১. অপণ্ণকৱগ্গো

১. অপণ্ণকজাতকং

১. অপণ্ণকং ঠানমেকে, দুতিযং আহু তক্কিকা;

এতদঞ্ঞায মেধাৱী, তং গণ্হে যদপণ্ণকন্তি [তং গণ্হেয্য অপণ্ণকং (ক.)].

অপণ্ণকজাতকং পঠমং.

২. ৱণ্ণুপথজাতকং

২. অকিলাসুনো ৱণ্ণুপথে [ৱণ্ণপথে (ক.)] খণন্তা, উদঙ্গণে তত্থ পপং অৱিন্দুং;

এৱং মুনী ৱীৰিয [মুনি ৱিৰিয (পী.), মুনি ৱীৰিয (স্যা. ক.)] বলূপপন্নো, অকিলাসু ৱিন্দে হদযস্স সন্তিন্তি.

ৱণ্ণুপথজাতকং দুতিযং.

৩. সেৰিৱৱাণিজজাতকং

৩. ইধ চে নং [ইধ চে হি নং (সী. পী.)] ৱিৰাধেসি, সদ্ধম্মস্স নিযামতং [নিযামকং (স্যা. ক.)];

চিৰং ত্ৱং অনুতপ্পেসি [অনুতপেস্সসি (সী. পী.), অনুতপ্পিস্সসি (?)], সেৰিৱাযংৱ ৱাণিজোতি.

সেৰিৱৱাণিজজাতকং ততিযং.

৪. চূড়সেট্ঠিজাতকং

৪. অপ্পকেনপি মেধাৱী, পাভতেন ৱিচক্খণো;

সমুট্ঠাপেতি অত্তানং, অণুং অগ্গিংৱ সন্ধমন্তি.

চূড় [চুল্ল (সী.), চুল্লক (স্যা. পী.)] সেট্ঠিজাতকং চতুত্থং.

৫. তণ্ডুলনাড়িজাতকং

৫. [কিমগ্ঘতী তণ্ডুলনাড়িকা চ, বাৰাণসী অন্তৰবাহিৰানি; অস্সপঞ্চসতে তানি, একা তণ্ডুলনাড়িকাতি; (স্যা.)] কিমগ্ঘতি তণ্ডুলনাড়িকায, অস্সান মূলায ৱদেহি ৰাজ [নাড়িকা চ (সী.), নাড়িকায (ক. সী. অট্ঠ.)];

বাৰাণসিং সন্তৰবাহিৰতো [বাহিৰন্তং (সী.)], অযমগ্ঘতি তণ্ডুলনাড়িকাতি [কিমগ্ঘতী ৱণ্ডুলনাড়িকা চ, বাৰাণসী অন্তৰবাহিৰানি; অস্সপঞ্চসতে তানি, একা তণ্ডুলনাড়িকাতি; (স্যা.)].

তণ্ডুলনাড়িজাতকং পঞ্চমং.

৬. দেৱধম্মজাতকং

৬. হিৰিওত্তপ্পসম্পন্না, সুক্কধম্মসমাহিতা;

সন্তো সপ্পুৰিসা লোকে, দেৱধম্মাতি ৱুচ্চৰেতি.

দেৱধম্মজাতকং ছট্ঠং.

৭. কট্ঠহাৰিজাতকং

৭. পুত্তো ত্যাহং মহাৰাজ, ত্ৱং মং পোস জনাধিপ;

অঞ্ঞেপি দেৱো পোসেতি, কিঞ্চ [কিঞ্চি (ক.)] দেৱো সকং পজন্তি.

কট্ঠহাৰি [কট্ঠৱাহন (ক.)] জাতকং সত্তমং.

৮. গামণিজাতকং

৮. অপি অতৰমানানং, ফলাসাৱ সমিজ্ঝতি;

ৱিপক্কব্ৰহ্মচৰিযোস্মি, এৱং জানাহি গামণীতি.

গামণিজাতকং অট্ঠমং.

৯. মঘদেৱজাতকং

৯. উত্তমঙ্গৰুহা ময্হং, ইমে জাতা ৱযোহৰা;

পাতুভূতা দেৱদূতা, পব্বজ্জাসমযো মমাতি.

মঘদেৱ [মখাদেৱ (সী. পী.), দেৱদূত (ক.)] জাতকং নৱমং.

১০. সুখৱিহাৰিজাতকং

১০. যঞ্চ অঞ্ঞে ন ৰক্খন্তি, যো চ অঞ্ঞে ন ৰক্খতি;

স ৱে ৰাজ সুখং সেতি, কামেসু অনপেক্খৱাতি.

সুখৱিহাৰিজাতকং দসমং.

অপণ্ণকৱগ্গো পঠমো.

তস্সুদ্দানং –

ৱৰাপণ্ণক ৱণ্ণুপথ সেৰিৱৰো, সুৱিচক্খণ তণ্ডুলনাড়িকস্সা;

হিৰি পুত্তৱৰুত্তগামণিনা, যো চ ন ৰক্খতি তেন দসাতি.