৩. উদপানৱগ্গো

২৭১. উদপানদূসকজাতকং (৩-৩-১)

৬১. আৰঞ্ঞিকস্স ইসিনো, চিৰৰত্তং তপস্সিনো;

কিচ্ছাকতং উদপানং, কথং সম্ম অৱাহসি [অৱাহযি (সী. পী.), অপাহসি (স্যা.)].

৬২. এস ধম্মো সিঙ্গালানং, যং পিত্ৱা ওহদামসে;

পিতুপিতামহং ধম্মো, ন তং [ন নং (সী. পী.)] উজ্ঝাতুমৰহসি.

৬৩. যেসং ৱো এদিসো ধম্মো, অধম্মো পন কীদিসো;

মা ৱো ধম্মং অধম্মং ৱা, অদ্দসাম কুদাচনন্তি.

উদপানদূসকজাতকং পঠমং.

২৭২. ব্যগ্ঘজাতকং (৩-৩-২)

৬৪. যেন মিত্তেন সংসগ্গা, যোগক্খেমো ৱিহিয্যতি;

পুব্বেৱজ্ঝাভৱং তস্স, ৰুক্খে অক্খীৱ পণ্ডিতো.

৬৫. যেন মিত্তেন সংসগ্গা, যোগক্খেমো পৱড্ঢতি;

কৰেয্যত্তসমং ৱুত্তিং, সব্বকিচ্চেসু পণ্ডিতো.

৬৬. এথ ব্যগ্ঘা নিৱত্তৱ্হো, পচ্চুপেথ [পচ্চমেথ (সী. পী.)] মহাৱনং;

মা ৱনং ছিন্দি নিব্যগ্ঘং, ব্যগ্ঘা মাহেসু নিব্বনাতি.

ব্যগ্ঘজাতকং দুতিযং.

২৭৩. কচ্ছপজাতকং (৩-৩-৩)

৬৭. কো নু উদ্ধিতভত্তোৱ [উদ্দিতভত্তোৱ (সী.), ৱড্ঢিতভত্তোৱ (স্যা.)], পূৰহত্থোৱ ব্ৰাহ্মণো;

কহং নু ভিক্খং অচৰি, কং সদ্ধং উপসঙ্কমি.

৬৮. অহং কপিস্মি দুম্মেধো, অনামাসানি আমসিং;

ত্ৱং মং মোচয ভদ্দন্তে, মুত্তো গচ্ছেয্য পব্বতং.

৬৯. কচ্ছপা কস্সপা হোন্তি, কোণ্ডঞ্ঞা হোন্তি মক্কটা;

মুঞ্চ কস্সপ কোণ্ডঞ্ঞং, কতং মেথুনকং তযাতি.

কচ্ছপজাতকং ততিযং.

২৭৪. লোলজাতকং (৩-৩-৪)

৭০. কাযং বলাকা সিখিনী, চোৰী লঙ্ঘিপিতামহা;

ওৰং বলাকে আগচ্ছ, চণ্ডো মে ৱাযসো সখা.

৭১. নাহং বলাকা সিখিনী, অহং লোলোস্মি ৱাযসো;

অকত্ৱা ৱচনং তুয্হং, পস্স লূনোস্মি আগতো.

৭২. পুনপাপজ্জসী সম্ম, সীলঞ্হি তৱ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

লোলজাতকং চতুত্থং.

২৭৫. ৰুচিৰজাতকং (৩-৩-৫)

৭৩. কাযং বলাকা ৰুচিৰা, কাকনীড়স্মিমচ্ছতি;

চণ্ডো কাকো সখা ময্হং, যস্স [তস্স (সী. পী.)] চেতং কুলাৱকং.

৭৪. ননু মং সম্ম জানাসি, দিজ সামাকভোজন;

অকত্ৱা ৱচনং তুয্হং, পস্স লূনোস্মি আগতো.

৭৫. পুনপাপজ্জসী সম্ম, সীলঞ্হি তৱ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

ৰুচিৰজাতকং পঞ্চমং.

২৭৬. কুৰুধম্মজাতকং (৩-৩-৬)

৭৬. তৱ সদ্ধঞ্চ সীলঞ্চ, ৱিদিত্ৱান জনাধিপ;

ৱণ্ণং অঞ্জনৱণ্ণেন, কালিঙ্গস্মিং নিমিম্হসে [ৱিনিম্হসে (স্যা.), ৱনিম্হসে (ক.)].

৭৭. অন্নভচ্চা চভচ্চা চ, যোধ উদ্দিস্স গচ্ছতি;

সব্বে তে অপ্পটিক্খিপ্পা, পুব্বাচৰিযৱচো ইদং.

৭৮. দদামি ৱো ব্ৰাহ্মণা নাগমেতং, ৰাজাৰহং ৰাজভোগ্গং যসস্সিনং;

অলঙ্কতং হেমজালাভিছন্নং, সসাৰথিং গচ্ছথ যেন কামন্তি.

কুৰুধম্মজাতকং [কুৰুধম্মজাতকং (সী. স্যা. পী.)] ছট্ঠং.

২৭৭. ৰোমকজাতকং (৩-৩-৭)

৭৯. ৱস্সানি পঞ্ঞাস সমাধিকানি, ৱসিম্হ সেলস্স গুহায ৰোমক;

অসঙ্কমানা অভিনিব্বুতত্তা [অভিনিব্বুতচিত্তা (স্যা. ক.)], হত্থত্ত [হত্থত্থ (স্যা.)] মাযন্তি মমণ্ডজা পুৰে.

৮০. তে দানি ৱক্কঙ্গ কিমত্থমুস্সুকা, ভজন্তি অঞ্ঞং গিৰিকন্দৰং দিজা;

ন নূন মঞ্ঞন্তি মমং যথা পুৰে, চিৰপ্পৱুত্থা অথ ৱা ন তে ইমে.

৮১. জানাম তং ন মযং সম্পমূড়্হা [ন ময’মস্ম মূড়্হা (সী. পী.)], সোযেৱ ত্ৱং তে মযমস্ম নাঞ্ঞে;

চিত্তঞ্চ তে অস্মিং জনে পদুট্ঠং, আজীৱিকা [আজীৱক (সী. স্যা.), আজীৱিক (পী.)] তেন তমুত্তসামাতি.

ৰোমকজাতকং সত্তমং.

২৭৮. মহিংসৰাজজাতকং (৩-৩-৮)

৮২. কিমত্থ [কমত্থ (সী. পী.)] মভিসন্ধায, লহুচিত্তস্স দুব্ভিনো [দূভিনো (সী. পী.)];

সব্বকামদদস্সেৱ [দুহস্সেৱ (সী. স্যা. পী.), ৰহস্সেৱ (ক.)], ইমং দুক্খং তিতিক্খসি.

৮৩. সিঙ্গেন নিহনাহেতং, পদসা চ অধিট্ঠহ;

ভিয্যো [ভীযো (সী.)] বালা পকুজ্ঝেয্যুং, নো চস্স পটিসেধকো.

৮৪. মমেৱাযং মঞ্ঞমানো, অঞ্ঞেপেৱং [অঞ্ঞম্পেৱং (সী. স্যা. পী.)] কৰিস্সতি;

তে নং তত্থ ৱধিস্সন্তি, সা মে মুত্তি ভৱিস্সতীতি.

মহিংসৰাজজাতকং [মহিসজাতকং (সী. স্যা. পী.)] অট্ঠমং.

২৭৯. সতপত্তজাতকং (৩-৩-৯)

৮৫. যথা মাণৱকো পন্থে, সিঙ্গালিং ৱনগোচৰিং;

অত্থকামং পৱেদেন্তিং [পৱদন্তিং (পী.)], অনত্থকামাতি মঞ্ঞতি;

অনত্থকামং সতপত্তং, অত্থকামোতি মঞ্ঞতি.

৮৬. এৱমেৱ ইধেকচ্চো, পুগ্গলো হোতি তাদিসো;

হিতেহি ৱচনং ৱুত্তো, পটিগণ্হাতি ৱামতো.

৮৭. যে চ খো নং পসংসন্তি, ভযা উক্কংসযন্তি ৱা [চ (সী. পী.)];

তঞ্হি সো মঞ্ঞতে মিত্তং, সতপত্তংৱ মাণৱোতি.

সতপত্তজাতকং নৱমং.

২৮০. পুটদূসকজাতকং (৩-৩-১০)

৮৮. অদ্ধা হি নূন মিগৰাজা, পুটকম্মস্স কোৱিদো;

তথা হি পুটং দূসেতি, অঞ্ঞং নূন কৰিস্সতি.

৮৯. ন মে মাতা ৱা পিতা ৱা, পুটকম্মস্স কোৱিদো;

কতং কতং খো দূসেম, এৱং ধম্মমিদং কুলং.

৯০. যেসং ৱো এদিসো ধম্মো, অধম্মো পন কীদিসো;

মা ৱো ধম্মং অধম্মং ৱা, অদ্দসাম কুদাচনন্তি.

পুটদূসকজাতকং দসমং.

উদপানৱগ্গো [অৰঞ্ঞৱগ্গো (সী. পী. ক.)] ততিযো.

তস্সুদ্দানং –

উদপানৱৰং ৱনব্যগ্ঘ কপি, সিখিনী চ বলাক ৰুচিৰৱৰো;

সুজনাধিপৰোমকদূস পুন, সতপত্তৱৰো পুটকম্ম দসাতি.