৯. অনোমদস্সীবুদ্ধৱংসো

১. সোভিতস্স অপৰেন, সম্বুদ্ধো দ্ৱিপদুত্তমো;

অনোমদস্সী অমিতযসো, তেজস্সী দুৰতিক্কমো.

২. সো ছেত্ৱা বন্ধনং সব্বং, ৱিদ্ধংসেত্ৱা তযো ভৱে;

অনিৱত্তিগমনং মগ্গং, দেসেসি দেৱমানুসে.

৩. সাগৰোৱ অসঙ্খোভো, পব্বতোৱ দুৰাসদো;

আকাসোৱ অনন্তো সো, সালৰাজাৱ ফুল্লিতো.

৪. দস্সনেনপি তং বুদ্ধং, তোসিতা হোন্তি পাণিনো;

ব্যাহৰন্তং গিৰং সুত্ৱা, অমতং পাপুণন্তি তে.

৫. ধম্মাভিসমযো তস্স, ইদ্ধো ফীতো তদা অহু;

কোটিসতানি অভিসমিংসু, পঠমে ধম্মদেসনে.

৬. ততো পৰং অভিসমযে, ৱস্সন্তে ধম্মৱুট্ঠিযো;

অসীতিকোটিযোভিসমিংসু, দুতিযে ধম্মদেসনে.

৭. ততোপৰঞ্হি ৱস্সন্তে, তপ্পযন্তে চ পাণিনং;

অট্ঠসত্ততিকোটীনং, ততিযাভিসমযো অহু.

৮. সন্নিপাতা তযো আসুং, তস্সাপি চ মহেসিনো;

অভিঞ্ঞাবলপ্পত্তানং, পুপ্ফিতানং ৱিমুত্তিযা.

৯. অট্ঠসতসহস্সানং, সন্নিপাতো তদা অহু;

পহীনমদমোহানং, সন্তচিত্তান তাদিনং.

১০. সত্তসতসহস্সানং, দুতিযো আসি সমাগমো;

অনঙ্গণানং ৱিৰজানং, উপসন্তান তাদিনং.

১১. ছন্নং সতসহস্সানং, ততিযো আসি সমাগমো;

অভিঞ্ঞাবলপ্পত্তানং, নিব্বুতানং তপস্সিনং.

১২. অহং তেন সমযেন, যক্খো আসিং মহিদ্ধিকো;

নেকানং যক্খকোটীনং, ৱসৱত্তিম্হি ইস্সৰো.

১৩. তদাপি তং বুদ্ধৱৰং, উপগন্ত্ৱা মহেসিনং;

অন্নপানেন তপ্পেসিং, সসঙ্ঘং লোকনাযকং.

১৪. সোপি মং তদা ব্যাকাসি, ৱিসুদ্ধনযনো মুনি;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৫. ‘‘পধানং পদহিত্ৱান…পে… হেস্সাম সম্মুখা ইমং’’.

১৬. তস্সাপি ৱচনং সুত্ৱা, হট্ঠো সংৱিগ্গমানসো;

উত্তৰিং ৱতমধিট্ঠাসিং, দসপাৰমিপূৰিযা.

১৭. নগৰং চন্দৱতী নাম, যসৱা নাম খত্তিযো;

মাতা যসোধৰা নাম, অনোমদস্সিস্স সত্থুনো.

১৮. দসৱস্সসহস্সানি, অগাৰং অজ্ঝ সো ৱসি;

সিৰী উপসিৰী ৱড্ঢো, তযো পাসাদমুত্তমা.

১৯. তেৱীসতিসহস্সানি, নাৰিযো সমলঙ্কতা;

সিৰিমা নাম সা নাৰী, উপৱাণো নাম অত্ৰজো.

২০. নিমিত্তে চতুৰো দিস্ৱা, সিৱিকাযাভিনিক্খমি;

অনূনদসমাসানি, পধানং পদহী জিনো.

২১. ব্ৰহ্মুনা যাচিতো সন্তো, অনোমদস্সী মহামুনি;

ৱত্তি চক্কং মহাৱীৰো, উয্যানে সো সুদস্সনে [সুদস্সনুয্যানমুত্তমে (স্যা. কং.)].

২২. নিসভো চ অনোমো চ [অসোকো চ (সী.)], অহেসুং অগ্গসাৱকা;

ৱৰুণো নামুপট্ঠাকো, অনোমদস্সিস্স সত্থুনো.

২৩. সুন্দৰী চ সুমনা চ, অহেসুং অগ্গসাৱিকা;

বোধি তস্স ভগৱতো, অজ্জুনোতি পৱুচ্চতি.

২৪. নন্দিৱড্ঢো সিৰিৱড্ঢো, অহেসুং অগ্গুপট্ঠকা;

উপ্পলা চেৱ পদুমা চ, অহেসুং অগ্গুপট্ঠিকা.

২৫. অট্ঠপণ্ণাসৰতনং, অচ্চুগ্গতো মহামুনি;

পভা নিদ্ধাৱতী তস্স, সতৰংসীৱ উগ্গতো.

২৬. ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৭. সুপুপ্ফিতং পাৱচনং, অৰহন্তেহি তাদিহি;

ৱীতৰাগেহি ৱিমলেহি, সোভিত্থ জিনসাসনং.

২৮. সো চ সত্থা অমিতযসো, যুগানি তানি অতুলিযানি;

সব্বং তমন্তৰহিতং, ননু ৰিত্তা সব্বসঙ্খাৰা.

২৯. অনোমদস্সী জিনো সত্থা, ধম্মাৰামম্হি নিব্বুতো;

তত্থেৱস্স জিনথূপো, উব্বেধো পঞ্চৱীসতীতি.

অনোমদস্সিস্স ভগৱতো ৱংসো সত্তমো.