১১. নাৰদবুদ্ধৱংসো

১. পদুমস্স অপৰেন, সম্বুদ্ধো দ্ৱিপদুত্তমো;

নাৰদো নাম নামেন, অসমো অপ্পটিপুগ্গলো.

২. সো বুদ্ধো চক্কৱত্তিস্স, জেট্ঠো দযিতওৰসো;

আমুক্কমালাভৰণো, উয্যানং উপসঙ্কমি.

৩. তত্থাসি ৰুক্খো যসৱিপুলো, অভিৰূপো ব্ৰহা সুচি;

তমজ্ঝপত্ৱা উপনিসীদি, মহাসোণস্স হেট্ঠতো.

৪. তত্থ ঞাণৱৰুপ্পজ্জি, অনন্তং ৱজিৰূপমং;

তেন ৱিচিনি সঙ্খাৰে, উক্কুজ্জমৱকুজ্জকং [কুজ্জতং (স্যা. কং.)].

৫. তত্থ সব্বকিলেসানি, অসেসমভিৱাহযি;

পাপুণী কেৱলং বোধিং, বুদ্ধঞাণে চ চুদ্দস.

৬. পাপুণিত্ৱান সম্বোধিং, ধম্মচক্কং পৱত্তযি;

কোটিসতসহস্সানং, পঠমাভিসমযো অহু.

৭. মহাদোণং নাগৰাজং, ৱিনযন্তো মহামুনি;

পাটিহেৰং তদাকাসি, দস্সযন্তো সদেৱকে.

৮. তদা দেৱমনুস্সানং, তম্হি ধম্মপ্পকাসনে;

নৱুতিকোটিসহস্সানি, তৰিংসু সব্বসংসযং.

৯. যম্হি কালে মহাৱীৰো, ওৱদী সকমত্ৰজং;

অসীতিকোটিসহস্সানং, ততিযাভিসমযো অহু.

১০. সন্নিপাতা তযো আসুং, নাৰদস্স মহেসিনো;

কোটিসতসহস্সানং, পঠমো আসি সমাগমো.

১১. যদা বুদ্ধো বুদ্ধগুণং, সনিদানং পকাসযি;

নৱুতিকোটিসহস্সানি, সমিংসু ৱিমলা তদা.

১২. যদা ৱেৰোচনো নাগো, দানং দদাতি সত্থুনো;

তদা সমিংসু জিনপুত্তা, অসীতিসতসহস্সিযো.

১৩. অহং তেন সমযেন, জটিলো উগ্গতাপনো;

অন্তলিক্খচৰো আসিং, পঞ্চাভিঞ্ঞাসু পাৰগূ.

১৪. তদাপাহং অসমসমং, সসঙ্ঘং সপৰিজ্জনং;

অন্নপানেন তপ্পেত্ৱা, চন্দনেনাভিপূজযিং.

১৫. সোপি মং তদা ব্যাকাসি, নাৰদো লোকনাযকো;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৬. ‘‘পধানং পদহিত্ৱান…পে… হেস্সাম সম্মুখা ইমং’’.

১৭. তস্সাপি ৱচনং সুত্ৱা, ভিয্যো হাসেত্ৱ মানসং;

অধিট্ঠহিং ৱতং উগ্গং, দসপাৰমিপূৰিযা.

১৮. নগৰং ধঞ্ঞৱতী নাম, সুদেৱো নাম খত্তিযো;

অনোমা নাম জনিকা, নাৰদস্স মহেসিনো.

১৯. নৱৱস্সসহস্সানি, অগাৰং অজ্ঝ সো ৱসি;

জিতো ৱিজিতাভিৰামো, তযো পাসাদমুত্তমা.

২০. তিচত্তাৰীসসহস্সানি, নাৰিযো সমলঙ্কতা;

ৱিজিতসেনা নাম নাৰী, নন্দুত্তৰো নাম অত্ৰজো.

২১. নিমিত্তে চতুৰো দিস্ৱা, পদসা গমনেন নিক্খমি;

সত্তাহং পধানচাৰং, অচৰী পুৰিসুত্তমো [লোকনাযকো (সী. ক.)].

২২. ব্ৰহ্মুনা যাচিতো সন্তো, নাৰদো লোকনাযকো;

ৱত্তি চক্কং মহাৱীৰো, ধনঞ্চুয্যানমুত্তমে.

২৩. ভদ্দসালো জিতমিত্তো, অহেসুং অগ্গসাৱকা;

ৱাসেট্ঠো নামুপট্ঠাকো, নাৰদস্স মহেসিনো.

২৪. উত্তৰা ফগ্গুনী চেৱ, অহেসুং অগ্গসাৱিকা;

বোধি তস্স ভগৱতো, মহাসোণোতি ৱুচ্চতি.

২৫. উগ্গৰিন্দো ৱসভো চ, অহেসুং অগ্গুপট্ঠকা;

ইন্দাৱৰী চ ৱণ্ডী [উন্দী (সী.), গণ্ডী (স্যা. কং.)] চ, অহেসুং অগ্গুপট্ঠিকা.

২৬. অট্ঠাসীতিৰতনানি, অচ্চুগ্গতো মহামুনি;

কঞ্চনগ্ঘিযসঙ্কাসো, দসসহস্সী ৱিৰোচতি.

২৭. তস্স ব্যামপ্পভা কাযা, নিদ্ধাৱতি দিসোদিসং;

নিৰন্তৰং দিৱাৰত্তিং, যোজনং ফৰতে সদা.

২৮. ন কেচি তেন সমযেন, সমন্তা যোজনে জনা;

উক্কাপদীপে উজ্জালেন্তি, বুদ্ধৰংসীহি ওত্থটা.

২৯. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩০. যথা উড়ূহি গগনং, ৱিচিত্তং উপসোভতি;

তথেৱ সাসনং তস্স, অৰহন্তেহি সোভতি.

৩১. সংসাৰসোতং তৰণায, সেসকে পটিপন্নকে;

ধম্মসেতুং দড়্হং কত্ৱা, নিব্বুতো সো নৰাসভো.

৩২. সোপি বুদ্ধো অসমসমো, তেপি খীণাসৱা অতুলতেজা;

সব্বং তমন্তৰহিতং, ননু ৰিত্তা সব্বসঙ্খাৰা.

৩৩. নাৰদো জিনৱসভো, নিব্বুতো সুদস্সনে পুৰে;

তত্থেৱস্স থূপৱৰো, চতুযোজনমুগ্গতোতি.

নাৰদস্স ভগৱতো ৱংসো নৱমো.