৪. অব্ভন্তৰৱগ্গো

২৮১. অব্ভন্তৰজাতকং (৩-৪-১)

৯১. অব্ভন্তৰো নাম দুমো, যস্স দিব্যমিদং ফলং;

ভুত্ৱা দোহড়িনী নাৰী, চক্কৱত্তিং ৱিজাযতি.

৯২. ত্ৱম্পি [ত্ৱঞ্চ (সী. পী.), ত্ৱং হি (ক.)] ভদ্দে মহেসীসি, সা চাপি [চাসি (সী. পী.)] পতিনো পিযা;

আহৰিস্সতি তে ৰাজা, ইদং অব্ভন্তৰং ফলং.

৯৩. ভত্তুৰত্থে পৰক্কন্তো, যং ঠানমধিগচ্ছতি;

সূৰো অত্তপৰিচ্চাগী, লভমানো ভৱামহন্তি.

অব্ভন্তৰজাতকং পঠমং.

২৮২. সেয্যজাতকং (৩-৪-২)

৯৪. সেয্যংসো সেয্যসো হোতি, যো সেয্যমুপসেৱতি;

একেন সন্ধিং কত্ৱান, সতং ৱজ্ঝে [মচ্চে (ক.), বজ্ঝে (ক. অট্ঠ.)] অমোচযিং.

৯৫. [কস্মা…পে… সগ্গং ন গচ্ছেয্য (কত্থচি)] তস্মা সব্বেন লোকেন, সন্ধিং কত্ৱান একতো [এককো (সী. স্যা. পী.)];

পেচ্চ সগ্গং নিগচ্ছেয্য [কস্মা…পে… সগ্গং ন গচ্ছেয্য (কত্থচি)], ইদং সুণাথ কাসিযা [কাসযো (সী. পী.)].

৯৬. ইদং ৱত্ৱা মহাৰাজা, কংসো বাৰাণসিগ্গহো;

ধনুং কণ্ডঞ্চ [তূণিঞ্চ (সী. পী.)] নিক্খিপ্প, সংযমং অজ্ঝুপাগমীতি.

সেয্যজাতকং দুতিযং.

২৮৩. ৱড্ঢকীসূকৰজাতকং (৩-৪-৩)

৯৭. ৱৰং ৱৰং ত্ৱং নিহনং পুৰে চৰি, অস্মিং পদেসে অভিভুয্য সূকৰে;

সো দানি একো ব্যপগম্ম ঝাযসি, বলং নু তে ব্যগ্ঘ ন চজ্জ ৱিজ্জতি.

৯৮. ইমে সুদং [ইমস্সু তা (স্যা. ক.)] যন্তি দিসোদিসং পুৰে, ভযট্টিতা লেণগৱেসিনো পুথু;

তে দানি সঙ্গম্ম ৱসন্তি একতো, যত্থট্ঠিতা দুপ্পসহজ্জমে [দুপ্পসহজ্জিমে (স্যা.)] মযা.

৯৯. নমত্থু সঙ্ঘান সমাগতানং, দিস্ৱা সযং সখ্য ৱদামি অব্ভুতং;

ব্যগ্ঘং মিগা যত্থ জিনিংসু দাঠিনো, সামগ্গিযা দাঠবলেসু মুচ্চৰেতি.

ৱড্ঢকীসূকৰজাতকং ততিযং.

২৮৪. সিৰিজাতকং (৩-৪-৪)

১০০. যং উস্সুকা সঙ্ঘৰন্তি, অলক্খিকা বহুং ধনং;

সিপ্পৱন্তো অসিপ্পা চ, লক্খিৱা তানি ভুঞ্জতি.

১০১. সব্বত্থ কতপুঞ্ঞস্স, অতিচ্চঞ্ঞেৱ পাণিনো;

উপ্পজ্জন্তি বহূ ভোগা, অপ্পনাযতনেসুপি.

১০২. কুক্কুটো [কুক্কুট (সী. পী.), কুক্কুটা (সী. নিস্সয, সদ্দনীতি)] মণযো দণ্ডো, থিযো চ পুঞ্ঞলক্খণা;

উপ্পজ্জন্তি অপাপস্স, কতপুঞ্ঞস্স জন্তুনোতি.

সিৰিজাতকং চতুত্থং.

২৮৫. মণিসূকৰজাতকং (৩-৪-৫)

১০৩. দৰিযা সত্ত ৱস্সানি, তিংসমত্তা ৱসামসে;

হঞ্ঞাম [হঞ্ছেম (সী. পী.), হঞ্ছাম (?)] মণিনো আভং, ইতি নো মন্তনং অহু.

১০৪. যাৱতা মণিং ঘংসাম [যাৱ যাৱ নিঘংসাম (সী. পী.)], ভিয্যো ৱোদাযতে মণি;

ইদঞ্চ দানি পুচ্ছাম, কিং কিচ্চং ইধ মঞ্ঞসি.

১০৫. অযং মণি ৱেড়ূৰিযো, অকাচো ৱিমলো [ৱিপুলো (ক.)] সুভো;

নাস্স সক্কা সিৰিং হন্তুং, অপক্কমথ সূকৰাতি.

মণিসূকৰ [মণিঘংস (ক.)] জাতকং পঞ্চমং.

২৮৬. সালূকজাতকং (৩-৪-৬)

১০৬. মা সালূকস্স পিহযি, আতুৰন্নানি ভুঞ্জতি;

অপ্পোস্সুক্কো ভুসং খাদ, এতং দীঘাযুলক্খণং.

১০৭. ইদানি সো ইধাগন্ত্ৱা, অতিথী যুত্তসেৱকো;

অথ দক্খসি সালূকং, সযন্তং মুসলুত্তৰং.

১০৮. ৱিকন্তং [ৱিকত্তং (সী.), ৱিকন্তিযমানং ছিন্দিযমানংতি অত্থো] সূকৰং দিস্ৱা, সযন্তং মুসলুত্তৰং;

জৰগ্গৱা ৱিচিন্তেসুং, ৱৰম্হাকং ভুসামিৱাতি.

সালূকজাতকং ছট্ঠং.

২৮৭. লাভগৰহজাতকং (৩-৪-৭)

১০৯. নানুম্মত্তো নাপিসুণো, নানটো নাকুতূহলো;

মূড়্হেসু লভতে লাভং, এসা তে অনুসাসনী.

১১০. ধিৰত্থু তং যসলাভং, ধনলাভঞ্চ ব্ৰাহ্মণ;

যা ৱুত্তি ৱিনিপাতেন, অধম্মচৰণেন [অধম্মচৰিযায (সী. স্যা.)] ৱা.

১১১. অপি চে পত্তমাদায, অনগাৰো পৰিব্বজে;

এসাৱ জীৱিকা সেয্যো [সেয্যা (সী. স্যা. পী.)], যা চাধম্মেন এসনাতি.

লাভগৰহজাতকং সত্তমং.

২৮৮. মচ্ছুদ্দানজাতকং (৩-৪-৮)

১১২. অগ্ঘন্তি মচ্ছা অধিকং সহস্সং, ন সো অত্থি যো ইমং সদ্দহেয্য;

ময্হঞ্চ অস্সু ইধ সত্ত মাসা, অহম্পি তং মচ্ছুদ্দানং কিণেয্যং.

১১৩. মচ্ছানং ভোজনং দত্ৱা, মম দক্খিণমাদিসি;

তং দক্খিণং সৰন্তিযা, কতং অপচিতিং তযা.

১১৪. পদুট্ঠচিত্তস্স ন ফাতি হোতি, ন চাপি তং [নং (সী. স্যা.)] দেৱতা পূজযন্তি;

যো ভাতৰং পেত্তিকং সাপতেয্যং, অৱঞ্চযী দুক্কটকম্মকাৰীতি.

মচ্ছুদ্দানজাতকং অট্ঠমং.

২৮৯. নানাছন্দজাতকং (৩-৪-৯)

১১৫. নানাছন্দা মহাৰাজ, একাগাৰে ৱসামসে;

অহং গামৱৰং ইচ্ছে, ব্ৰাহ্মণী চ গৱং সতং.

১১৬. পুত্তো চ আজঞ্ঞৰথং, কঞ্ঞা চ মণিকুণ্ডলং;

যা চেসা পুণ্ণিকা জম্মী, উদুক্খলংভিকঙ্খতি.

১১৭. ব্ৰাহ্মণস্স গামৱৰং, ব্ৰাহ্মণিযা গৱং সতং;

পুত্তস্স আজঞ্ঞৰথং, কঞ্ঞায মণিকুণ্ডলং;

যঞ্চেতং পুণ্ণিকং জম্মিং, পটিপাদেথুদুক্খলন্তি.

নানাছন্দজাতকং নৱমং.

২৯০. সীলৱীমংসকজাতকং (৩-৪-১০)

১১৮. সীলং কিৰেৱ কল্যাণং, সীলং লোকে অনুত্তৰং;

পস্স ঘোৰৱিসো নাগো, সীলৱাতি ন হঞ্ঞতি.

১১৯. সোহং সীলং সমাদিস্সং, লোকে অনুমতং সিৱং;

অৰিযৱুত্তিসমাচাৰো, যেন ৱুচ্চতি সীলৱা.

১২০. ঞাতীনঞ্চ পিযো হোতি, মিত্তেসু চ ৱিৰোচতি;

কাযস্স ভেদা সুগতিং, উপপজ্জতি সীলৱাতি.

সীলৱীমংসকজাতকং দসমং.

অব্ভন্তৰৱগ্গো চতুত্থো.

তস্সুদ্দানং –

দুম কংসৱৰুত্তমব্যগ্ঘমিগা, মণযো মণি সালুকমৱ্হযনো;

অনুসাসনিযোপি চ মচ্ছৱৰো, মণিকুণ্ডলকেন কিৰেন দসাতি.