৯. অপাযিম্হৱগ্গো

৮১. অপাযিম্হ অনচ্চিম্হ, অগাযিম্হ ৰুদিম্হ চ;

ৱিসঞ্ঞিকৰণিং পিত্ৱা [পীত্ৱা (সী. স্যা. পী.)], দিট্ঠা নাহুম্হ ৱানৰাতি.

সুৰাপানজাতকং পঠমং.

৮২. অতিক্কম্ম ৰমণকং, সদামত্তঞ্চ দূভকং;

স্ৱাসি পাসাণমাসীনো, যস্মা জীৱং ন মোক্খসীতি.

মিত্তৱিন্দকজাতকং দুতিযং.

৮৩. মিত্তো হৱে সত্তপদেন হোতি, সহাযো পন দ্ৱাদসকেন হোতি;

মাসড্ঢমাসেন চ ঞাতি হোতি, ততুত্তৰিং অত্তসমোপি হোতি;

সোহং কথং অত্তসুখস্স হেতু, চিৰসন্থুতং [চিৰসন্ধৱং (ক.), চিৰসত্থুনং (পী.)] কাড়কণ্ণিং জহেয্যন্তি.

কালকণ্ণিজাতকং ততিযং.

৮৪. আৰোগ্যমিচ্ছে পৰমঞ্চ লাভং, সীলঞ্চ ৱুদ্ধানুমতং সুতঞ্চ;

ধম্মানুৱত্তী চ অলীনতা চ, অত্থস্স দ্ৱাৰা পমুখা ছড়েতেতি.

অত্থস্সদ্ৱাৰজাতকং চতুত্থং.

৮৫. আযতিং দোসং নাঞ্ঞায, যো কামে পটিসেৱতি;

ৱিপাকন্তে হনন্তি নং, কিংপক্কমিৱ ভক্খিতন্তি.

কিংপক্কজাতকং পঞ্চমং.

৮৬. সীলং কিৰেৱ কল্যাণং, সীলং লোকে অনুত্তৰং;

পস্স ঘোৰৱিসো নাগো, সীলৱাতি ন হঞ্ঞতীতি.

সীলৱীমংসকজাতকং ছট্ঠং.

৮৭. যস্স মঙ্গলা সমূহতাসে [সমূহতা (সী. স্যা. পী. সু. নি. ৩৬২], উপ্পাতা [উপ্পাদা (পী.)] সুপিনা চ লক্খণা চ;

সো [স (সী. পী. ক.)] মঙ্গলদোসৱীতিৱত্তো, যুগযোগাধিগতো ন জাতুমেতীতি.

মঙ্গলজাতকং সত্তমং.

৮৮. কল্যাণিমেৱ মুঞ্চেয্য, ন হি মুঞ্চেয্য পাপিকং;

মোক্খো কল্যাণিযা সাধু, মুত্ৱা তপ্পতি পাপিকন্তি.

সাৰম্ভজাতকং অট্ঠমং.

৮৯. ৱাচাৱ কিৰ তে আসি, সণ্হা সখিলভাণিনো;

তিণমত্তে অসজ্জিত্থো, নো চ নিক্খসতং হৰন্তি.

কুহকজাতকং নৱমং.

৯০. যো পুব্বে কতকল্যাণো, কতত্থো নাৱবুজ্ঝতি;

পচ্ছা কিচ্চে সমুপ্পন্নে, কত্তাৰং নাধিগচ্ছতীতি.

অকতঞ্ঞুজাতকং দসমং.

অপাযিম্হৱগ্গো নৱমো.

তস্সুদ্দানং –

অপাযিম্হ চ দূভকং সত্তপদং, ছড়দ্ৱৰ চ আযতিনা চ পুন;

অহিসীলৱ মঙ্গলি পাপিকস্সা, সতংনিক্খ কতত্থৱৰেন দসাতি.