২. সঙ্খচৰিযা

১১. ‘‘পুনাপৰং যদা হোমি, ব্ৰাহ্মণো সঙ্খসৱ্হযো;

মহাসমুদ্দং তৰিতুকামো, উপগচ্ছামি পট্টনং.

১২. ‘‘তত্থদ্দসং পটিপথে, সযম্ভুং অপৰাজিতং;

কন্তাৰদ্ধানং পটিপন্নং [কন্তাৰদ্ধানপটিপন্নং (সী. স্যা.)], তত্তায কঠিনভূমিযা.

১৩. ‘‘তমহং পটিপথে দিস্ৱা, ইমমত্থং ৱিচিন্তযিং;

‘ইদং খেত্তং অনুপ্পত্তং, পুঞ্ঞকামস্স জন্তুনো.

১৪. ‘‘‘যথা কস্সকো পুৰিসো, খেত্তং দিস্ৱা মহাগমং;

তত্থ বীজং ন ৰোপেতি, ন সো ধঞ্ঞেন অত্থিকো.

১৫. ‘‘‘এৱমেৱাহং পুঞ্ঞকামো, দিস্ৱা খেত্তৱৰুত্তমং;

যদি তত্থ কাৰং ন কৰোমি, নাহং পুঞ্ঞেন অত্থিকো.

১৬. ‘‘‘যথা অমচ্চো মুদ্দিকামো, ৰঞ্ঞো অন্তেপুৰে জনে;

ন দেতি তেসং ধনধঞ্ঞং, মুদ্দিতো পৰিহাযতি.

১৭. ‘‘‘এৱমেৱাহং পুঞ্ঞকামো, ৱিপুলং দিস্ৱান দক্খিণং;

যদি তস্স দানং ন দদামি, পৰিহাযিস্সামি পুঞ্ঞতো’.

১৮. ‘‘এৱাহং চিন্তযিত্ৱান, ওৰোহিত্ৱা উপাহনা;

তস্স পাদানি ৱন্দিত্ৱা, অদাসিং ছত্তুপাহনং.

১৯. ‘‘তেনেৱাহং সতগুণতো, সুখুমালো সুখেধিতো;

অপি চ দানং পৰিপূৰেন্তো, এৱং তস্স অদাসহ’’ন্তি.

সঙ্খচৰিযং দুতিযং.