৪৪৪. কণ্হদীপাযনজাতকং (৬)

৬২. সত্তাহমেৱাহং পসন্নচিত্তো, পুঞ্ঞত্থিকো আচৰিং [অচৰিং (সী. স্যা. পী.)] ব্ৰহ্মচৰিযং;

অথাপৰং যং চৰিতং মমেদং [মম যিদং (স্যা.), মমাযিদং (পী.)], ৱস্সানি পঞ্ঞাস সমাধিকানি;

অকামকো ৱাপি [ৱাহি (পী. ক.)] অহং চৰামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো.

৬৩. যস্মা দানং নাভিনন্দিং কদাচি, দিস্ৱানহং অতিথিং ৱাসকালে;

ন চাপি মে অপ্পিযতং অৱেদুং, বহুস্সুতা সমণব্ৰাহ্মণা চ.

অকামকো ৱাপি অহং দদামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো.

৬৪. আসীৱিসো তাত পহূততেজো, যো তং অদংসী [অডংসী (স্যা.)] সচৰা [বিলৰা (সী.), পিড়াৰা (স্যা.), পতৰা (পী.)] উদিচ্চ;

তস্মিঞ্চ মে অপ্পিযতায অজ্জ, পিতৰি চ তে নত্থি কোচি ৱিসেসো;

এতেন সচ্চেন সুৱত্থি হোতু, হতং ৱিসং জীৱতু যঞ্ঞদত্তো.

৬৫. সন্তা দন্তাযেৱ [দন্তা সন্তা যে চ (স্যা. ক.)] পৰিব্বজন্তি, অঞ্ঞত্ৰ কণ্হা নত্থাকামৰূপা [অনকামৰূপা (সী. স্যা. পী.)];

দীপাযন কিস্স জিগুচ্ছমানো, অকামকো চৰসি ব্ৰহ্মচৰিযং.

৬৬. সদ্ধায নিক্খম্ম পুনং নিৱত্তো, সো এড়মূগোৱ বালো [এড়মূগো চপলো (স্যা. ক.)] ৱতাযং;

এতস্স ৱাদস্স জিগুচ্ছমানো, অকামকো চৰামি ব্ৰহ্মচৰিযং;

ৱিঞ্ঞুপ্পসত্থঞ্চ সতঞ্চ ঠানং [ৱিঞ্ঞূপসত্থং ৱসিতং চ ঠানং (ক.)], এৱম্পহং পুঞ্ঞকৰো ভৱামি.

৬৭. সমণে তুৱং ব্ৰাহ্মণে অদ্ধিকে চ, সন্তপ্পযাসি অন্নপানেন ভিক্খং;

ওপানভূতংৱ ঘৰং তৱ যিদং, অন্নেন পানেন উপেতৰূপং;

অথ কিস্স ৱাদস্স জিগুচ্ছমানো, অকামকো দানমিমং দদাসি.

৬৮. পিতৰো চ মে আসুং পিতামহা চ, সদ্ধা অহুং দানপতী ৱদঞ্ঞূ;

তং কুল্লৱত্তং অনুৱত্তমানো, মাহং কুলে অন্তিমগন্ধনো [গন্ধিনো (স্যা. পী. ক.), গন্ধিনী (সী.)] অহুং;

এতস্স ৱাদস্স জিগুচ্ছমানো, অকামকো দানমিমং দদামি.

৬৯. দহৰিং কুমাৰিং অসমত্থপঞ্ঞং, যং তানযিং ঞাতিকুলা সুগত্তে;

ন চাপি মে অপ্পিযতং অৱেদি, অঞ্ঞত্ৰ কামা পৰিচাৰযন্তা [পৰিচাৰযন্তী (সী. পী.)];

অথ কেন ৱণ্ণেন মযা তে ভোতি, সংৱাসধম্মো অহু এৱৰূপো.

৭০. আৰা দূৰে নযিধ কদাচি অত্থি, পৰম্পৰা নাম কুলে ইমস্মিং;

তং কুল্লৱত্তং অনুৱত্তমানা, মাহং কুলে অন্তিমগন্ধিনী অহুং;

এতস্স ৱাদস্স জিগুচ্ছমানা, অকামিকা পদ্ধচৰাম্হি [পট্ঠচৰাম্হি (স্যা. ক.)] তুয্হং.

৭১. মণ্ডব্য ভাসিং যমভাসনেয্যং [ভাসিস্সং অভাসনেয্যং (সী. স্যা. পী.), ভাসিস্স’মভাসনেয্যং (?)], তং খম্যতং পুত্তকহেতু মজ্জ;

পুত্তপেমা ন ইধ পৰত্থি কিঞ্চি, সো নো অযং জীৱতি যঞ্ঞদত্তোতি.

কণ্হদীপাযনজাতকং [মণ্ডব্যজাতকং (স্যা. ক.)] ছট্ঠং.