৪৭৯. কালিঙ্গবোধিজাতকং (৬)

৬৭. ৰাজা কালিঙ্গো চক্কৱত্তি, ধম্মেন পথৱিমনুসাসং [মনুসাসি (স্যা. ক.)];

অগমা [অগমাসি (স্যা. ক.)] বোধিসমীপং, নাগেন মহানুভাৱেন.

৬৮. কালিঙ্গো ভাৰদ্ৱাজো চ, ৰাজানং কালিঙ্গং সমণকোলঞ্ঞং;

চক্কং ৱত্তযতো পৰিগ্গহেত্ৱা [পৰিণেত্ৱা (পী.)], পঞ্জলী ইদমৱোচ.

৬৯. পচ্চোৰোহ মহাৰাজ, ভূমিভাগো যথা সমণুগ্গতো [সমনুগীতো (সী. স্যা. পী.)];

ইধ অনধিৱৰা বুদ্ধা, অভিসম্বুদ্ধা ৱিৰোচন্তি.

৭০. পদক্খিণতো আৱট্টা, তিণলতা অস্মিং ভূমিভাগস্মিং;

পথৱিযা নাভিযং [পুথুৱিযা অযং (সী.), পঠৱিযা অযং (স্যা.), পুথৱিযা’যং (পী.)] মণ্ডো, ইতি নো সুতং মন্তে মহাৰাজ [সুতং মহাৰাজ (সী. স্যা. পী.)].

৭১. সাগৰপৰিযন্তায, মেদিনিযা সব্বভূতধৰণিযা;

পথৱিযা অযং মণ্ডো, ওৰোহিত্ৱা নমো কৰোহি.

৭২. যে তে ভৱন্তি নাগা চ, অভিজাতা চ কুঞ্জৰা;

এত্তাৱতা পদেসং তে, নাগা নেৱ মুপযন্তি.

৭৩. অভিজাতো নাগো [অভিজাতো তে নাগো (সী. পী. অট্ঠ.)] কামং, পেসেহি কুঞ্জৰং দন্তিং;

এত্তাৱতা পদেসো [পদেসো চ (স্যা. ক.)], সক্কা [ন সক্কা (স্যা.)] নাগেন মুপগন্তুং.

৭৪. তং সুত্ৱা ৰাজা কালিঙ্গো, ৱেয্যঞ্জনিকৱচো নিসামেত্ৱা;

সম্পেসেসি নাগং ঞস্সাম, মযং যথিমস্সিদং [যথা ইদং (সী. স্যা. পী.)] ৱচনং.

৭৫. সম্পেসিতো চ ৰঞ্ঞা, নাগো কোঞ্চোৱ অভিনদিত্ৱান;

পটিসক্কিত্ৱা [পটিওসক্কিত্ৱা (ক.)] নিসীদি, গৰুংৱ ভাৰং অসহমানো.

৭৬. কালিঙ্গভাৰদ্ৱাজো, নাগং খীণাযুকং ৱিদিত্ৱান;

ৰাজানং কালিঙ্গং, তৰমানো অজ্ঝভাসিত্থ;

অঞ্ঞং সঙ্কম নাগং, নাগো খীণাযুকো মহাৰাজ.

৭৭. তং সুত্ৱা কালিঙ্গো, তৰমানো সঙ্কমী নাগং;

সঙ্কন্তেৱ ৰঞ্ঞে, নাগো তত্থেৱ পতি [পতিতো (ক.)] ভুম্যা;

ৱেয্যঞ্জনিকৱচো, যথা তথা অহু নাগো.

৭৮. কালিঙ্গো ৰাজা কালিঙ্গং, ব্ৰাহ্মণং এতদৱোচ;

ত্ৱমেৱ অসি সম্বুদ্ধো, সব্বঞ্ঞূ সব্বদস্সাৱী.

৭৯. তং অনধিৱাসেন্তো কালিঙ্গং [কালিঙ্গো (সী. স্যা. পী.)], ব্ৰাহ্মণো ইদমৱোচ;

ৱেয্যঞ্জনিকা হি মযং, বুদ্ধা সব্বঞ্ঞুনো মহাৰাজ.

৮০. সব্বঞ্ঞূ সব্বৱিদূ চ, বুদ্ধা ন লক্খণেন জানন্তি;

আগমবলসা [আগমপুৰিসা (পী.)] হি মযং, বুদ্ধা সব্বং পজানন্তি.

৮১. মহযিত্ৱা সম্বোধিং [মহাযিত্ৱান সম্বোধিং (সী. পী.), পহংসিত্ৱান সম্বোধিং (স্যা.), মমাযিত্ৱান তং বোধিং (ক.)], নানাতুৰিযেহি ৱজ্জমানেহি;

মালাৱিলেপনং অভিহৰিত্ৱা [মালাগন্ধৱিলেপনং আহৰিত্ৱা (সী. পী.); পাকাৰপৰিক্খেপং কাৰেসি; অথ ৰাজা পাযাসি (সী. স্যা. পী.)] অথ ৰাজা মনুপাযাসি [পাকাৰপৰিক্খেপং কাৰেসি; অথ ৰাজা পাযাসি (সী. স্যা. পী.)].

৮২. সট্ঠি ৱাহসহস্সানি, পুপ্ফানং সন্নিপাতযি;

পূজেসি ৰাজা কালিঙ্গো, বোধিমণ্ডমনুত্তৰন্তি [ৱৰুত্তমেতি (সী.)].

কালিঙ্গবোধিজাতকং ছট্ঠং.