১১. পৰোসতৱগ্গো

১০১. পৰোসতং চেপি সমাগতানং, ঝাযেয্যুং তে ৱস্সসতং অপঞ্ঞা;

একোৱ সেয্যো পুৰিসো সপঞ্ঞো, যো ভাসিতস্স ৱিজানাতি অত্থন্তি.

পৰোসতজাতকং পঠমং.

১০২. যো দুক্খফুট্ঠায ভৱেয্য তাণং, সো মে পিতা দুব্ভি [দূভি (সী. পী.)] ৱনে কৰোতি;

সা কস্স কন্দামি ৱনস্স মজ্ঝে, যো তাযিতা সো সহসং [সহসা (সী. স্যা. পী.)] কৰোতীতি.

পণ্ণিকজাতকং দুতিযং.

১০৩. যত্থ ৱেৰী নিৱিসতি [নিৱসতি (সী. ক.)], ন ৱসে তত্থ পণ্ডিতো;

একৰত্তং দিৰত্তং ৱা, দুক্খং ৱসতি ৱেৰিসূতি.

ৱেৰিজাতকং ততিযং.

১০৪. চতুব্ভি অট্ঠজ্ঝগমা, অট্ঠাহিপি চ সোড়স;

সোড়সাহি চ বাত্তিংস [বত্তিংস (সী. স্যা. পী.)], অত্ৰিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকেতি.

মিত্তৱিন্দকজাতকং চতুত্থং.

১০৫. বহুম্পেতং ৱনে কট্ঠং, ৱাতো ভঞ্জতি দুব্বলং;

তস্স চে ভাযসী নাগ, কিসো নূন ভৱিস্সসীতি.

দুব্বলকট্ঠজাতকং পঞ্চমং.

১০৬. সুখং ৱত মং জীৱন্তং [সুখকং ৱত জীৱং (ক.)], পচমানা উদঞ্চনী;

চোৰী জাযপ্পৱাদেন, তেলং লোণঞ্চ যাচতীতি.

উদঞ্চনীজাতকং ছট্ঠং.

১০৭. সাধু খো সিপ্পকং নাম, অপি যাদিস কীদিসং;

পস্স খঞ্জপ্পহাৰেন, লদ্ধা গামা চতুদ্দিসাতি.

সালিত্তকজাতকং সত্তমং.

১০৮. সিক্খেয্য সিক্খিতব্বানি, সন্তি তচ্ছন্দিনো [সচ্ছন্দিনো (সী. পী.)] জনা;

বাহিযা হি [পি (সী. স্যা. পী.)] সুহন্নেন, ৰাজানমভিৰাধযীতি.

বাহিযজাতকং অট্ঠমং.

১০৯. যথন্নো পুৰিসো হোতি, তথন্না তস্স দেৱতা;

আহৰেতং কুণ্ডপূৱং [কণং পূৱং (সী. পী.)], মা মে ভাগং ৱিনাসযাতি.

কুণ্ডপূৱজাতকং নৱমং.

১১০. সব্বসংহাৰকো [সব্বসাহাৰকো (ক.)] নত্থি, সুদ্ধং কঙ্গু পৱাযতি;

অলিকং ভাযতিযং ধুত্তী, সচ্চমাহ মহল্লিকাতি.

সব্বসংহাৰকপঞ্হজাতকং দসমং.

পৰোসতৱগ্গো একাদসমো.

তস্সুদ্দানং –

সপৰোসত তাযিত ৱেৰী পুন, ভমচক্কথ নাগসিৰিৱ্হযনো;

সুখকঞ্চ ৱত সিপ্পক বাহিযা, কুণ্ডপূৱ মহল্লিককা চ দসাতি.