৫. কুম্ভৱগ্গো

২৯১. সুৰাঘটজাতকং (২-৫-১)

১২১. সব্বকামদদং কুম্ভং, কুটং লদ্ধান ধুত্তকো;

যাৱ নং অনুপালেতি, তাৱ সো সুখমেধতি.

১২২. যদা মত্তো চ দিত্তো চ, পমাদা কুম্ভমব্ভিদা;

তদা নগ্গো চ পোত্থো চ, পচ্ছা বালো ৱিহঞ্ঞতি.

১২৩. এৱমেৱ যো ধনং লদ্ধা, পমত্তো [অমত্তা (সী.), অমত্তো (পী.)] পৰিভুঞ্জতি;

পচ্ছা তপ্পতি দুম্মেধো, কুটং ভিত্ৱাৱ [কুটং ভিন্নোৱ (সী. পী.), কুটভিন্নোৱ (?)] ধুত্তকোতি.

সুৰাঘট [ভদ্ৰঘট (সী. পী.), ভদ্ৰঘটভেদক (স্যা.)] জাতকং পঠমং.

২৯২. সুপত্তজাতকং (৩-৫-২)

১২৪. বাৰাণস্যং [বাৰাণস্সং (সী. পী.)] মহাৰাজ, কাকৰাজা নিৱাসকো [নিৱাসিকো (সী. পী.)];

অসীতিযা সহস্সেহি, সুপত্তো পৰিৱাৰিতো.

১২৫. তস্স দোহড়িনী ভৰিযা, সুফস্সা ভক্খিতুমিচ্ছতি [মচ্ছমিচ্ছতি (সী. পী.)];

ৰঞ্ঞো মহানসে পক্কং, পচ্চগ্ঘং ৰাজভোজনং.

১২৬. তেসাহং পহিতো দূতো, ৰঞ্ঞো চম্হি ইধাগতো;

ভত্তু অপচিতিং কুম্মি, নাসাযমকৰং [মকৰিং (সী. নিস্সয)] ৱণন্তি.

সুপত্তজাতকং দুতিযং.

২৯৩. কাযনিব্বিন্দজাতকং (৩-৫-৩)

১২৭. ফুট্ঠস্স মে অঞ্ঞতৰেন ব্যাধিনা, ৰোগেন বাড়্হং দুখিতস্স ৰুপ্পতো;

পৰিসুস্সতি খিপ্পমিদং কড়েৱৰং, পুপ্ফং যথা পংসুনি আতপে কতং.

১২৮. অজঞ্ঞং জঞ্ঞসঙ্খাতং, অসুচিং সুচিসম্মতং;

নানাকুণপপৰিপূৰং, জঞ্ঞৰূপং অপস্সতো.

১২৯. ধিৰত্থুমং আতুৰং পূতিকাযং, জেগুচ্ছিযং অস্সুচিং ব্যাধিধম্মং;

যত্থপ্পমত্তা অধিমুচ্ছিতা পজা, হাপেন্তি মগ্গং সুগতূপপত্তিযাতি.

কাযনিব্বিন্দ [কাযৱিচ্ছন্দ (সী.), কাযৱিচ্ছিন্দ (পী.)] জাতকং ততিযং.

২৯৪. জম্বুখাদকজাতকং (৩-৫-৪)

১৩০. কোযং বিন্দুস্সৰো ৱগ্গু, সৰৱন্তান [পৱদন্তান (সী. পী.)] মুত্তমো;

অচ্চুতো জম্বুসাখায, মোৰচ্ছাপোৱ কূজতি.

১৩১. কুলপুত্তোৱ জানাতি [কুলপুত্তো পজানাতি (স্যা. ক.)], কুলপুত্তং [কুলপুত্তে (সী. পী.)] পসংসিতুং;

ব্যগ্ঘচ্ছাপসৰীৱণ্ণ, ভুঞ্জ সম্ম দদামি তে.

১৩২. চিৰস্সং ৱত পস্সামি, মুসাৱাদী সমাগতে;

ৱন্তাদং কুণপাদঞ্চ, অঞ্ঞমঞ্ঞং পসংসকেতি.

জম্বুখাদকজাতকং চতুত্থং.

২৯৫. অন্তজাতকং (৩-৫-৫)

১৩৩. উসভস্সেৱ তে খন্ধো, সীহস্সেৱ ৱিজম্ভিতং;

মিগৰাজ নমো ত্যত্থু, অপি কিঞ্চি লভামসে.

১৩৪. কুলপুত্তোৱ জানাতি, কুলপুত্তং পসংসিতুং;

মযূৰগীৱসঙ্কাস, ইতো পৰিযাহি ৱাযস.

১৩৫. মিগানং সিঙ্গালো [কোত্থুকো (সী. পী.), কোট্ঠুকো (স্যা.)] অন্তো, পক্খীনং পন ৱাযসো;

এৰণ্ডো অন্তো ৰুক্খানং, তযো অন্তা সমাগতাতি.

অন্তজাতকং পঞ্চমং.

২৯৬. সমুদ্দজাতকং (৩-৫-৬)

১৩৬. কো নাযং [কো ন্ৱাযং (স্যা.)] লোণতোযস্মিং, সমন্তা পৰিধাৱতি;

মচ্ছে মকৰে চ ৱাৰেতি, ঊমীসু চ ৱিহঞ্ঞতি.

১৩৭. অনন্তপাযী সকুণো, অতিত্তোতি দিসাসুতো;

সমুদ্দং পাতুমিচ্ছামি, সাগৰং সৰিতং পতিং.

১৩৮. সো অযং হাযতি চেৱ, পূৰতে চ মহোদধি;

নাস্স নাযতি পীতন্তো, অপেয্যো কিৰ সাগৰোতি.

সমুদ্দজাতকং ছট্ঠং.

২৯৭. কামৱিলাপজাতকং (৩-৫-৭)

১৩৯. উচ্চে সকুণ ডেমান, পত্তযান ৱিহঙ্গম;

ৱজ্জাসি খো ত্ৱং ৱামূৰুং, চিৰং খো সা কৰিস্সতি [সৰিস্সতি (ক.)].

১৪০. ইদং খো সা ন জানাতি, অসিং সত্তিঞ্চ ওড্ডিতং;

সা চণ্ডী কাহতি কোধং, তং মে তপতি নো ইদং [নো ইধ (সী. স্যা. পী.)].

১৪১. এস উপ্পলসন্নাহো, নিক্খঞ্চুস্সীসকোহিতং [নিক্খমুস্সীসকে কতং (সী. পী.), নিক্খঞ্চুস্সীসকে কতং (স্যা.)];

কাসিকঞ্চ মুদুং ৱত্থং, তপ্পেতু ধনিকা পিযাতি [ধনকামিযাতি (স্যা. পী.), ধনকামিকাতি (সী.)].

কামৱিলাপজাতকং সত্তমং.

২৯৮. উদুম্বৰজাতকং (৩-৫-৮)

১৪২. উদুম্বৰা চিমে পক্কা, নিগ্ৰোধা চ কপিত্থনা;

এহি নিক্খম ভুঞ্জস্সু, কিং জিঘচ্ছায মিয্যসি.

১৪৩. এৱং সো সুহিতো হোতি, যো ৱুড্ঢমপচাযতি;

যথাহমজ্জ সুহিতো, দুমপক্কানি মাসিতো.

১৪৪. যং ৱনেজো ৱনেজস্স, ৱঞ্চেয্য কপিনো কপি;

দহৰো কপি [দহৰোপি তং ন (সী. পী.), দহৰোপি ন (স্যা.)] সদ্ধেয্য, ন হি জিণ্ণো জৰাকপীতি.

উদুম্বৰজাতকং অট্ঠমং.

২৯৯. কোমাৰপুত্তজাতকং (৩-৫-৯)

১৪৫. পুৰে তুৱং সীলৱতং সকাসে, ওক্কন্তিকং [ওক্কন্দিকং (সী. স্যা. পী.)] কীড়সি অস্সমম্হি;

কৰোহৰে [কৰোহি ৰে (ক.)] মক্কটিযানি মক্কট, ন তং মযং সীলৱতং ৰমাম.

১৪৬. সুতা হি ময্হং পৰমা ৱিসুদ্ধি, কোমাৰপুত্তস্স বহুস্সুতস্স;

মা দানি মং মঞ্ঞি তুৱং যথা পুৰে, ঝানানুযুত্তো ৱিহৰামি [ঝানানুযুত্তা ৱিহৰাম (সী. পী.)] আৱুসো.

১৪৭. সচেপি সেলস্মি ৱপেয্য বীজং, দেৱো চ ৱস্সে ন হি তং ৱিৰূড়্হে [নেৱ হি তং ৰুহেয্য (সী. পী.), ন হি তং ৱিৰূহে (?)];

সুতা হি তে সা পৰমা ৱিসুদ্ধি, আৰা তুৱং মক্কট ঝানভূমিযাতি.

কোমাৰপুত্তজাতকং নৱমং.

৩০০. ৱকজাতকং (৩-৫-১০)

১৪৮. পৰপাণৰোধা [পৰপাণঘাতে (স্যা.), পৰপাণৰোচং (ক.)] জীৱন্তো, মংসলোহিতভোজনো;

ৱকো ৱতং সমাদায, উপপজ্জি উপোসথং.

১৪৯. তস্স সক্কো ৱতঞ্ঞায, অজৰূপেনুপাগমি;

ৱীততপো অজ্ঝপ্পত্তো, ভঞ্জি লোহিতপো তপং.

১৫০. এৱমেৱ ইধেকচ্চে, সমাদানম্হি দুব্বলা;

লহুং কৰোন্তি অত্তানং, ৱকোৱ অজকাৰণাতি.

ৱকজাতকং দসমং.

কুম্ভৱগ্গো পঞ্চমো.

তস্সুদ্দানং –

ৱৰকুম্ভ সুপত্তসিৰিৱ্হযনো, সুচিসম্মত বিন্দুসৰো চুসভো;

সৰিতংপতি চণ্ডি জৰাকপিনা, অথ মক্কটিযা ৱককেন দসাতি.

অথ ৱগ্গুদ্দানং –

সঙ্কপ্পো পদুমো চেৱ, উদপানেন ততিযং;

অব্ভন্তৰং ঘটভেদং, তিকনিপাতম্হিলঙ্কতন্তি.

তিকনিপাতং নিট্ঠিতং.