৩. কুৰুঙ্গৱগ্গো

২১. ঞাতমেতং কুৰুঙ্গস্স, যং ত্ৱং সেপণ্ণি সিয্যসি [সেয্যসি (সী. স্যা. পী.)];

অঞ্ঞং সেপণ্ণি গচ্ছামি, ন মে তে ৰুচ্চতে ফলন্তি.

কুৰুঙ্গমিগজাতকং পঠমং.

২২. যে কুক্কুৰা ৰাজকুলম্হি ৱদ্ধা, কোলেয্যকা ৱণ্ণবলূপপন্না;

তেমে ন ৱজ্ঝা মযমস্ম ৱজ্ঝা, নাযং সঘচ্চা দুব্বলঘাতিকাযন্তি.

কুক্কুৰজাতকং দুতিযং.

২৩. অপি পস্সেন সেমানো, সল্লেভি সল্ললীকতো;

সেয্যোৱ ৱড়ৱা গোজো [ভোজ্জো (সী.), ভোজ্ঝো (স্যা. পী.)], যুঞ্জ মঞ্ঞেৱ সাৰথীতি.

গোজানীয [ভোজাজানীয (সী. স্যা. পী.)] জাতকং ততিযং.

২৪. যদা যদা যত্থ যদা, যত্থ যত্থ যদা যদা;

আজঞ্ঞো কুৰুতে ৱেগং, হাযন্তি তত্থ ৱাড়ৱাতি.

আজঞ্ঞজাতকং চতুত্থং.

২৫. অঞ্ঞমঞ্ঞেহি তিত্থেহি, অস্সং পাযেহি সাৰথি;

অচ্চাসনস্স পুৰিসো, পাযাসস্সপি তপ্পতীতি.

তিত্থজাতকং পঞ্চমং.

২৬. পুৰাণচোৰান ৱচো নিসম্ম, মহিড়ামুখো পোথযমন্ৱচাৰী;

সুসঞ্ঞতানঞ্হি ৱচো নিসম্ম, গজুত্তমো সব্বগুণেসু অট্ঠাতি.

মহিড়ামুখজাতকং ছট্ঠং.

২৭. নালং কবড়ং পদাতৱে, ন চ পিণ্ডং ন কুসে ন ঘংসিতুং;

মঞ্ঞামি অভিণ্হদস্সনা, নাগো স্নেহমকাসি [সিনেহমকাসি (সী. স্যা. পী.)] কুক্কুৰেতি.

অভিণ্হজাতকং সত্তমং.

২৮. মনুঞ্ঞমেৱ ভাসেয্য, নামনুঞ্ঞং কুদাচনং;

মনুঞ্ঞং ভাসমানস্স, গৰুং ভাৰং উদদ্ধৰি;

ধনঞ্চ নং অলাভেসি, তেন চত্তমনো অহূতি.

নন্দিৱিসালজাতকং অট্ঠমং.

২৯. যতো যতো গৰু ধুৰং, যতো গম্ভীৰৱত্তনী;

তদাস্সু কণ্হং যুঞ্জন্তি, স্ৱাস্সু তং ৱহতে ধুৰন্তি.

কণ্হজাতকং নৱমং.

৩০. মা মুনিকস্স পিহযি, আতুৰন্নানি ভুঞ্জতি;

অপ্পোস্সুক্কো ভুসং খাদ, এতং দীঘাযুলক্খণন্তি.

মুনিকজাতকং দসমং.

কুৰুঙ্গৱগ্গো ততিযো.

তস্সুদ্দানং –

কুৰুঙ্গস্স কুক্কুৰগোজৱৰো, পুন ৱাড়ৱস্সসিৰিৱ্হযনো [সিৰিৱযনো (সব্বত্থ)];

মহিড়ামুখনামনুঞ্ঞৱৰো, ৱহতে ধুৰ মুনিকেন দসাতি.