৭. ইত্থিৱগ্গো

৬১. অসা লোকিত্থিযো নাম, ৱেলা তাসং ন ৱিজ্জতি;

সাৰত্তা চ পগব্ভা চ, সিখী সব্বঘসো যথা;

তা হিত্ৱা পব্বজিস্সামি, ৱিৱেকমনুব্ৰূহযন্তি.

অসাতমন্তজাতকং পঠমং.

৬২. যং ব্ৰাহ্মণো অৱাদেসি, ৱীণং সমুখৱেঠিতো;

অণ্ডভূতা ভতা ভৰিযা, তাসু কো জাতু ৱিস্সসেতি.

অণ্ডভূতজাতকং দুতিযং.

৬৩. কোধনা অকতঞ্ঞূ চ, পিসুণা মিত্তভেদিকা [পিসুণা চ ৱিভেদিকা (সী. স্যা. পী.)];

ব্ৰহ্মচৰিযং চৰ ভিক্খু, সো সুখং ন ৱিহাহসীতি [পিহাহিসীতি (সী. স্যা. পী.), ৱিহাযসি (ক.)].

তক্কপণ্ডিতজাতকং [তক্কজাতকং (সী. স্যা. পী. অট্ঠ.)] ততিযং.

৬৪. মা সু নন্দি ইচ্ছতি মং, মা সু সোচি ন মিচ্ছতি [ন ইচ্ছতি (সী. স্যা. পী.)];

থীনং ভাৱো দুৰাজানো, মচ্ছস্সেৱোদকে গতন্তি.

দুৰাজানজাতকং চতুত্থং.

৬৫. যথা নদী চ পন্থো চ, পানাগাৰং সভা পপা;

এৱং লোকিত্থিযো নাম, নাসং কুজ্ঝন্তি পণ্ডিতাতি.

অনভিৰতিজাতকং পঞ্চমং.

৬৬. একা ইচ্ছা পুৰে আসি, অলদ্ধা মুদুলক্খণং;

যতো লদ্ধা অড়াৰক্খী, ইচ্ছা ইচ্ছং ৱিজাযথাতি.

মুদুলক্খণজাতকং ছট্ঠং.

৬৭. উচ্ছঙ্গে দেৱ মে পুত্তো, পথে ধাৱন্তিযা পতি;

তঞ্চ দেসং ন পস্সামি, যতো সোদৰিযমানযেতি [সোদৰিযং নযে (ক.)].

উচ্ছঙ্গজাতকং সত্তমং.

৬৮. যস্মিং মনো নিৱিসতি, চিত্তঞ্চাপি [চিত্তং ৱাপি (কত্থচি)] পসীদতি;

অদিট্ঠপুব্বকে পোসে, কামং তস্মিম্পি ৱিস্সসেতি.

সাকেতজাতকং অট্ঠমং.

৬৯. ধিৰত্থু তং ৱিসং ৱন্তং, যমহং জীৱিতকাৰণা;

ৱন্তং পচ্চাৱমিস্সামি [পচ্চাহৰিস্সামি (ক.)], মতং মে জীৱিতা ৱৰন্তি.

ৱিসৱন্তজাতকং নৱমং.

৭০. ন তং জিতং সাধু জিতং, যং জিতং অৱজীযতি;

তং খো জিতং সাধু জিতং, যং জিতং নাৱজীযতীতি.

কুদ্দালজাতকং দসমং.

ইত্থিৱগ্গো সত্তমো.

তস্সুদ্দানং –

সিখীসব্বঘসোপি চ ৱীণৱৰো, পিসুণা মিত্তভেদিকা নন্দী নদী;

মুদুলক্খণ সোদৰিযা চ মনো, ৱিস সাধুজিতেন ভৱন্তি দসাতি.