৭. ৰেৱতবুদ্ধৱংসো

১. সুমনস্স অপৰেন, ৰেৱতো নাম নাযকো;

অনূপমো অসদিসো, অতুলো উত্তমো জিনো.

২. সোপি ধম্মং পকাসেসি, ব্ৰহ্মুনা অভিযাচিতো;

খন্ধধাতুৱৱত্থানং, অপ্পৱত্তং ভৱাভৱে.

৩. তস্সাভিসমযা তীণি, অহেসুং ধম্মদেসনে;

গণনায ন ৱত্তব্বো, পঠমাভিসমযো অহু.

৪. যদা অৰিন্দমং ৰাজং [ৰাজানং (ক.)], ৱিনেসি ৰেৱতো মুনি;

তদা কোটিসহস্সানং, দুতিযাভিসমযো অহু.

৫. সত্তাহং পটিসল্লানা, ৱুট্ঠহিত্ৱা নৰাসভো;

কোটিসতং নৰমৰূনং, ৱিনেসি উত্তমে ফলে.

৬. সন্নিপাতা তযো আসুং, ৰেৱতস্স মহেসিনো;

খীণাসৱানং ৱিমলানং, সুৱিমুত্তান তাদিনং.

৭. অতিক্কন্তা গণনপথং, পঠমং যে সমাগতা;

কোটিসতসহস্সানং, দুতিযো আসি সমাগমো.

৮. যোপি [যো সো (স্যা. কং. ক.)] পঞ্ঞায অসমো, তস্স চক্কানুৱত্তকো;

সো তদা ব্যাধিতো আসি, পত্তো জীৱিতসংসযং.

৯. তস্স গিলানপুচ্ছায, যে তদা উপগতা মুনী;

কোটিসহস্সা অৰহন্তো, ততিযো আসি সমাগমো.

১০. অহং তেন সমযেন, অতিদেৱো নাম ব্ৰাহ্মণো;

উপগন্ত্ৱা ৰেৱতং বুদ্ধং, সৰণং তস্স গঞ্ছহং.

১১. তস্স সীলং সমাধিঞ্চ, পঞ্ঞাগুণমনুত্তমং;

থোমযিত্ৱা যথাথামং, উত্তৰীযমদাসহং.

১২. সোপি মং বুদ্ধো ব্যাকাসি, ৰেৱতো লোকনাযকো;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৩. ‘‘পধানং পদহিত্ৱান…পে… হেস্সাম সম্মুখা ইমং’’.

১৪. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৫. তদাপি তং বুদ্ধধম্মং, সৰিত্ৱা অনুব্ৰূহযিং;

আহৰিস্সামি তং ধম্মং, যং ময্হং অভিপত্থিতং.

১৬. নগৰং সুধঞ্ঞৱতী নাম [সুধম্মকং নাম (সী.), সুধঞ্ঞকং নাম (স্যা.)], ৱিপুলো নাম খত্তিযো;

ৱিপুলা নাম জনিকা, ৰেৱতস্স মহেসিনো.

১৭. ছ চ ৱস্সসহস্সানি [ছব্বস্সসহস্সানি (সী. স্যা.)], অগাৰং অজ্ঝ সো ৱসি;

সুদস্সনো ৰতনগ্ঘি, আৱেড়ো চ ৱিভূসিতো;

পুঞ্ঞকম্মাভিনিব্বত্তা, তযো পাসাদমুত্তমা.

১৮. তেত্তিংস চ সহস্সানি, নাৰিযো সমলঙ্কতা;

সুদস্সনা নাম নাৰী, ৱৰুণো নাম অত্ৰজো.

১৯. নিমিত্তে চতুৰো দিস্ৱা, ৰথযানেন নিক্খমি;

অনূনসত্তমাসানি, পধানং পদহী জিনো.

২০. ব্ৰহ্মুনা যাচিতো সন্তো, ৰেৱতো লোকনাযকো;

ৱত্তি চক্কং মহাৱীৰো, ৱৰুণাৰামে সিৰীঘৰে.

২১. ৱৰুণো ব্ৰহ্মদেৱো চ, অহেসুং অগ্গসাৱকা;

সম্ভৱো নামুপট্ঠাকো, ৰেৱতস্স মহেসিনো.

২২. ভদ্দা চেৱ সুভদ্দা চ, অহেসুং অগ্গসাৱিকা;

সোপি বুদ্ধো অসমসমো, নাগমূলে অবুজ্ঝথ.

২৩. পদুমো কুঞ্জৰো চেৱ, অহেসুং অগ্গুপট্ঠিকা;

সিৰীমা চেৱ যসৱতী, অহেসুং অগ্গুপট্ঠিকা.

২৪. উচ্চত্তনেন সো বুদ্ধো, অসীতিহত্থমুগ্গতো;

ওভাসেতি দিসা সব্বা, ইন্দকেতুৱ উগ্গতো.

২৫. তস্স সৰীৰে নিব্বত্তা, পভামালা অনুত্তৰা;

দিৱা ৱা যদি ৱা ৰত্তিং, সমন্তা ফৰতি যোজনং.

২৬. সট্ঠিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৭. দস্সযিত্ৱা বুদ্ধবলং, অমতং লোকে পকাসযং;

নিব্বাযি অনুপাদানো, যথগ্গুপাদানসঙ্খযা.

২৮. সো চ কাযো ৰতননিভো, সো চ ধম্মো অসাদিসো;

সব্বং তমন্তৰহিতং, ননু ৰিত্তা সব্বসঙ্খাৰা.

২৯. ৰেৱতো যসধৰো বুদ্ধো, নিব্বুতো সো মহাপুৰে;

ধাতুৱিত্থাৰিকং আসি, তেসু তেসু পদেসতোতি.

ৰেৱতস্স ভগৱতো ৱংসো পঞ্চমো.