৩৭৫. কপোতজাতকং (৫-৩-৫)

১৩৫. ইদানি খোম্হি সুখিতো অৰোগো, নিক্কণ্টকো নিপ্পতিতো কপোতো;

কাহামি দানী হদযস্স তুট্ঠিং, তথাহিমং মংসসাকং বলেতি.

১৩৬. কাযং বলাকা সিখিনো, চোৰী লঙ্ঘিপিতামহা;

ওৰং বলাকে আগচ্ছ, চণ্ডো মে ৱাযসো সখা.

১৩৭. অলঞ্হি তে জগ্ঘিতাযে, মমং দিস্ৱান এদিসং;

ৱিলূনং সূদপুত্তেন, পিট্ঠমণ্ডেন [পিট্ঠমদ্দেন (সী. স্যা. পী.)] মক্খিতং.

১৩৮. সুন্হাতো সুৱিলিত্তোসি, অন্নপানেন তপ্পিতো;

কণ্ঠে চ তে ৱেড়ুৰিযো, অগমা নু কজঙ্গলং.

১৩৯. মা তে মিত্তো অমিত্তো ৱা, অগমাসি কজঙ্গলং;

পিঞ্ছানি তত্থ লাযিত্ৱা, কণ্ঠে বন্ধন্তি ৱট্টনং.

১৪০. পুনপাপজ্জসী সম্ম, সীলঞ্হি তৱ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

কপোতজাতকং পঞ্চমং.

অড্ঢৱগ্গো ততিযো.

তস্সুদ্দানং –

অথ ৱণ্ণ সসীল হিৰি লভতে, সুমুখা ৱিস সাড়িযমিত্তৱৰো;

অথ চক্ক পলাস সৰাজ সতো, যৱ বাল কপোতক পন্নৰসাতি.

অথ ৱগ্গুদ্দানং –

জীনঞ্চ ৱণ্ণং অসমংৱগুপ্পৰি, সুদেসিতা জাতকন্তি সন্তি ৱীসতি [জাতক পঞ্চৱীসতি (?)];

মহেসিনো ব্ৰহ্মচৰিত্তমুত্ত-মৱোচ গাথা অত্থৱতী সুব্যঞ্জনাতি.

পঞ্চকনিপাতং নিট্ঠিতং.