৮. সোভিতবুদ্ধৱংসো

১. ৰেৱতস্স অপৰেন, সোভিতো নাম নাযকো;

সমাহিতো সন্তচিত্তো, অসমো অপ্পটিপুগ্গলো.

২. সো জিনো সকগেহম্হি, মানসং ৱিনিৱত্তযি;

পত্ৱান কেৱলং বোধিং, ধম্মচক্কং পৱত্তযি.

৩. যাৱ হেট্ঠা অৱীচিতো, ভৱগ্গা চাপি উদ্ধতো;

এত্থন্তৰে একপৰিসা, অহোসি ধম্মদেসনে.

৪. তায পৰিসায সম্বুদ্ধো, ধম্মচক্কং পৱত্তযি;

গণনায ন ৱত্তব্বো, পঠমাভিসমযো অহু.

৫. ততো পৰম্পি দেসেন্তে, মৰূনঞ্চ সমাগমে;

নৱুতিকোটিসহস্সানং, দুতিযাভিসমযো অহু.

৬. পুনাপৰং ৰাজপুত্তো, জযসেনো নাম খত্তিযো;

আৰামং ৰোপযিত্ৱান, বুদ্ধে নিয্যাদযী তদা.

৭. তস্স যাগং পকিত্তেন্তো, ধম্মং দেসেসি চক্খুমা;

তদা কোটিসহস্সানং, ততিযাভিসমযো অহু.

৮. সন্নিপাতা তযো আসুং, সোভিতস্স মহেসিনো;

খীণাসৱানং ৱিমলানং, সন্তচিত্তান তাদিনং.

৯. উগ্গতো নাম সো ৰাজা, দানং দেতি নৰুত্তমে;

তম্হি দানে সমাগঞ্ছুং, অৰহন্তা [অৰহতং (ক.)] সতকোটিযো.

১০. পুনাপৰং পুৰগণো [পুগগণো (ক.)], দেতি দানং নৰুত্তমে;

তদা নৱুতিকোটীনং, দুতিযো আসি সমাগমো.

১১. দেৱলোকে ৱসিত্ৱান, যদা ওৰোহতী জিনো;

তদা অসীতিকোটীনং, ততিযো আসি সমাগমো.

১২. অহং তেন সমযেন, সুজাতো নাম ব্ৰাহ্মণো;

তদা সসাৱকং বুদ্ধং, অন্নপানেন তপ্পযিং.

১৩. সোপি মং বুদ্ধো ব্যাকাসি, সোভিতো লোকনাযকো;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৪. ‘‘পধানং পদহিত্ৱান…পে… হেস্সাম সম্মুখা ইমং’’.

১৫. তস্সাপি ৱচনং সুত্ৱা, হট্ঠো সংৱিগ্গমানসো;

তমেৱত্থমনুপ্পত্তিযা, উগ্গং ধিতিমকাসহং.

১৬. সুধম্মং নাম নগৰং, সুধম্মো নাম খত্তিযো;

সুধম্মা নাম জনিকা, সোভিতস্স মহেসিনো.

১৭. নৱৱস্সসহস্সানি, অগাৰং অজ্ঝ সো ৱসি;

কুমুদো নাড়িনো পদুমো, তযো পাসাদমুত্তমা.

১৮. সত্ততিংসসহস্সানি, নাৰিযো সমলঙ্কতা;

মণিলা [মখিলা (অট্ঠ.), সমঙ্গী (সী.), মকিলা (স্যা. কং.)] নাম সা নাৰী, সীহো নামাসি অত্ৰজো.

১৯. নিমিত্তে চতুৰো দিস্ৱা, পাসাদেনাভিনিক্খমি;

সত্তাহং পধানচাৰং, চৰিত্ৱা পুৰিসুত্তমো.

২০. ব্ৰহ্মুনা যাচিতো সন্তো, সোভিতো লোকনাযকো;

ৱত্তি চক্কং মহাৱীৰো, সুধম্মুয্যানমুত্তমে.

২১. অসমো চ সুনেত্তো চ, অহেসুং অগ্গসাৱকা;

অনোমো নামুপট্ঠাকো, সোভিতস্স মহেসিনো.

২২. নকুলা চ সুজাতা চ, অহেসুং অগ্গসাৱিকা;

বুজ্ঝমানো চ সো বুদ্ধো, নাগমূলে অবুজ্ঝথ.

২৩. ৰম্মো চেৱ সুদত্তো চ, অহেসুং অগ্গুপট্ঠকা;

নকুলা চেৱ চিত্তা চ, অহেসুং অগ্গুপট্ঠিকা.

২৪. অট্ঠপণ্ণাসৰতনং, অচ্চুগ্গতো মহামুনি;

ওভাসেতি দিসা সব্বা, সতৰংসীৱ উগ্গতো.

২৫. যথা সুফুল্লং পৱনং, নানাগন্ধেহি ধূপিতং;

তথেৱ তস্স পাৱচনং, সীলগন্ধেহি ধূপিতং.

২৬. যথাপি সাগৰো নাম, দস্সনেন অতপ্পিযো;

তথেৱ তস্স পাৱচনং, সৱণেন অতপ্পিযং.

২৭. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৮. ওৱাদং অনুসিট্ঠিঞ্চ, দত্ৱান সেসকে জনে;

হুতাসনোৱ তাপেত্ৱা, নিব্বুতো সো সসাৱকো.

২৯. সো চ বুদ্ধো অসমসমো, তেপি সাৱকা বলপ্পত্তা;

সব্বং তমন্তৰহিতং, ননু ৰিত্তা সব্বসঙ্খাৰা.

৩০. সোভিতো ৱৰসম্বুদ্ধো, সীহাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

সোভিতস্স ভগৱতো ৱংসো ছট্ঠো.