৪. কোণ্ডঞ্ঞবুদ্ধৱংসো

১. দীপঙ্কৰস্স অপৰেন, কোণ্ডঞ্ঞো নাম নাযকো;

অনন্ততেজো অমিতযসো, অপ্পমেয্যো দুৰাসদো.

২. ধৰণূপমো খমনেন, সীলেন সাগৰূপমো;

সমাধিনা মেৰূপমো, ঞাণেন গগনূপমো.

৩. ইন্দ্ৰিযবলবোজ্ঝঙ্গ-মগ্গসচ্চপ্পকাসনং;

পকাসেসি সদা বুদ্ধো, হিতায সব্বপাণিনং.

৪. ধম্মচক্কং পৱত্তেন্তে, কোণ্ডঞ্ঞে লোকনাযকে;

কোটিসতসহস্সানং, পঠমাভিসমযো অহু.

৫. ততো পৰম্পি দেসেন্তে, নৰমৰূনং সমাগমে;

নৱুতিকোটিসহস্সানং, দুতিযাভিসমযো অহু.

৬. তিত্থিযে অভিমদ্দন্তো, যদা ধম্মমদেসযি;

অসীতিকোটিসহস্সানং, ততিযাভিসমযো অহু.

৭. সন্নিপাতা তযো আসুং, কোণ্ডঞ্ঞস্স মহেসিনো;

খীণাসৱানং ৱিমলানং, সন্তচিত্তান তাদিনং.

৮. কোটিসতসহস্সানং, পঠমো আসি সমাগমো;

দুতিযো কোটিসহস্সানং, ততিযো নৱুতিকোটিনং.

৯. অহং তেন সমযেন, ৱিজিতাৱী নাম খত্তিযো;

সমুদ্দং অন্তমন্তেন, ইস্সৰিযং ৱত্তযামহং.

১০. কোটিসতসহস্সানং, ৱিমলানং মহেসিনং;

সহ লোকগ্গনাথেন, পৰমন্নেন তপ্পযিং.

১১. সোপি মং বুদ্ধো ব্যাকাসি, কোণ্ডঞ্ঞো লোকনাযকো;

‘‘অপৰিমেয্যিতো কপ্পে, বুদ্ধো লোকে ভৱিস্সতি.

১২. ‘‘পধানং পদহিত্ৱান, কত্ৱা দুক্কৰকাৰিকং;

অস্সত্থমূলে সম্বুদ্ধো, বুজ্ঝিস্সতি মহাযসো.

১৩. ‘‘ইমস্স জনিকা মাতা, মাযা নাম ভৱিস্সতি;

পিতা সুদ্ধোদনো নাম, অযং হেস্সতি গোতমো.

১৪. ‘‘কোলিতো উপতিস্সো চ, অগ্গা হেস্সন্তি সাৱকা;

আনন্দো নামুপট্ঠাকো, উপট্ঠিস্সতিমং জিনং.

১৫. ‘‘খেমা উপ্পলৱণ্ণা চ, অগ্গা হেস্সন্তি সাৱিকা;

বোধি তস্স ভগৱতো, অস্সত্থোতি পৱুচ্চতি.

১৬. ‘‘চিত্তো চ হত্থাড়ৱকো, অগ্গা হেস্সন্তুপট্ঠকা;

নন্দমাতা চ উত্তৰা, অগ্গা হেস্সন্তুপট্ঠিকা;

আযু ৱস্সসতং তস্স, গোতমস্স যসস্সিনো’’.

১৭. ইদং সুত্ৱান ৱচনং, অসমস্স মহেসিনো;

আমোদিতা নৰমৰূ, বুদ্ধবীজং কিৰ অযং.

১৮. উক্কুট্ঠিসদ্দা ৱত্তন্তি, অপ্ফোটেন্তি হসন্তি চ;

কতঞ্জলী নমস্সন্তি, দসসহস্সিদেৱতা.

১৯. ‘‘যদিমস্স লোকনাথস্স, ৱিৰজ্ঝিস্সাম সাসনং;

অনাগতম্হি অদ্ধানে, হেস্সাম সম্মুখা ইমং.

২০. ‘‘যথা মনুস্সা নদিং তৰন্তা, পটিতিত্থং ৱিৰজ্ঝিয;

হেট্ঠাতিত্থে গহেত্ৱান, উত্তৰন্তি মহানদিং.

২১. ‘‘এৱমেৱ মযং সব্বে, যদি মুঞ্চামিমং জিনং;

অনাগতম্হি অদ্ধানে, হেস্সাম সম্মুখা ইমং’’.

২২. তস্সাহং ৱচনং সুত্ৱা, ভিয্যো চিত্তং পসাদযিং;

তমেৱ অত্থং সাধেন্তো, মহাৰজ্জং জিনে অদং;

মহাৰজ্জং দদিত্ৱান [চজিত্ৱা (সী.)], পব্বজিং তস্স সন্তিকে.

২৩. সুত্তন্তং ৱিনযঞ্চাপি, নৱঙ্গং সত্থুসাসনং;

সব্বং পৰিযাপুণিত্ৱান, সোভযিং জিনসাসনং.

২৪. তত্থপ্পমত্তো ৱিহৰন্তো, নিসজ্জট্ঠানচঙ্কমে;

অভিঞ্ঞাপাৰমিং গন্ত্ৱা, ব্ৰহ্মলোকমগঞ্ছহং.

২৫. নগৰং ৰম্মৱতী নাম, সুনন্দো নাম খত্তিযো;

সুজাতা নাম জনিকা, কোণ্ডঞ্ঞস্স মহেসিনো.

২৬. দসৱস্সসহস্সানি, অগাৰং অজ্ঝ সো ৱসি [অগাৰমজ্ঝে চ সো ৱসি (স্যা.)];

সুচি সুৰুচি সুভো চ, তযো পাসাদমুত্তমা.

২৭. তীণিসতসহস্সানি, নাৰিযো সমলঙ্কতা;

ৰুচিদেৱী নাম নাৰী, ৱিজিতসেনো অত্ৰজো.

২৮. নিমিত্তে চতুৰো দিস্ৱা, ৰথযানেন নিক্খমি;

অনূনদসমাসানি, পধানং পদহী জিনো.

২৯. ব্ৰহ্মুনা যাচিতো সন্তো, কোণ্ডঞ্ঞো দ্ৱিপদুত্তমো;

ৱত্তি চক্কং মহাৱীৰো, দেৱানং নগৰুত্তমে.

৩০. ভদ্দো চেৱ সুভদ্দো চ, অহেসুং অগ্গসাৱকা;

অনুৰুদ্ধো নামুপট্ঠাকো, কোণ্ডঞ্ঞস্স মহেসিনো.

৩১. তিস্সা চ উপতিস্সা চ, অহেসুং অগ্গসাৱিকা;

সালকল্যাণিকো বোধি, কোণ্ডঞ্ঞস্স মহেসিনো.

৩২. সোণো চ উপসোণো চ, অহেসুং অগ্গুপট্ঠকা;

নন্দা চেৱ সিৰীমা চ, অহেসুং অগ্গুপট্ঠিকা.

৩৩. সো অট্ঠাসীতি হত্থানি, অচ্চুগ্গতো মহামুনি;

সোভতে উড়ুৰাজাৱ সূৰিযো মজ্ঝন্হিকে যথা.

৩৪. ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩৫. খীণাসৱেহি ৱিমলেহি, ৱিচিত্তা আসি মেদনী;

যথা গগনমুড়ূহি, এৱং সো উপসোভথ.

৩৬. তেপি নাগা অপ্পমেয্যা, অসঙ্খোভা দুৰাসদা;

ৱিজ্জুপাতংৱ দস্সেত্ৱা, নিব্বুতা তে মহাযসা.

৩৭. সা চ অতুলিযা জিনস্স ইদ্ধি, ঞাণপৰিভাৱিতো চ সমাধি;

সব্বং তমন্তৰহিতং, ননু ৰিত্তা সব্বসঙ্খাৰা.

৩৮. কোণ্ডঞ্ঞো পৱৰো বুদ্ধো, চন্দাৰামম্হি নিব্বুতো;

তত্থেৱ চেতিযো চিত্তো, সত্ত যোজনমুস্সিতোতি.

কোণ্ডঞ্ঞস্স ভগৱতো ৱংসো দুতিযো.