১৪. পচ্চৱেক্খণঞাণনিদ্দেসো

৬৫. কথং তদা সমুদাগতে ধম্মে পস্সনে পঞ্ঞা পচ্চৱেক্খণে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি তদা সমুদাগতা. অভিনিৰোপনট্ঠেন সম্মাসঙ্কপ্পো তদা সমুদাগতো. পৰিগ্গহট্ঠেন সম্মাৱাচা তদা সমুদাগতা. সমুট্ঠানট্ঠেন সম্মাকম্মন্তো তদা সমুদাগতো. ৱোদানট্ঠেন সম্মাআজীৱো তদা সমুদাগতো. পগ্গহট্ঠেন সম্মাৱাযামো তদা সমুদাগতো. উপট্ঠানট্ঠেন সম্মাসতি তদা সমুদাগতা. অৱিক্খেপট্ঠেন সম্মাসমাধি তদা সমুদাগতো.

উপট্ঠানট্ঠেন সতিসম্বোজ্ঝঙ্গো তদা সমুদাগতো. পৱিচযট্ঠেন ধম্মৱিচযসম্বোজ্ঝঙ্গো তদা সমুদাগতো. পগ্গহট্ঠেন ৱীৰিযসম্বোজ্ঝঙ্গো তদা সমুদাগতো. ফৰণট্ঠেন পীতিসম্বোজ্ঝঙ্গো তদা সমুদাগতো. উপসমট্ঠেন পস্সদ্ধিসম্বোজ্ঝঙ্গো তদা সমুদাগতো. অৱিক্খেপট্ঠেন সমাধিসম্বোজ্ঝঙ্গো তদা সমুদাগতো. পটিসঙ্খানট্ঠেন উপেক্খাসম্বোজ্ঝঙ্গো তদা সমুদাগতো.

অস্সদ্ধিযে অকম্পিযট্ঠেন সদ্ধাবলং তদা সমুদাগতং. কোসজ্জে অকম্পিযট্ঠেন ৱীৰিযবলং তদা সমুদাগতং. পমাদে অকম্পিযট্ঠেন সতিবলং তদা সমুদাগতং. উদ্ধচ্চে অকম্পিযট্ঠেন সমাধিবলং তদা সমুদাগতং. অৱিজ্জায অকম্পিযট্ঠেন পঞ্ঞাবলং তদা সমুদাগতং.

অধিমোক্খট্ঠেন সদ্ধিন্দ্ৰিযং তদা সমুদাগতং. পগ্গহট্ঠেন ৱীৰিযিন্দ্ৰিযং তদা সমুদাগতং. উপট্ঠানট্ঠেন সতিন্দ্ৰিযং তদা সমুদাগতং. অৱিক্খেপট্ঠেন সমাধিন্দ্ৰিযং তদা সমুদাগতং. দস্সনট্ঠেন পঞ্ঞিন্দ্ৰিযং তদা সমুদাগতং.

আধিপতেয্যট্ঠেন ইন্দ্ৰিযা তদা সমুদাগতা. অকম্পিযট্ঠেন বলা তদা সমুদাগতা. নিয্যানট্ঠেন সম্বোজ্ঝঙ্গা তদা সমুদাগতা. হেতুট্ঠেন মগ্গো তদা সমুদাগতো. উপট্ঠানট্ঠেন সতিপট্ঠানা তদা সমুদাগতা. পদহনট্ঠেন সম্মপ্পধানা তদা সমুদাগতা. ইজ্ঝনট্ঠেন ইদ্ধিপাদা তদা সমুদাগতা. তথট্ঠেন সচ্চা তদা সমুদাগতা. অৱিক্খেপট্ঠেন সমথো তদা সমুদাগতো. অনুপস্সনট্ঠেন ৱিপস্সনা তদা সমুদাগতা. একৰসট্ঠেন সমথৱিপস্সনা তদা সমুদাগতা. অনতিৱত্তনট্ঠেন যুগনদ্ধং তদা সমুদাগতং. সংৱৰট্ঠেন সীলৱিসুদ্ধি তদা সমুদাগতা. অৱিক্খেপট্ঠেন চিত্তৱিসুদ্ধি তদা সমুদাগতা. দস্সনট্ঠেন দিট্ঠিৱিসুদ্ধি তদা সমুদাগতা. ৱিমুত্তট্ঠেন ৱিমোক্খো তদা সমুদাগতো. পটিৱেধট্ঠেন ৱিজ্জা তদা সমুদাগতা. পৰিচ্চাগট্ঠেন ৱিমুত্তি তদা সমুদাগতা. সমুচ্ছেদট্ঠেন খযে ঞাণং তদা সমুদাগতং.

ছন্দো মূলট্ঠেন তদা সমুদাগতো. মনসিকাৰো সমুট্ঠানট্ঠেন তদা সমুদাগতো. ফস্সো সমোধানট্ঠেন তদা সমুদাগতো. ৱেদনা সমোসৰণট্ঠেন তদা সমুদাগতা. সমাধি পমুখট্ঠেন তদা সমুদাগতো. সতি আধিপতেয্যট্ঠেন তদা সমুদাগতা. পঞ্ঞা তদুত্তৰট্ঠেন তদা সমুদাগতা. ৱিমুত্তি সাৰট্ঠেন তদা সমুদাগতা. অমতোগধং নিব্বানং পৰিযোসানট্ঠেন তদা সমুদাগতং. ৱুট্ঠহিত্ৱা পচ্চৱেক্খতি, ইমে ধম্মা তদা সমুদাগতা.

সোতাপত্তিফলক্খণে দস্সনট্ঠেন সম্মাদিট্ঠি তদা সমুদাগতা. অভিনিৰোপনট্ঠেন সম্মাসঙ্কপ্পো তদা সমুদাগতো…পে… পটিপ্পস্সদ্ধট্ঠেন অনুপ্পাদে ঞাণং তদা সমুদাগতং. ছন্দো মূলট্ঠেন তদা সমুদাগতো. মনসিকাৰো সমুট্ঠানট্ঠেন তদা সমুদাগতো. ফস্সো সমোধানট্ঠেন তদা সমুদাগতো. ৱেদনা সমোসৰণট্ঠেন তদা সমুদাগতা. সমাধি পমুখট্ঠেন তদা সমুদাগতো. সতি আধিপতেয্যট্ঠেন তদা সমুদাগতা. পঞ্ঞা তদুত্তৰট্ঠেন তদা সমুদাগতা. ৱিমুত্তি সাৰট্ঠেন তদা সমুদাগতা. অমতোগধং নিব্বানং পৰিযোসানট্ঠেন তদা সমুদাগতং. ৱুট্ঠহিত্ৱা পচ্চৱেক্খতি, ইমে ধম্মা তদা সমুদাগতা.

সকদাগামিমগ্গক্খণে…পে… সকদাগামিফলক্খণে…পে… অনাগামিমগ্গক্খণে…পে… অনাগামিফলক্খণে…পে… অৰহত্তমগ্গক্খণে দস্সনট্ঠেন সম্মাদিট্ঠি তদা সমুদাগতা…পে… সমুচ্ছেদট্ঠেন খযে ঞাণং তদা সমুদাগতং. ছন্দো মূলট্ঠেন তদা সমুদাগতো…পে… অমতোগধং নিব্বানং পৰিযোসানট্ঠেন তদা সমুদাগতং. ৱুট্ঠহিত্ৱা পচ্চৱেক্খতি, ইমে ধম্মা তদা সমুদাগতা.

অৰহত্তফলক্খণে দস্সনট্ঠেন সম্মাদিট্ঠি তদা সমুদাগতা …পে… পটিপ্পস্সদ্ধট্ঠেন অনুপ্পাদে ঞাণং তদা সমুদাগতং. ছন্দো মূলট্ঠেন তদা সমুদাগতো …পে… অমতোগধং নিব্বানং পৰিযোসানট্ঠেন তদা সমুদাগতং. ৱুট্ঠহিত্ৱা পচ্চৱেক্খতি, ইমে ধম্মা তদা সমুদাগতা. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘তদা সমুদাগতে ধম্মে পস্সনে পঞ্ঞা পচ্চৱেক্খণে ঞাণং’’.

পচ্চৱেক্খণঞাণনিদ্দেসো চুদ্দসমো.