১২. পদুমুত্তৰবুদ্ধৱংসো

১. নাৰদস্স অপৰেন, সম্বুদ্ধো দ্ৱিপদুত্তমো;

পদুমুত্তৰো নাম জিনো, অক্খোভো সাগৰূপমো.

২. মণ্ডকপ্পোৱ সো আসি, যম্হি বুদ্ধো অজাযথ;

উস্সন্নকুসলা জনতা, তম্হি কপ্পে অজাযথ.

৩. পদুমুত্তৰস্স ভগৱতো, পঠমে ধম্মদেসনে;

কোটিসতসহস্সানং, ধম্মাভিসমযো অহু.

৪. ততো পৰম্পি ৱস্সন্তে, তপ্পযন্তে চ পাণিনে;

সত্ততিংসসতসহস্সানং, দুতিযাভিসমযো অহু.

৫. যম্হি কালে মহাৱীৰো, আনন্দং উপসঙ্কমি;

পিতুসন্তিকং উপগন্ত্ৱা, আহনী অমতদুন্দুভিং.

৬. আহতে অমতভেৰিম্হি, ৱস্সন্তে ধম্মৱুট্ঠিযা;

পঞ্ঞাসসতসহস্সানং, ততিযাভিসমযো অহু.

৭. ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

৮. সন্নিপাতা তযো আসুং, পদুমুত্তৰস্স সত্থুনো;

কোটিসতসহস্সানং, পঠমো আসি সমাগমো.

৯. যদা বুদ্ধো অসমসমো, ৱসি ৱেভাৰপব্বতে;

নৱুতিকোটিসহস্সানং, দুতিযো আসি সমাগমো.

১০. পুন চাৰিকং পক্কন্তে, গামনিগমৰট্ঠতো;

অসীতিকোটিসহস্সানং, ততিযো আসি সমাগমো.

১১. অহং তেন সমযেন, জটিলো নাম ৰট্ঠিকো;

সম্বুদ্ধপ্পমুখং সঙ্ঘং, সভত্তং দুস্সমদাসহং.

১২. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘সতসহস্সিতো কপ্পে, অযং বুদ্ধো ভৱিস্সতি.

১৩. ‘‘পধানং পদহিত্ৱান…পে… হেস্সাম সম্মুখা ইমং’’.

১৪. তস্সাপি ৱচনং সুত্ৱা, উত্তৰিং ৱতমধিট্ঠহিং;

অকাসিং উগ্গদড়্হং ধিতিং, দসপাৰমিপূৰিযা.

১৫. ব্যাহতা তিত্থিযা সব্বে, ৱিমনা দুম্মনা তদা;

ন তেসং কেচি পৰিচৰন্তি, ৰট্ঠতো নিচ্ছুভন্তি তে.

১৬. সব্বে তত্থ সমাগন্ত্ৱা, উপগচ্ছুং বুদ্ধসন্তিকে;

তুৱং নাথো মহাৱীৰ, সৰণং হোহি চক্খুম.

১৭. অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

১৮. এৱং নিৰাকুলং আসি, সুঞ্ঞতং তিত্থিযেহি তং;

ৱিচিত্তং অৰহন্তেহি, ৱসীভূতেহি তাদিহি.

১৯. নগৰং হংসৱতী নাম, আনন্দো নাম খত্তিযো;

সুজাতা নাম জনিকা, পদুমুত্তৰস্স সত্থুনো.

২০. দসৱস্সসহস্সানি, অগাৰং অজ্ঝ সো ৱসি;

নৰৱাহনো যসো ৱসৱত্তী [নাৰিৱাহনো যসৱতী (স্যা. কং.)], তযো পাসাদমুত্তমা.

২১. তিচত্তাৰীসসহস্সানি, নাৰিযো সমলঙ্কতা;

ৱসুদত্তা নাম নাৰী, উত্তমো নাম অত্ৰজো.

২২. নিমিত্তে চতুৰো দিস্ৱা, পাসাদেনাভিনিক্খমি;

সত্তাহং পধানচাৰং, অচৰী পুৰিসুত্তমো.

২৩. ব্ৰহ্মুনা যাচিতো সন্তো, পদুমুত্তৰো ৱিনাযকো;

ৱত্তি চক্কং মহাৱীৰো, মিথিলুয্যানমুত্তমে.

২৪. দেৱলো চ সুজাতো চ, অহেসুং অগ্গসাৱকা;

সুমনো নামুপট্ঠাকো, পদুমুত্তৰস্স মহেসিনো.

২৫. অমিতা চ অসমা চ, অহেসুং অগ্গসাৱিকা;

বোধি তস্স ভগৱতো, সললোতি পৱুচ্চতি.

২৬. ৱিতিণ্ণো চেৱ [অমিতো চেৱ (স্যা.)] তিস্সো চ, অহেসুং অগ্গুপট্ঠকা;

হট্ঠা চেৱ ৱিচিত্তা চ, অহেসুং অগ্গুপট্ঠিকা.

২৭. অট্ঠপণ্ণাসৰতনং, অচ্চুগ্গতো মহামুনি;

কঞ্চনগ্ঘিযসঙ্কাসো, দ্ৱত্তিংসৱৰলক্খণো.

২৮. কুট্টা কৱাটা ভিত্তী চ, ৰুক্খা নগসিলুচ্চযা;

ন তস্সাৱৰণং অত্থি, সমন্তা দ্ৱাদসযোজনে.

২৯. ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩০. সন্তাৰেত্ৱা বহুজনং, ছিন্দিত্ৱা সব্বসংসযং;

জলিত্ৱা অগ্গিক্খন্ধোৱ নিব্বুতো সো সসাৱকো.

৩১. পদুমুত্তৰো জিনো বুদ্ধো, নন্দাৰামম্হি নিব্বুতো;

তত্থেৱস্স থূপৱৰো, দ্ৱাদসুব্বেধযোজনোতি.

পদুমুত্তৰস্স ভগৱতো ৱংসো দসমো.