৪৬২. সংৱৰজাতকং (৮)

৯৭. জানন্তো নো মহাৰাজ, তৱ সীলং জনাধিপো;

ইমে কুমাৰে পূজেন্তো, ন তং কেনচি মঞ্ঞথ.

৯৮. তিট্ঠন্তে নো মহাৰাজে, অদু [আদু (সী. পী.), আদূ (স্যা.)] দেৱে দিৱঙ্গতে;

ঞাতী তং সমনুঞ্ঞিংসু, সম্পস্সং অত্থমত্তনো.

৯৯. কেন সংৱৰৱত্তেন, সঞ্জাতে অভিতিট্ঠসি;

কেন তং নাতিৱত্তন্তি, ঞাতিসঙ্ঘা সমাগতা.

১০০. ন ৰাজপুত্ত উসূযামি [ৰাজপুত্ত নুস্সুয্যামি (ক.)], সমণানং মহেসিনং;

সক্কচ্চং তে নমস্সামি, পাদে ৱন্দামি তাদিনং.

১০১. তে মং ধম্মগুণে যুত্তং, সুস্সূসমনুসূযকং;

সমণা মনুসাসন্তি [সমনুসাসন্তি (সী. স্যা. পী.)], ইসী ধম্মগুণে ৰতা.

১০২. তেসাহং ৱচনং সুত্ৱা, সমণানং মহেসিনং;

ন কিঞ্চি অতিমঞ্ঞামি, ধম্মে মে নিৰতো মনো.

১০৩. হত্থাৰোহা অনীকট্ঠা, ৰথিকা পত্তিকাৰকা;

তেসং [তেসু (পী.)] নপ্পটিবন্ধামি, নিৱিট্ঠং [নিবদ্ধং (সী. পী.)] ভত্তৱেতনং.

১০৪. মহামত্তা চ মে অত্থি, মন্তিনো পৰিচাৰকা;

বাৰাণসিং ৱোহৰন্তি, বহুমংসসুৰোদকং.

১০৫. অথোপি ৱাণিজা ফীতা, নানাৰট্ঠেহি আগতা;

তেসু মে ৱিহিতা ৰক্খা, এৱং জানাহুপোসথ.

১০৬. ধম্মেন কিৰ ঞাতীনং, ৰজ্জং কাৰেহি সংৱৰ;

মেধাৱী পণ্ডিতো চাসি [চাপি (সী. পী.)], অথোপি ঞাতিনং হিতো.

১০৭. তং তং ঞাতিপৰিব্যূড়্হং, নানাৰতনমোচিতং;

অমিত্তা নপ্পসহন্তি, ইন্দংৱ অসুৰাধিপোতি.

সংৱৰজাতকং অট্ঠমং.