৮. ৱৰুণৱগ্গো

৭১. যো পুব্বে কৰণীযানি, পচ্ছা সো কাতুমিচ্ছতি;

ৱৰুণকট্ঠ [ৱৰণকট্ঠ (সী. পী.)] ভঞ্জোৱ, স পচ্ছা মনুতপ্পতীতি.

ৱৰুণজাতকং পঠমং.

৭২. অকতঞ্ঞুস্স পোসস্স, নিচ্চং ৱিৱৰদস্সিনো;

সব্বং চে পথৱিং [পঠৱিং (সী. স্যা. পী.)] দজ্জা, নেৱ নং অভিৰাধযেতি.

সীলৱহত্থিজাতকং দুতিযং.

৭৩. সচ্চং কিৰেৱমাহংসু, নৰা একচ্চিযা ইধ;

কট্ঠং নিপ্লৱিতং [ৱিপ্লাৱিতং (সী. পী.)] সেয্যো, ন ত্ৱেৱেকচ্চিযো নৰোতি.

সচ্চংকিৰজাতকং ততিযং.

৭৪. সাধূ সম্বহুলা ঞাতী, অপি ৰুক্খা অৰঞ্ঞজা;

ৱাতো ৱহতি একট্ঠং, ব্ৰহন্তম্পি ৱনপ্পতিন্তি.

ৰুক্খধম্মজাতকং চতুত্থং.

৭৫. অভিত্থনয পজ্জুন্ন, নিধিং কাকস্স নাসয;

কাকং সোকায ৰন্ধেহি, মঞ্চ সোকা পমোচযাতি.

মচ্ছজাতকং পঞ্চমং.

৭৬. অসঙ্কিযোম্হি গামম্হি, অৰঞ্ঞে নত্থি মে ভযং;

উজুং মগ্গং সমাৰূড়্হো, মেত্তায কৰুণায চাতি.

অসঙ্কিযজাতকং ছট্ঠং.

৭৭. উসভা ৰুক্খা গাৱিযো গৱা চ, অস্সো কংসো সিঙ্গালী [সিগাসী (সী. স্যা. পী.)] চ কুম্ভো;

পোক্খৰণী চ অপাকচন্দনং, লাবূনি সীদন্তি সিলা প্লৱন্তি.

মণ্ডূকিযো কণ্হসপ্পে গিলন্তি, কাকং সুপণ্ণা পৰিৱাৰযন্তি;

তসা ৱকা এড়কানং ভযাহি, ৱিপৰিযাসো [ৱিপৰিযাযো (স্যা. ক.)] ৱত্ততি নযিধ মত্থীতি.

মহাসুপিনজাতকং সত্তমং.

৭৮. উভো খঞ্জা উভো কুণী, উভো ৱিসমচক্খুকা [চক্খুলা (সী. পী.)];

উভিন্নং পিড়কা [পীড়কা (স্যা.)] জাতা, নাহং পস্সামি ইল্লিসন্তি.

ইল্লিসজাতকং অট্ঠমং.

৭৯. যতো ৱিলুত্তা চ হতা চ গাৱো, দড্ঢানি গেহানি জনো চ নীতো;

অথাগমা পুত্তহতায পুত্তো, খৰস্সৰং ডিণ্ডিমং [দেণ্ডিমং (সী. স্যা. পী.), ডিন্দিমং (ক.)] ৱাদযন্তোতি.

খৰস্সৰজাতকং নৱমং.

৮০. যং তে পৱিকত্থিতং পুৰে, অথ তে পূতিসৰা সজন্তি পচ্ছা;

উভযং ন সমেতি ভীমসেন, যুদ্ধকথা চ ইদঞ্চ তে ৱিহঞ্ঞন্তি.

ভীমসেনজাতকং দসমং.

ৱৰুণৱগ্গো [ৱৰণৱগ্গো (সী. পী.)] অট্ঠমো.

তস্সুদ্দানং –

ৱৰুণা অকতঞ্ঞূৱৰে তু সচ্চৱৰং, সৱনপ্পতিনা চ অভিত্থনয;

কৰুণায সিলাপ্লৱ ইল্লিসতো, পুন ডিণ্ডিমপূতিসৰেন দসাতি.