১৩. সুমেধবুদ্ধৱংসো

১. পদুমুত্তৰস্স অপৰেন, সুমেধো নাম নাযকো;

দুৰাসদো উগ্গতেজো, সব্বলোকুত্তমো মুনি.

২. পসন্ননেত্তো সুমুখো, ব্ৰহা উজু পতাপৱা;

হিতেসী সব্বসত্তানং, বহূ মোচেসি বন্ধনা.

৩. যদা বুদ্ধো পাপুণিত্ৱা, কেৱলং বোধিমুত্তমং;

সুদস্সনম্হি নগৰে, ধম্মচক্কং পৱত্তযি.

৪. তস্সাপি অভিসমযা তীণি, অহেসুং ধম্মদেসনে;

কোটিসতসহস্সানং, পঠমাভিসমযো অহু.

৫. পুনাপৰং কুম্ভকণ্ণং, যক্খং সো দমযী জিনো;

নৱুতিকোটিসহস্সানং, দুতিযাভিসমযো অহু.

৬. পুনাপৰং অমিতযসো, চতুসচ্চং পকাসযি;

অসীতিকোটিসহস্সানং, ততিযাভিসমযো অহু.

৭. সন্নিপাতা তযো আসুং, সুমেধস্স মহেসিনো;

খীণাসৱানং ৱিমলানং, সন্তচিত্তান তাদিনং.

৮. সুদস্সনং নাম নগৰং, উপগঞ্ছি জিনো যদা;

তদা খীণাসৱা ভিক্খূ, সমিংসু সতকোটিযো.

৯. পুনাপৰং দেৱকূটে, ভিক্খূনং কথিনত্থতে;

তদা নৱুতিকোটীনং, দুতিযো আসি সমাগমো.

১০. পুনাপৰং দসবলো, যদা চৰতি চাৰিকং;

তদা অসীতিকোটীনং, ততিযো আসি সমাগমো.

১১. অহং তেন সমযেন, উত্তৰো নাম মাণৱো;

অসীতিকোটিযো ময্হং, ঘৰে সন্নিচিতং ধনং.

১২. কেৱলং সব্বং দত্ৱান, সসঙ্ঘে লোকনাযকে;

সৰণং তস্সুপগঞ্ছিং, পব্বজ্জঞ্চাভিৰোচযিং.

১৩. সোপি মং বুদ্ধো ব্যাকাসি, কৰোন্তো অনুমোদনং;

‘‘তিংসকপ্পসহস্সম্হি, অযং বুদ্ধো ভৱিস্সতি.

১৪. ‘‘পধানং পদহিত্ৱান…পে… হেস্সাম সম্মুখা ইমং’’.

১৫. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৬. সুত্তন্তং ৱিনযঞ্চাপি, নৱঙ্গং সত্থুসাসনং;

সব্বং পৰিযাপুণিত্ৱান, সোভযিং জিনসাসনং.

১৭. তত্থপ্পমত্তো ৱিহৰন্তো, নিসজ্জট্ঠানচঙ্কমে;

অভিঞ্ঞাসু পাৰমিং গন্ত্ৱা, ব্ৰহ্মলোকমগঞ্ছহং.

১৮. সুদস্সনং নাম নগৰং, সুদত্তো নাম খত্তিযো;

সুদত্তা নাম জনিকা, সুমেধস্স মহেসিনো.

১৯. নৱৱস্সসহস্সানি, অগাৰং অজ্ঝ সো ৱসি;

সুচন্দকঞ্চনসিৰিৱড্ঢা, তযো পাসাদমুত্তমা.

২০. তিসোড়সসহস্সানি, নাৰিযো সমলঙ্কতা;

সুমনা নাম সা নাৰী, পুনব্বসু নাম অত্ৰজো.

২১. নিমিত্তে চতুৰো দিস্ৱা, হত্থিযানেন নিক্খমি;

অনূনকং অড্ঢমাসং, পধানং পদহী জিনো.

২২. ব্ৰহ্মুনা যাচিতো সন্তো, সুমেধো লোকনাযকো;

ৱত্তি চক্কং মহাৱীৰো, সুদস্সনুয্যানমুত্তমে.

২৩. সৰণো সব্বকামো চ, অহেসুং অগ্গসাৱকা;

সাগৰো নামুপট্ঠাকো, সুমেধস্স মহেসিনো.

২৪. ৰামা চেৱ সুৰামা চ, অহেসুং অগ্গসাৱিকা;

বোধি তস্স ভগৱতো, মহানীপোতি ৱুচ্চতি.

২৫. উৰুৱেলা যসৱা চ, অহেসুং অগ্গুপট্ঠকা;

যসোধৰা সিৰিমা চ [যসা নাম সিৰিমা চ (স্যা. কং.)], অহেসুং অগ্গুপট্ঠিকা.

২৬. অট্ঠাসীতিৰতনানি, অচ্চুগ্গতো মহামুনি;

ওভাসেতি দিসা সব্বা, চন্দো তাৰগণে যথা.

২৭. চক্কৱত্তিমণী নাম, যথা তপতি যোজনং;

তথেৱ তস্স ৰতনং, সমন্তা ফৰতি যোজনং.

২৮. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৯. তেৱিজ্জছড়ভিঞ্ঞেহি, বলপ্পত্তেহি তাদিহি;

সমাকুলমিদং আসি, অৰহন্তেহি সাধুহি.

৩০. তেপি সব্বে অমিতযসা, ৱিপ্পমুত্তা নিৰূপধী;

ঞাণালোকং দস্সযিত্ৱা, নিব্বুতা তে মহাযসা.

৩১. সুমেধো জিনৱৰো বুদ্ধো, মেধাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

সুমেধস্স ভগৱতো ৱংসো একাদসমো.