৪৩৬. সমুগ্গজাতকং (১০)

৮৭. কুতো নু আগচ্ছথ ভো তযো জনা, স্ৱাগতা এথ [স্ৱাগতং এত্থ (সী. পী.)] নিসীদথাসনে;

কচ্চিত্থ ভোন্তো কুসলং অনামযং, চিৰস্সমব্ভাগমনং হি ৱো ইধ.

৮৮. অহমেৱ একো ইধ মজ্জ পত্তো, ন চাপি মে দুতিযো কোচি ৱিজ্জতি;

কিমেৱ সন্ধায তে ভাসিতং ইসে, ‘‘কুতো নু আগচ্ছথ ভো তযো জনা’’.

৮৯. তুৱঞ্চ একো ভৰিযা চ তে পিযা, সমুগ্গপক্খিত্তনিকিণ্ণমন্তৰে;

সা ৰক্খিতা কুচ্ছিগতাৱ [কুচ্ছিগতা চ (ক.)] তে সদা, ৱাযুস্স [হৰিস্স (ক.)] পুত্তেন সহা তহিং ৰতা.

৯০. সংৱিগ্গৰূপো ইসিনা ৱিযাকতো [পব্যাকতো (ক.), ব্যাকতো (স্যা. পী.)], সো দানৱো তত্থ সমুগ্গমুগ্গিলি;

অদ্দক্খি ভৰিযং সুচি মালধাৰিনিং, ৱাযুস্স পুত্তেন সহা তহিং ৰতং.

৯১. সুদিট্ঠৰূপমুগ্গতপানুৱত্তিনা [সুদিট্ঠৰূপুগ্গতপানুৱত্তিনা (সী. স্যা. পী.)], হীনা নৰা যে পমদাৱসং গতা;

যথা হৱে পাণৰিৱেত্থ ৰক্খিতা, দুট্ঠা মযী অঞ্ঞমভিপ্পমোদযি.

৯২. দিৱা চ ৰত্তো চ মযা উপট্ঠিতা, তপস্সিনা জোতিৰিৱা ৱনে ৱসং;

সা ধম্মমুক্কম্ম অধম্মমাচৰি, অকিৰিযৰূপো পমদাহি সন্থৱো.

৯৩. সৰীৰমজ্ঝম্হি ঠিতাতিমঞ্ঞহং, ময্হং অযন্তি অসতিং অসঞ্ঞতং;

সা ধম্মমুক্কম্ম অধম্মমাচৰি, অকিৰিযৰূপো পমদাহি সন্থৱো.

৯৪. সুৰক্খিতং মেতি কথং নু ৱিস্সসে, অনেকচিত্তাসু ন হত্থি [অনেকচিত্তা পুন হেত্থ (ক.)] ৰক্খণা;

এতা হি পাতালপপাতসন্নিভা, এত্থপ্পমত্তো ব্যসনং নিগচ্ছতি.

৯৫. তস্মা হি তে সুখিনো ৱীতসোকা, যে মাতুগামেহি চৰন্তি নিস্সটা;

এতং সিৱং উত্তমমাভিপত্থযং, ন মাতুগামেহি কৰেয্য সন্থৱন্তি.

সমুগ্গজাতকং দসমং.