২. সীলৱগ্গো

১১. হোতি সীলৱতং অত্থো, পটিসন্থাৰ [পটিসন্ধাৰ (ক.)] ৱুত্তিনং;

লক্খণং পস্স আযন্তং, ঞাতিসঙ্ঘপুৰক্খতং [পুৰক্খিতং (স্যা.), পুৰেক্খিতং (ক.)];

অথ পস্সসিমং কাড়ং, সুৱিহীনংৱ ঞাতিভীতি.

লক্খণমিগজাতকং পঠমং.

১২. নিগ্ৰোধমেৱ সেৱেয্য, ন সাখমুপসংৱসে;

নিগ্ৰোধস্মিং মতং সেয্যো, যঞ্চে সাখস্মি [সাখস্মিং (সী. পী.)] জীৱিতন্তি.

নিগ্ৰোধমিগজাতকং দুতিযং.

১৩. ধিৰত্থু কণ্ডিনং সল্লং, পুৰিসং গাড়্হৱেধিনং;

ধিৰত্থু তং জনপদং, যত্থিত্থী পৰিণাযিকা;

তে চাপি ধিক্কিতা [ধিক্কতা (?)] সত্তা, যে ইত্থীনং ৱসংগতাতি.

কণ্ডিজাতকং ততিযং.

১৪. ন কিৰত্থি ৰসেহি পাপিযো, আৱাসেহি ৱ [ৱা (সব্বত্থ)] সন্থৱেহি ৱা;

ৱাতমিগং গহননিস্সিতং [গেহনিস্সিতং (সী. পী.)], ৱসমানেসি ৰসেহি সঞ্জযোতি.

ৱাতমিগজাতকং চতুত্থং.

১৫. অট্ঠক্খুৰং খৰাদিযে, মিগং ৱঙ্কাতিৱঙ্কিনং;

সত্তহি কালাতিক্কন্তং [সত্তহি কলাহ’তিক্কন্তং (সী.), সত্তকালেহ’তিক্কন্তং (স্যা.), সত্তহি কালাহ’তিক্কন্তং (পী.)], ন নং ওৱদিতুস্সহেতি.

খৰাদিযজাতকং পঞ্চমং.

১৬. মিগং তিপল্লত্থ [তিপল্লত্ত (ক.)] মনেকমাযং, অট্ঠক্খুৰং অড্ঢৰত্তাপপাযিং [অড্ঢৰত্তাৱপাযিং (সী. পী.)];

একেন সোতেন ছমাস্সসন্তো, ছহি কলাহিতিভোতি [কলাহতিভোতি (সী. স্যা. পী.)] ভাগিনেয্যোতি.

তিপল্লত্থমিগজাতকং ছট্ঠং.

১৭. কাড়ে ৱা যদি ৱা জুণ্হে, যদা ৱাযতি মালুতো;

ৱাতজানি হি সীতানি, উভোত্থমপৰাজিতাতি.

মালুতজাতকং সত্তমং.

১৮. এৱং চে সত্তা জানেয্যুং, দুক্খাযং জাতিসম্ভৱো;

ন পাণো পাণিনং হঞ্ঞে, পাণঘাতী হি সোচতীতি.

মতকভত্তজাতকং অট্ঠমং.

১৯. সচে মুচ্চে [মুঞ্চে (সী. স্যা. পী.)] পেচ্চ মুচ্চে [মুঞ্চে (সী. স্যা. পী.)], মুচ্চমানো হি বজ্ঝতি;

ন হেৱং ধীৰা মুচ্চন্তি, মুত্তি বালস্স বন্ধনন্তি.

আযাচিতভত্তজাতকং নৱমং.

২০. দিস্ৱা পদমনুত্তিণ্ণং, দিস্ৱানোতৰিতং পদং;

নড়েন ৱাৰিং পিস্সাম [পিৱিস্সাম (সী. স্যা. পী.)], নেৱ [ন চ (ক.)] মং ত্ৱং ৱধিস্সসীতি.

নড়পানজাতকং দসমং.

সীলৱগ্গো দুতিযো.

তস্সুদ্দানং –

অথ লক্খণ সাখ ধিৰত্থু পুন, ন কিৰত্থি ৰসেহি খৰাদিযা;

অতিভোতি ৱৰ [ৰস (সব্বত্থ)] মালুত পাণ, মুচ্চেন নড়অৱ্হযনেন ভৱন্তি দসাতি.