১৪. সুজাতবুদ্ধৱংসো

১. তত্থেৱ মণ্ডকপ্পম্হি, সুজাতো নাম নাযকো;

সীহহনুসভক্খন্ধো, অপ্পমেয্যো দুৰাসদো.

২. চন্দোৱ ৱিমলো সুদ্ধো, সতৰংসীৱ পতাপৱা;

এৱং সোভতি সম্বুদ্ধো, জলন্তো সিৰিযা সদা.

৩. পাপুণিত্ৱান সম্বুদ্ধো, কেৱলং বোধিমুত্তমং;

সুমঙ্গলম্হি নগৰে, ধম্মচক্কং পৱত্তযি.

৪. দেসেন্তে [দেসেন্তো (স্যা. কং.)] পৱৰং ধম্মং, সুজাতে লোকনাযকে [সুজাতো লোকনাযকো (স্যা. কং.)];

অসীতিকোটী অভিসমিংসু, পঠমে ধম্মদেসনে.

৫. যদা সুজাতো অমিতযসো, দেৱে ৱস্সং উপাগমি;

সত্ততিংসসতসহস্সানং, দুতিযাভিসমযো অহু.

৬. যদা সুজাতো অসমসমো, উপগচ্ছি পিতুসন্তিকং;

সট্ঠিসতসহস্সানং [সত্ততিংসসহস্সানং (সী.)], ততিযাভিসমযো অহু.

৭. সন্নিপাতা তযো আসুং, সুজাতস্স মহেসিনো;

খীণাসৱানং ৱিমলানং, সন্তচিত্তান তাদিনং.

৮. অভিঞ্ঞাবলপ্পত্তানং, অপ্পত্তানং ভৱাভৱে;

সট্ঠিসতসহস্সানি, পঠমং সন্নিপতিংসু তে.

৯. পুনাপৰং সন্নিপাতে, তিদিৱোৰোহণে জিনে;

পঞ্ঞাসসতসহস্সানং, দুতিযো আসি সমাগমো.

১০. উপসঙ্কমন্তো নৰাসভং, তস্স যো অগ্গসাৱকো;

চতূহি সতসহস্সেহি, সম্বুদ্ধং উপসঙ্কমি.

১১. অহং তেন সমযেন, চতুদীপম্হি ইস্সৰো;

অন্তলিক্খচৰো আসিং, চক্কৱত্তী মহব্বলো.

১২. লোকে অচ্ছৰিযং দিস্ৱা, অব্ভুতং লোমহংসনং;

উপগন্ত্ৱান ৱন্দিং সো, সুজাতং লোকনাযকং.

১৩. চতুদীপে মহাৰজ্জং, ৰতনে সত্ত উত্তমে;

বুদ্ধে নিয্যাদযিত্ৱান, পব্বজিং তস্স সন্তিকে.

১৪. আৰামিকা জনপদে, উট্ঠানং পটিপিণ্ডিয;

উপনেন্তি ভিক্খুসঙ্ঘস্স, পচ্চযং সযনাসনং.

১৫. সোপি মং বুদ্ধো [তদা (স্যা. কং.)] ব্যাকাসি, দসসহস্সিম্হি ইস্সৰো;

‘‘তিংসকপ্পসহস্সম্হি, অযং বুদ্ধো ভৱিস্সতি.

১৬. ‘‘পধানং পদহিত্ৱান…পে… হেস্সাম সম্মুখা ইমং’’.

১৭. তস্সাপি ৱচনং সুত্ৱা, ভিয্যো হাসং জনেসহং;

অধিট্ঠহিং ৱতং উগ্গং, দসপাৰমিপূৰিযা.

১৮. সুত্তন্তং ৱিনযঞ্চাপি, নৱঙ্গং সত্থুসাসনং;

সব্বং পৰিযাপুণিত্ৱান, সোভযিং জিনসাসনং.

১৯. তত্থপ্পমত্তো ৱিহৰন্তো, ব্ৰহ্মং ভাৱেত্ৱ ভাৱনং;

অভিঞ্ঞাপাৰমিং গন্ত্ৱা, ব্ৰহ্মলোকমগঞ্ছহং.

২০. সুমঙ্গলং নাম নগৰং, উগ্গতো নাম খত্তিযো;

মাতা পভাৱতী নাম, সুজাতস্স মহেসিনো.

২১. নৱৱস্সসহস্সানি, অগাৰং অজ্ঝ সো ৱসি;

সিৰী উপসিৰী নন্দো, তযো পাসাদমুত্তমা.

২২. তেৱীসতিসহস্সানি, নাৰিযো সমলঙ্কতা;

সিৰিনন্দা নাম নাৰী, উপসেনো নাম অত্ৰজো.

২৩. নিমিত্তে চতুৰো দিস্ৱা, অস্সযানেন নিক্খমি;

অনূননৱমাসানি, পধানং পদহী জিনো.

২৪. ব্ৰহ্মুনা যাচিতো সন্তো, সুজাতো লোকনাযকো;

ৱত্তি চক্কং মহাৱীৰো, সুমঙ্গলুয্যানমুত্তমে.

২৫. সুদস্সনো সুদেৱো চ, অহেসুং অগ্গসাৱকা;

নাৰদো নামুপট্ঠাকো, সুজাতস্স মহেসিনো.

২৬. নাগা চ নাগসমালা চ, অহেসুং অগ্গসাৱিকা;

বোধি তস্স ভগৱতো, মহাৱেড়ূতি ৱুচ্চতি.

২৭. সো চ ৰুক্খো ঘনক্খন্ধো [ঘনৰুচিৰো (সী. ক.)], অচ্ছিদ্দো হোতি পত্তিকো;

উজু ৱংসো ব্ৰহা হোতি, দস্সনীযো মনোৰমো.

২৮. একক্খন্ধো পৱড্ঢিত্ৱা, ততো সাখা পভিজ্জতি;

যথা সুবদ্ধো মোৰহত্থো, এৱং সোভতি সো দুমো.

২৯. ন তস্স কণ্টকা হোন্তি, নাপি ছিদ্দং মহা অহু;

ৱিত্থিণ্ণসাখো অৱিৰলো, সন্দচ্ছাযো মনোৰমো.

৩০. সুদত্তো চেৱ চিত্তো চ, অহেসুং অগ্গুপট্ঠকা;

সুভদ্দা চ পদুমা চ, অহেসুং অগ্গুপট্ঠিকা.

৩১. পঞ্ঞাসৰতনো আসি, উচ্চত্তনেন সো জিনো;

সব্বাকাৰৱৰূপেতো, সব্বগুণমুপাগতো.

৩২. তস্স পভা অসমসমা, নিদ্ধাৱতি সমন্ততো;

অপ্পমাণো অতুলিযো, ওপম্মেহি অনূপমো.

৩৩. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩৪. যথাপি সাগৰে ঊমী, গগনে তাৰকা যথা;

এৱং তদা পাৱচনং, অৰহন্তেহি চিত্তিতং [চিত্তকং (স্যা. কং.)].

৩৫. সো চ বুদ্ধো অসমসমো, গুণানি চ তানি অতুলিযানি;

সব্বং তমন্তৰহিতং, ননু ৰিত্তা সব্বসঙ্খাৰা.

৩৬. সুজাতো জিনৱৰো বুদ্ধো, সিলাৰামম্হি নিব্বুতো;

তত্থেৱ তস্স চেতিযো [তত্থেৱ চেতিযো সত্থু (স্যা. কং.)], তীণিগাৱুতমুগ্গতোতি.

সুজাতস্স ভগৱতো ৱংসো দ্ৱাদসমো.