১২. হংচিৱগ্গো

১১১. গদ্ৰভপঞ্হজাতকং

১১১. হংচি [হংসি (সী. স্যা.), হঞ্চি (?)] তুৱং এৱমঞ্ঞসি সেয্যো, পুত্তেন পিতাতি ৰাজসেট্ঠ;

হন্দস্সতৰস্স তে অযং, অস্সতৰস্স হি গদ্ৰভো পিতাতি.

গদ্ৰভপঞ্হজাতকং পঠমং.

১১২. অমৰাদেৱীপঞ্হজাতকং

১১২. যেন সত্তুবিলঙ্গা চ, দিগুণপলাসো চ পুপ্ফিতো;

যেন দদামি [যেনা’দামি (সী. স্যা.)] তেন ৱদামি, যেন ন দদামি [যেন না’দামি (সী. স্যা.)] ন তেন ৱদামি;

এস মগ্গো যৱমজ্ঝকস্স, এতং ছন্নপথং ৱিজানাহীতি.

অমৰাদেৱীপঞ্হজাতকং দুতিযং.

১১৩. সিঙ্গালজাতকং

১১৩. সদ্দহাসি সিঙ্গালস্স [সিগালস্স (সী. স্যা. পী.)], সুৰাপীতস্স ব্ৰাহ্মণ;

সিপ্পিকানং সতং নত্থি, কুতো কংসসতা দুৱেতি.

সিঙ্গালজাতকং ততিযং.

১১৪. মিতচিন্তিজাতকং

১১৪. বহুচিন্তী অপ্পচিন্তী, উভো জালে অবজ্ঝৰে;

মিতচিন্তী পমোচেসী, উভো তত্থ সমাগতাতি.

মিতচিন্তিজাতকং চতুত্থং.

১১৫. অনুসাসিকজাতকং

১১৫. যাযঞ্ঞ [যাযঞ্ঞে (ক.)] মনুসাসতি, সযং লোলুপ্পচাৰিনী;

সাযং ৱিপক্খিকা সেতি, হতা চক্কেন সাসিকাতি [সালিকাতি (সী. স্যা. পী.)].

অনুসাসিকজাতকং পঞ্চমং.

১১৬. দুব্বচজাতকং

১১৬. অতিকৰমকৰাচৰিয, ময্হম্পেতং ন ৰুচ্চতি;

চতুত্থে লঙ্ঘযিত্ৱান, পঞ্চমাযসি আৱুতোতি.

দুব্বচজাতকং ছট্ঠং.

১১৭. তিত্তিৰজাতকং

১১৭. অচ্চুগ্গতাতিলপতা [অতিবলতা (সী. স্যা. পী.), অতিলপকা (কত্থচি)], অতিৱেলং পভাসিতা;

ৱাচা হনতি দুম্মেধং, তিত্তিৰংৱাতিৱস্সিতন্তি.

তিত্তিৰজাতকং সত্তমং.

১১৮. ৱট্টকজাতকং

১১৮. নাচিন্তযন্তো পুৰিসো, ৱিসেসমধিগচ্ছতি;

চিন্তিতস্স ফলং পস্স, মুত্তোস্মি ৱধবন্ধনাতি.

ৱট্টকজাতকং অট্ঠমং.

১১৯. অকালৰাৱিজাতকং

১১৯. অমাতাপিতৰসংৱদ্ধো [পিতৰি (সী. পী.), পিতু (স্যা.)], অনাচেৰকুলে ৱসং;

নাযং কালং অকালং ৱা, অভিজানাতি কুক্কুটোতি.

অকালৰাৱিজাতকং নৱমং.

১২০. বন্ধনমোক্খজাতকং

১২০. অবদ্ধা তত্থ বজ্ঝন্তি, যত্থ বালা পভাসৰে;

বদ্ধাপি তত্থ মুচ্চন্তি, যত্থ ধীৰা পভাসৰেতি.

বন্ধনমোক্খজাতকং দসমং.

হংচিৱগ্গো [হংসিৱগ্গো (সী. স্যা.)] দ্ৱাদসমো.

তস্সুদ্দানং –

অথ গদ্ৰভ সত্তুৱ কংসসতং, বহুচিন্তি সাসিকাযাতিকৰ;

অতিৱেল ৱিসেসমনাচৰিযোৱ, ধীৰাপভাসৰতেন দসাতি.