৩৮৪. ধম্মধজজাতকং (৬-১-৯)

৬৪. ধম্মং চৰথ ঞাতযো, ধম্মং চৰথ ভদ্দং ৱো [ভদ্দ ৱো (ক.)];

ধম্মচাৰী সুখং সেতি, অস্মিং লোকে পৰম্হি চ.

৬৫. ভদ্দকো ৱতযং পক্খী, দিজো পৰমধম্মিকো;

একপাদেন তিট্ঠন্তো, ধম্মমেৱানুসাসতি.

৬৬. নাস্স সীলং ৱিজানাথ, অনঞ্ঞায পসংসথ;

ভুত্ৱা অণ্ডঞ্চ পোতঞ্চ [ছাপে চ (সী. পী.)], ধম্মো ধম্মোতি ভাসতি.

৬৭. অঞ্ঞং ভণতি ৱাচায, অঞ্ঞং কাযেন কুব্বতি;

ৱাচায নো চ কাযেন, ন তং ধম্মং অধিট্ঠিতো.

৬৮. ৱাচায সখিলো মনোৱিদুগ্গো, ছন্নো কূপসযোৱ কণ্হসপ্পো;

ধম্মধজো গামনিগমাসুসাধু [গামনিগমাসু সাধুসম্মতো (সী.), গামনিগমসাধু (পী.)], দুজ্জানো পুৰিসেন বালিসেন.

৬৯. ইমং তুণ্ডেহি পক্খেহি, পাদা চিমং ৱিহেঠথ [ৱিপোথথ (পী.)];

ছৱঞ্হিমং ৱিনাসেথ, নাযং সংৱাসনাৰহোতি.

ধম্মধজজাতকং নৱমং.