৪. কুলাৱকৱগ্গো

৩১. কুলাৱকা মাতলি সিম্বলিস্মিং, ঈসামুখেন পৰিৱজ্জযস্সু;

কামং চজাম অসুৰেসু পাণং, মা মে দিজা ৱিক্কুলৱা [মাযিমে দিজা ৱিকুলাৱা (সী. স্যা. পী.)] অহেসুন্তি.

কুলাৱকজাতকং পঠমং.

৩২. ৰুদং মনুঞ্ঞং ৰুচিৰা চ পিট্ঠি, ৱেড়ুৰিযৱণ্ণূপনিভা [ৱণ্ণূপটিভা (স্যা.), ৱণ্ণসন্নিভা (ক.)] চ গীৱা;

ব্যামমত্তানি চ পেখুণানি, নচ্চেন তে ধীতৰং নো দদামীতি.

নচ্চজাতকং দুতিযং.

৩৩. সম্মোদমানা গচ্ছন্তি, জালমাদায পক্খিনো;

যদা তে ৱিৱদিস্সন্তি, তদা এহিন্তি মে ৱসন্তি.

সম্মোদমানজাতকং ততিযং.

৩৪. ন মং সীতং ন মং উণ্হং, ন মং জালস্মি বাধনং;

যঞ্চ মং মঞ্ঞতে মচ্ছী, অঞ্ঞং সো ৰতিযা গতোতি.

মচ্ছজাতকং চতুত্থং.

৩৫. সন্তি পক্খা অপতনা, সন্তি পাদা অৱঞ্চনা;

মাতাপিতা চ নিক্খন্তা, জাতৱেদ পটিক্কমাতি.

ৱট্টকজাতকং পঞ্চমং.

৩৬. যং নিস্সিতা জগতিৰুহং ৱিহঙ্গমা, স্ৱাযং অগ্গিং পমুঞ্চতি;

দিসা ভজথ ৱক্কঙ্গা [ৱঙ্কঙ্গা (স্যা.)], জাতং সৰণতো ভযন্তি.

সকুণজাতকং ছট্ঠং.

৩৭. যে ৱুড্ঢ [ৱদ্ধ (সী. পী.)] মপচাযন্তি, নৰা ধম্মস্স কোৱিদা;

দিট্ঠেৱ ধম্মে পাসংসা, সম্পৰাযে চ সুগ্গতীতি.

তিত্তিৰজাতকং সত্তমং.

৩৮. নাচ্চন্তং নিকতিপ্পঞ্ঞো, নিকত্যা সুখমেধতি;

আৰাধেতি নিকতিপ্পঞ্ঞো [আৰাধে নিকতিপ্পঞ্ঞো (পী.)], বকো কক্কটকামিৱাতি.

বকজাতকং অট্ঠমং.

৩৯. মঞ্ঞে সোৱণ্ণযো ৰাসি, সোণ্ণমালা চ নন্দকো;

যত্থ দাসো আমজাতো, ঠিতো থুল্লানি [থূলানি (ক.)] গজ্জতীতি.

নন্দজাতকং নৱমং.

৪০. কামং পতামি নিৰযং, উদ্ধংপাদো অৱংসিৰো;

নানৰিযং কৰিস্সামি, হন্দ পিণ্ডং পটিগ্গহাতি.

খদিৰঙ্গাৰজাতকং দসমং.

কুলাৱকৱগ্গো চতুত্থো.

তস্সুদ্দানং –

সিৰিমাতলি ধীতৰ পক্খিৱৰো, ৰতিযাগতো মাতাপিতা চ পুন;

জগতীৰুহ ৱুড্ঢ সুকক্কটকো, তথা নন্দকপিণ্ডৱৰেন দসাতি.