… চাগানুস্সতিৱসেন… দেৱতানুস্সতিৱসেন… আনাপানস্সতিৱসেন… মৰণস্সতিৱসেন… কাযগতাসতিৱসেন… উপসমানুস্সতিৱসেন… উদ্ধুমাতকসঞ্ঞাৱসেন… ৱিনীলকসঞ্ঞাৱসেন… ৱিপুব্বকসঞ্ঞাৱসেন… ৱিচ্ছিদ্দকসঞ্ঞাৱসেন… ৱিক্খাযিতকসঞ্ঞাৱসেন… ৱিক্খিত্তকসঞ্ঞাৱসেন… হতৱিক্খিত্তকসঞ্ঞাৱসেন … লোহিতকসঞ্ঞাৱসেন… পুড়ৱকসঞ্ঞাৱসেন… অট্ঠিকসঞ্ঞাৱসেন.

৮১. দীঘং অস্সাসৱসেন…পে… দীঘং পস্সাসৱসেন… ৰস্সং অস্সাসৱসেন… ৰস্সং পস্সাসৱসেন… সব্বকাযপটিসংৱেদী অস্সাসৱসেন… সব্বকাযপটিসংৱেদী পস্সাসৱসেন… পস্সম্ভযং কাযসঙ্খাৰং অস্সাসৱসেন… পস্সম্ভযং কাযসঙ্খাৰং পস্সাসৱসেন… পীতিপটিসংৱেদী অস্সাসৱসেন… পীতিপটিসংৱেদী পস্সাসৱসেন… সুখপটিসংৱেদী অস্সাসৱসেন… সুখপটিসংৱেদী পস্সাসৱসেন… চিত্তসঙ্খাৰপটিসংৱেদী অস্সাসৱসেন… চিত্তসঙ্খাৰপটিসংৱেদী পস্সাসৱসেন… পস্সম্ভযং চিত্তসঙ্খাৰং অস্সাসৱসেন… পস্সম্ভযং চিত্তসঙ্খাৰং পস্সাসৱসেন… চিত্তপটিসংৱেদী অস্সাসৱসেন… চিত্তপটিসংৱেদী পস্সাসৱসেন… অভিপ্পমোদযং চিত্তং অস্সাসৱসেন… অভিপ্পমোদযং চিত্তং পস্সাসৱসেন… সমাদহং চিত্তং…পে… ৱিমোচযং চিত্তং… অনিচ্চানুপস্সী … ৱিৰাগানুপস্সী… নিৰোধানুপস্সী… পটিনিস্সগ্গানুপস্সী অস্সাসৱসেন… পটিনিস্সগ্গানুপস্সী পস্সাসৱসেন চিত্তস্স একগ্গতা অৱিক্খেপো সমাধি. তস্স সমাধিস্স ৱসেন উপ্পজ্জতি ঞাণং, তেন ঞাণেন আসৱা খীযন্তি. ইতি পঠমং সমথো, পচ্ছা ঞাণং. তেন ঞাণেন আসৱানং খযো হোতি. তেন ৱুচ্চতি – ‘‘অৱিক্খেপপৰিসুদ্ধত্তা আসৱসমুচ্ছেদে পঞ্ঞা আনন্তৰিকসমাধিম্হি ঞাণং’’.

আনন্তৰিকসমাধিঞাণনিদ্দেসো দ্ৱত্তিংসতিমো.