১৫. সুখৱগ্গো

১৯৭. সুসুখং ৱত জীৱাম, ৱেৰিনেসু অৱেৰিনো;

ৱেৰিনেসু মনুস্সেসু, ৱিহৰাম অৱেৰিনো.

১৯৮. সুসুখং ৱত জীৱাম, আতুৰেসু অনাতুৰা;

আতুৰেসু মনুস্সেসু, ৱিহৰাম অনাতুৰা.

১৯৯. সুসুখং ৱত জীৱাম, উস্সুকেসু অনুস্সুকা;

উস্সুকেসু মনস্সেসু, ৱিহৰাম অনুস্সুকা.

২০০. সুসুখং ৱত জীৱাম, যেসং নো নত্থি কিঞ্চনং;

পীতিভক্খা ভৱিস্সাম, দেৱা আভস্সৰা যথা.

২০১. জযং ৱেৰং পসৱতি, দুক্খং সেতি পৰাজিতো;

উপসন্তো সুখং সেতি, হিত্ৱা জযপৰাজযং.

২০২. নত্থি ৰাগসমো অগ্গি, নত্থি দোসসমো কলি;

নত্থি খন্ধসমা [খন্ধাদিসা (সী. স্যা. পী. ৰূপসিদ্ধিযা সমেতি)] দুক্খা, নত্থি সন্তিপৰং সুখং.

২০৩. জিঘচ্ছাপৰমা ৰোগা, সঙ্খাৰপৰমা [সঙ্কাৰা পৰমা (বহূসু)] দুখা;

এতং ঞত্ৱা যথাভূতং, নিব্বানং পৰমং সুখং.

২০৪. আৰোগ্যপৰমা লাভা, সন্তুট্ঠিপৰমং ধনং;

ৱিস্সাসপৰমা ঞাতি [ৱিস্সাসপৰমো ঞাতি (ক. সী.), ৱিস্সাসপৰমা ঞাতী (সী. অট্ঠ.), ৱিস্সাসা পৰমা ঞাতি (ক.)], নিব্বানং পৰমং [নিব্বাণপৰমং (ক. সী.)] সুখং.

২০৫. পৱিৱেকৰসং পিত্ৱা [পীত্ৱা (সী. স্যা. কং. পী.)], ৰসং উপসমস্স চ;

নিদ্দৰো হোতি নিপ্পাপো, ধম্মপীতিৰসং পিৱং.

২০৬. সাহু দস্সনমৰিযানং, সন্নিৱাসো সদা সুখো;

অদস্সনেন বালানং, নিচ্চমেৱ সুখী সিযা.

২০৭. বালসঙ্গতচাৰী [বালসঙ্গতিচাৰী (ক.)] হি, দীঘমদ্ধান সোচতি;

দুক্খো বালেহি সংৱাসো, অমিত্তেনেৱ সব্বদা;

ধীৰো চ সুখসংৱাসো, ঞাতীনংৱ সমাগমো.

২০৮. তস্মা হি –

ধীৰঞ্চ পঞ্ঞঞ্চ বহুস্সুতঞ্চ, ধোৰয্হসীলং ৱতৱন্তমৰিযং;

তং তাদিসং সপ্পুৰিসং সুমেধং, ভজেথ নক্খত্তপথংৱ চন্দিমা [তস্মা হি ধীৰং পঞ্ঞঞ্চ, বহুস্সুতঞ্চ ধোৰয্হং; সীলং ধুতৱতমৰিযং, তং তাদিসং সপ্পুৰিসং; সুমেধং ভজেথ নক্খত্তপথংৱ চন্দিমা; (ক.)].

সুখৱগ্গো পন্নৰসমো নিট্ঠিতো.