৫. মঙ্গলবুদ্ধৱংসো

১. কোণ্ডঞ্ঞস্স অপৰেন, মঙ্গলো নাম নাযকো;

তমং লোকে নিহন্ত্ৱান, ধম্মোক্কমভিধাৰযি.

২. অতুলাসি পভা তস্স, জিনেহঞ্ঞেহি উত্তৰিং;

চন্দসূৰিযপভং হন্ত্ৱা, দসসহস্সী ৱিৰোচতি.

৩. সোপি বুদ্ধো পকাসেসি, চতুৰো সচ্চৱৰুত্তমে;

তে তে সচ্চৰসং পীত্ৱা, ৱিনোদেন্তি মহাতমং.

৪. পত্ৱান বোধিমতুলং, পঠমে ধম্মদেসনে;

কোটিসতসহস্সানং, ধম্মাভিসমযো অহু.

৫. সুৰিন্দদেৱভৱনে, বুদ্ধো ধম্মমদেসযি;

তদা কোটিসহস্সানং [নৱকোটিসহস্সানং (সী.)], দুতিযো সমযো অহু.

৬. যদা সুনন্দো চক্কৱত্তী, সম্বুদ্ধং উপসঙ্কমি;

তদা আহনি সম্বুদ্ধো, ধম্মভেৰিং ৱৰুত্তমং.

৭. সুনন্দস্সানুচৰা জনতা, তদাসুং নৱুতিকোটিযো;

সব্বেপি তে নিৰৱসেসা, অহেসুং এহি ভিক্খুকা.

৮. সন্নিপাতা তযো আসুং, মঙ্গলস্স মহেসিনো;

কোটিসতসহস্সানং, পঠমো আসি সমাগমো.

৯. দুতিযো কোটিসতসহস্সানং, ততিযো নৱুতিকোটিনং;

খীণাসৱানং ৱিমলানং, তদা আসি সমাগমো.

১০. অহং তেন সমযেন, সুৰুচী নাম ব্ৰাহ্মণো;

অজ্ঝাযকো মন্তধৰো, তিণ্ণং ৱেদান পাৰগূ.

১১. তমহং উপসঙ্কম্ম, সৰণং গন্ত্ৱান সত্থুনো;

সম্বুদ্ধপ্পমুখং সঙ্ঘং, গন্ধমালেন পূজযিং;

পূজেত্ৱা গন্ধমালেন, গৱপানেন তপ্পযিং.

১২. সোপি মং বুদ্ধো ব্যাকাসি, মঙ্গলো দ্ৱিপদুত্তমো;

‘‘অপৰিমেয্যিতো কপ্পে, অযং বুদ্ধো ভৱিস্সতি.

১৩. ‘‘পধানং পদহিত্ৱান…পে… হেস্সাম সম্মুখা ইমং’’.

১৪. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দস পাৰমিপূৰিযা.

১৫. তদা পীতিমনুব্ৰূহন্তো, সম্বোধিৱৰপত্তিযা;

বুদ্ধে দত্ৱান মং গেহং, পব্বজিং তস্স সন্তিকে.

১৬. সুত্তন্তং ৱিনযঞ্চাপি, নৱঙ্গং সত্থুসাসনং;

সব্বং পৰিযাপুণিত্ৱা, সোভযিং জিনসাসনং.

১৭. তত্থপ্পমত্তো ৱিহৰন্তো, ব্ৰহ্মং ভাৱেত্ৱ ভাৱনং;

অভিঞ্ঞাপাৰমিং গন্ত্ৱা, ব্ৰহ্মলোকমগচ্ছহং.

১৮. উত্তৰং নাম নগৰং, উত্তৰো নাম খত্তিযো;

উত্তৰা নাম জনিকা, মঙ্গলস্স মহেসিনো.

১৯. নৱৱস্সসহস্সানি, অগাৰং অজ্ঝ সো ৱসি;

যসৱা সুচিমা সিৰীমা, তযো পাসাদমুত্তমা.

২০. সমতিংসসহস্সানি, নাৰিযো সমলঙ্কতা;

যসৱতী নাম নাৰী, সীৱলো নাম অত্ৰজো.

২১. নিমিত্তে চতুৰো দিস্ৱা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

২২. ব্ৰহ্মুনা যাচিতো সন্তো, মঙ্গলো নাম নাযকো;

ৱত্তি চক্কং মহাৱীৰো, ৱনে সিৰীৱৰুত্তমে.

২৩. সুদেৱো ধম্মসেনো চ, অহেসুং অগ্গসাৱকা;

পালিতো নামুপট্ঠাকো, মঙ্গলস্স মহেসিনো.

২৪. সীৱলা চ অসোকা চ, অহেসুং অগ্গসাৱিকা;

বোধি তস্স ভগৱতো, নাগৰুক্খোতি ৱুচ্চতি.

২৫. নন্দো চেৱ ৱিসাখো চ, অহেসুং অগ্গুপট্ঠকা;

অনুলা চেৱ সুতনা চ, অহেসুং অগ্গুপট্ঠিকা.

২৬. অট্ঠাসীতি ৰতনানি, অচ্চুগ্গতো মহামুনি;

ততো নিদ্ধাৱতী ৰংসী, অনেকসতসহস্সিযো.

২৭. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৮. যথাপি সাগৰে ঊমী, ন সক্কা তা গণেতুযে;

তথেৱ সাৱকা তস্স, ন সক্কা তে গণেতুযে.

২৯. যাৱ অট্ঠাসি সম্বুদ্ধো, মঙ্গলো লোকনাযকো;

ন তস্স সাসনে অত্থি, সকিলেসমৰণং [সংকিলেসমৰণং (সী.)] তদা.

৩০. ধম্মোক্কং ধাৰযিত্ৱান, সন্তাৰেত্ৱা মহাজনং;

জলিত্ৱা ধূমকেতূৱ, নিব্বুতো সো মহাযসো.

৩১. সঙ্খাৰানং সভাৱত্থং, দস্সযিত্ৱা সদেৱকে;

জলিত্ৱা অগ্গিক্খন্ধোৱ, সূৰিযো অত্থঙ্গতো যথা.

৩২. উয্যানে ৱস্সৰে নাম, বুদ্ধো নিব্বাযি মঙ্গলো;

তত্থেৱস্স জিনথূপো, তিংসযোজনমুগ্গতোতি.

মঙ্গলস্স ভগৱতো ৱংসো ততিযো.