৪৩৮. দদ্দৰজাতকং (১২)

১০৫. যো তে পুত্তকে অখাদি, দিন্নভত্তো অদূসকে;

তস্মিং দাঠং নিপাতেহি, মা তে মুচ্চিত্থ জীৱতো.

১০৬. আকিণ্ণলুদ্দো পুৰিসো, ধাতিচেলংৱ মক্খিতো;

পদেসং তং ন পস্সামি, যত্থ দাঠং নিপাতযে.

১০৭. অকতঞ্ঞুস্স পোসস্স, নিচ্চং ৱিৱৰদস্সিনো;

সব্বং চে পথৱিং দজ্জা, নেৱ নং অভিৰাধযে.

১০৮. কিন্নু সুবাহু তৰমানৰূপো, পচ্চাগতোসি সহ মাণৱেন;

কিং কিচ্চমত্থং ইধমত্থি তুয্হং, অক্খাহি মে পুচ্ছিতো এতমত্থং.

১০৯. যো তে সখা দদ্দৰো সাধুৰূপো, তস্স ৱধং পৰিসঙ্কামি অজ্জ;

পুৰিসস্স কম্মাযতনানি সুত্ৱা, নাহং সুখিং দদ্দৰং অজ্জ মঞ্ঞে.

১১০. কানিস্স কম্মাযতনানি অস্সু, পুৰিসস্স ৱুত্তিসমোধানতায;

কং ৱা পটিঞ্ঞং পুৰিসস্স সুত্ৱা, পৰিসঙ্কসি দদ্দৰং মাণৱেন.

১১১. চিণ্ণা কলিঙ্গা চৰিতা ৱণিজ্জা, ৱেত্তাচৰো সঙ্কুপথোপি চিণ্ণো;

নটেহি চিণ্ণং সহ ৱাকুৰেহি [ৱাকৰেহি (পী. সী. নিয্য), ৱাগুৰেহি (?)], দণ্ডেন যুদ্ধম্পি সমজ্জমজ্ঝে.

১১২. বদ্ধা কুলীকা [কুলিঙ্কা (সী. পী.)] মিতমাড়্হকেন, অক্খা জিতা [অক্খাচিতা (সী. অট্ঠ.)] সংযমো অব্ভতীতো;

অব্বাহিতং [অপ্পহিতং (সী. স্যা.), অব্বূহিতং (পী. সী. নিয্য)] পুব্বকং [পুপ্ফকং (সী. স্যা.)] অড্ঢৰত্তং, হত্থা দড্ঢা পিণ্ডপটিগ্গহেন.

১১৩. তানিস্স কম্মাযতনানি অস্সু, পুৰিসস্স ৱুত্তিসমোধানতায;

যথা অযং দিস্সতি লোমপিণ্ডো, গাৱো হতা কিং পন দদ্দৰস্সাতি.

দদ্দৰজাতকং দ্ৱাদসমং.

নৱকনিপাতং নিট্ঠিতং.