৪৩৭. পূতিমংসজাতকং (১১)

৯৬. ন খো মে ৰুচ্চতি আড়ি, পূতিমংসস্স পেক্খনা;

এতাদিসা সখাৰস্মা, আৰকা পৰিৱজ্জযে.

৯৭. উম্মত্তিকা অযং ৱেণী, ৱণ্ণেতি পতিনো সখিং;

পজ্ঝাযি [পজ্ঝাতি (সী. পী.), পজ্ঝাযতি (সী. নিয্য)] পটিগচ্ছন্তিং, আগতং মেণ্ড [মেড় (সী. পী.)] মাতৰং.

৯৮. ত্ৱং খোসি সম্ম উম্মত্তো, দুম্মেধো অৱিচক্খণো;

যো ত্ৱং [সো ত্ৱং (স্যা.)] মতালযং কত্ৱা, অকালেন ৱিপেক্খসি.

৯৯. ন অকালে ৱিপেক্খেয্য, কালে পেক্খেয্য পণ্ডিতো;

পূতিমংসোৱ পজ্ঝাযি [পজ্ঝাতি (সী. পী.), পজ্ঝাযতি (সী. নিয্য)], যো অকালে ৱিপেক্খতি.

১০০. পিযং খো আড়ি মে হোতু, পুণ্ণপত্তং দদাহি মে;

পতি সঞ্জীৱিতো ময্হং, এয্যাসি পিযপুচ্ছিকা [পুচ্ছিতা (স্যা. ক.)].

১০১. পিযং খো আড়ি তে হোতু, পুণ্ণপত্তং দদামি তে;

মহতা পৰিৱাৰেন [পৰিহাৰেন (স্যা.)], এস্সং [এসং (সী. পী.)] কযিৰাহি [কযিৰাসি (পী.)] ভোজনং.

১০২. কীদিসো তুয্হং পৰিৱাৰো, যেসং কাহামি ভোজনং;

কিংনামকা চ তে সব্বে, তং [তে (সী. স্যা. পী.)] মে অক্খাহি পুচ্ছিতা.

১০৩. মালিযো চতুৰক্খো চ, পিঙ্গিযো অথ জম্বুকো;

এদিসো ময্হং পৰিৱাৰো, তেসং কযিৰাহি [কযিৰাসি (পী.)] ভোজনং.

১০৪. নিক্খন্তায অগাৰস্মা, ভণ্ডকম্পি ৱিনস্সতি;

আৰোগ্যং আড়িনো ৱজ্জং [ৱচ্ছং (?)], ইধেৱ ৱস মাগমাতি.

পূতিমংসজাতকং একাদসমং.