২. ৱস্সগণনপঞ্হো

২. ‘‘কতিৱস্সোসি ত্ৱং, ভন্তে নাগসেনা’’তি? ‘‘সত্তৱস্সোহং, মহাৰাজা’’তি. ‘‘কে তে, ভন্তে, সত্ত, ত্ৱং ৱা সত্ত, গণনা ৱা সত্তা’’তি?

তেন খো পন সমযেন মিলিন্দস্স ৰঞ্ঞো সব্বাভৰণপটিমণ্ডিতস্স অলঙ্কতপটিযত্তস্স পথৱিযং ছাযা দিস্সতি, উদকমণিকে চ ছাযা দিস্সতি. অথ খো আযস্মা নাগসেনো মিলিন্দং ৰাজানং এতদৱোচ ‘‘অযং তে, মহাৰাজ, ছাযা পথৱিযং উদকমণিকে চ দিস্সতি, কিং পন, মহাৰাজ, ত্ৱং ৱা ৰাজা, ছাযা ৱা ৰাজা’’তি? ‘‘অহং, ভন্তে নাগসেন, ৰাজা, নাযং ছাযা ৰাজা, মং পন নিস্সায ছাযা পৱত্ততী’’তি. ‘‘এৱমেৱ খো, মহাৰাজ, ৱস্সানং গণনা সত্ত, ন পনাহং সত্ত, মং পন নিস্সায সত্ত পৱত্ততি, ছাযূপমং মহাৰাজা’’তি. ‘‘অচ্ছৰিযং, ভন্তে নাগসেন, অব্ভুতং, ভন্তে নাগসেন, অতিচিত্ৰানি পঞ্হপটিভানানি ৱিসজ্জিতানী’’তি.

ৱস্সগণনপঞ্হো দুতিযো.