১০. পদুমবুদ্ধৱংসো

১. অনোমদস্সিস্স অপৰেন, সম্বুদ্ধো দ্ৱিপদুত্তমো;

পদুমো নাম নামেন, অসমো অপ্পটিপুগ্গলো.

২. তস্সাপি অসমং সীলং, সমাধিপি অনন্তকো;

অসঙ্খেয্যং ঞাণৱৰং, ৱিমুত্তিপি অনূপমা.

৩. তস্সাপি অতুলতেজস্স, ধম্মচক্কপ্পৱত্তনে;

অভিসমযা তযো আসুং, মহাতমপৱাহনা.

৪. পঠমাভিসমযে বুদ্ধো, কোটিসতমবোধযি;

দুতিযাভিসমযে ধীৰো, নৱুতিকোটিমবোধযি.

৫. যদা চ পদুমো বুদ্ধো, ওৱদী সকমত্ৰজং;

তদা অসীতিকোটীনং, ততিযাভিসমযো অহু.

৬. সন্নিপাতা তযো আসুং, পদুমস্স মহেসিনো;

কোটিসতসহস্সানং, পঠমো আসি সমাগমো.

৭. কথিনত্থাৰসমযে, উপ্পন্নে কথিনচীৱৰে;

ধম্মসেনাপতিত্থায, ভিক্খূ সিব্বিংসু [যাচিংসু (ক.)] চীৱৰং.

৮. তদা তে ৱিমলা ভিক্খূ, ছড়ভিঞ্ঞা মহিদ্ধিকা;

তীণি সতসহস্সানি, সমিংসু অপৰাজিতা.

৯. পুনাপৰং সো নৰাসভো [নৰৱুসভো (স্যা. কং.)], পৱনে ৱাসং উপাগমি;

তদা সমাগমো আসি, দ্ৱিন্নং সতসহস্সিনং.

১০. অহং তেন সমযেন, সীহো আসিং মিগাধিভূ;

ৱিৱেকমনুব্ৰূহন্তং, পৱনে অদ্দসং জিনং.

১১. ৱন্দিত্ৱা সিৰসা পাদে, কত্ৱান তং পদক্খিণং;

তিক্খত্তুং অভিনাদিত্ৱা, সত্তাহং জিনমুপট্ঠহং.

১২. সত্তাহং ৱৰসমাপত্তিযা, ৱুট্ঠহিত্ৱা তথাগতো;

মনসা চিন্তযিত্ৱান, কোটিভিক্খূ সমানযি.

১৩. তদাপি সো মহাৱীৰো, তেসং মজ্ঝে ৱিযাকৰি;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৪. ‘‘পধানং পদহিত্ৱান…পে… হেস্সাম সম্মুখা ইমং’’.

১৫. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৬. চম্পকং নাম নগৰং, অসমো নাম খত্তিযো;

অসমা নাম জনিকা, পদুমস্স মহেসিনো.

১৭. দসৱস্সসহস্সানি, অগাৰং অজ্ঝ সো ৱসি;

নন্দাৱসুযসুত্তৰা, তযো পাসাদমুত্তমা.

১৮. তেত্তিংস চ সহস্সানি, নাৰিযো সমলঙ্কতা;

উত্তৰা নাম সা নাৰী, ৰম্মো নামাসি অত্ৰজো.

১৯. নিমিত্তে চতুৰো দিস্ৱা, ৰথযানেন নিক্খমি;

অনূনঅট্ঠমাসানি, পধানং পদহী জিনো.

২০. ব্ৰহ্মুনা যাচিতো সন্তো, পদুমো লোকনাযকো;

ৱত্তি চক্কং মহাৱীৰো, ধনঞ্চুয্যানমুত্তমে.

২১. সালো চ উপসালো চ, অহেসুং অগ্গসাৱকা;

ৱৰুণো নামুপট্ঠাকো, পদুমস্স মহেসিনো.

২২. ৰাধা চেৱ সুৰাধা চ, অহেসুং অগ্গসাৱিকা;

বোধি তস্স ভগৱতো, মহাসোণোতি ৱুচ্চতি.

২৩. ভিয্যো চেৱ অসমো চ, অহেসুং অগ্গুপট্ঠকা;

ৰুচী চ নন্দৰামা চ, অহেসুং অগ্গুপট্ঠিকা.

২৪. অট্ঠপণ্ণাসৰতনং, অচ্চুগ্গতো মহামুনি;

পভা নিদ্ধাৱতী তস্স, অসমা সব্বসো দিসা.

২৫. চন্দপ্পভা সূৰিযপ্পভা, ৰতনগ্গিমণিপ্পভা;

সব্বাপি তা হতা হোন্তি, পত্ৱা জিনপভুত্তমং.

২৬. ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৭. পৰিপক্কমানসে সত্তে, বোধযিত্ৱা অসেসতো;

সেসকে অনুসাসিত্ৱা, নিব্বুতো সো সসাৱকো.

২৮. উৰগোৱ তচং জিণ্ণং, ৱদ্ধপত্তংৱ পাদপো;

জহিত্ৱা সব্বসঙ্খাৰে, নিব্বুতো সো যথা সিখী.

২৯. পদুমো জিনৱৰো সত্থা, ধম্মাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

পদুমস্স ভগৱতো ৱংসো অট্ঠমো.