৩. দীপঙ্কৰবুদ্ধৱংসো

১. তদা তে ভোজযিত্ৱান, সসঙ্ঘং লোকনাযকং;

উপগচ্ছুং সৰণং তস্স, দীপঙ্কৰস্স সত্থুনো.

২. সৰণাগমনে কঞ্চি, নিৱেসেসি তথাগতো;

কঞ্চি পঞ্চসু সীলেসু, সীলে দসৱিধে পৰং.

৩. কস্সচি দেতি সামঞ্ঞং, চতুৰো ফলমুত্তমে;

কস্সচি অসমে ধম্মে, দেতি সো পটিসম্ভিদা.

৪. কস্সচি ৱৰসমাপত্তিযো, অট্ঠ দেতি নৰাসভো;

তিস্সো কস্সচি ৱিজ্জাযো, ছড়ভিঞ্ঞা পৱেচ্ছতি.

৫. তেন যোগেন জনকাযং, ওৱদতি মহামুনি;

তেন ৱিত্থাৰিকং আসি, লোকনাথস্স সাসনং.

৬. মহাহনুসভক্খন্ধো, দীপঙ্কৰস্স নামকো;

বহূ জনে তাৰযতি, পৰিমোচেতি দুগ্গতিং.

৭. বোধনেয্যং জনং দিস্ৱা, সতসহস্সেপি যোজনে;

খণেন উপগন্ত্ৱান, বোধেতি তং মহামুনি.

৮. পঠমাভিসমযে বুদ্ধো, কোটিসতমবোধযি;

দুতিযাভিসমযে নাথো, নৱুতিকোটিমবোধযি.

৯. যদা চ দেৱভৱনম্হি, বুদ্ধো ধম্মমদেসযি;

নৱুতিকোটিসহস্সানং, ততিযাভিসমযো অহু.

১০. সন্নিপাতা তযো আসুং, দীপঙ্কৰস্স সত্থুনো;

কোটিসতসহস্সানং, পঠমো আসি সমাগমো.

১১. পুন নাৰদকূটম্হি, পৱিৱেকগতে জিনে;

খীণাসৱা ৱীতমলা, সমিংসু সতকোটিযো.

১২. যম্হি কালে মহাৱীৰো, সুদস্সনসিলুচ্চযে;

নৱকোটিসহস্সেহি, পৱাৰেসি মহামুনি.

১৩. দসৱীসসহস্সানং, ধম্মাভিসমযো অহু;

একদ্ৱিন্নং অভিসমযা, গণনাতো অসঙ্খিযা.

১৪. ৱিত্থাৰিকং বাহুজঞ্ঞং, ইদ্ধং ফীতং অহূ তদা;

দীপঙ্কৰস্স ভগৱতো, সাসনং সুৱিসোধিতং.

১৫. চত্তাৰি সতসহস্সানি, ছড়ভিঞ্ঞা মহিদ্ধিকা;

দীপঙ্কৰং লোকৱিদুং, পৰিৱাৰেন্তি সব্বদা.

১৬. যে কেচি তেন সমযেন, জহন্তি মানুসং ভৱং;

অপত্তমানসা সেখা, গৰহিতা ভৱন্তি তে.

১৭. সুপুপ্ফিতং পাৱচনং, অৰহন্তেহি তাদিহি;

খীণাসৱেহি ৱিমলেহি, উপসোভতি সব্বদা.

১৮. নগৰং ৰম্মৱতী নাম, সুদেৱো নাম খত্তিযো;

সুমেধা নাম জনিকা, দীপঙ্কৰস্স সত্থুনো.

১৯. দসৱস্সসহস্সানি, অগাৰং অজ্ঝ সো ৱসি [অজ্ঝাৱসী জিনো (স্যা. ক.)];

হংসা কোঞ্চা মযূৰা চ, তযো পাসাদমুত্তমা.

২০. তীণিসতসহস্সানি, নাৰিযো সমলঙ্কতা;

পদুমা নাম সা নাৰী, উসভক্খন্ধো অত্ৰজো.

২১. নিমিত্তে চতুৰো দিস্ৱা, হত্থিযানেন নিক্খমি;

অনূনদসমাসানি, পধানে পদহী জিনো.

২২. পধানচাৰং চৰিত্ৱান, অবুজ্ঝি মানসং মুনি;

ব্ৰহ্মুনা যাচিতো সন্তো, দীপঙ্কৰো মহামুনি.

২৩. ৱত্তি চক্কং মহাৱীৰো, নন্দাৰামে সিৰীঘৰে [সিৰীধৰে (সী.)];

নিসিন্নো সিৰীসমূলম্হি, অকা তিত্থিযমদ্দনং.

২৪. সুমঙ্গলো চ তিস্সো চ, অহেসুং অগ্গসাৱকা;

সাগতো [সোভিতো (ক.)] নামুপট্ঠাকো, দীপঙ্কৰস্স সত্থুনো.

২৫. নন্দা চেৱ সুনন্দা চ, অহেসুং অগ্গসাৱিকা;

বোধি তস্স ভগৱতো, পিপ্ফলীতি পৱুচ্চতি.

২৬. তপুস্সভল্লিকা [তপস্সুভল্লিকা (সী.)] নাম, অহেসুং অগ্গুপট্ঠকা;

সিৰিমা কোণা উপট্ঠিকা, দীপঙ্কৰস্স সত্থুনো.

২৭. অসীতিহত্থমুব্বেধো, দীপঙ্কৰো মহামুনি;

সোভতি দীপৰুক্খোৱ, সালৰাজাৱ ফুল্লিতো.

২৮. সতসহস্সৱস্সানি, আযু তস্স মহেসিনো;

তাৱতা তিট্ঠমানো সো, তাৰেসি জনতং বহুং.

২৯. জোতযিত্ৱান সদ্ধম্মং, সন্তাৰেত্ৱা মহাজনং;

জলিত্ৱা অগ্গিক্খন্ধোৱ, নিব্বুতো সো সসাৱকো.

৩০. সা চ ইদ্ধি সো চ যসো, তানি চ পাদেসু চক্কৰতনানি;

সব্বং তমন্তৰহিতং [সমন্তৰহিতং (সী. স্যা. ক.)], ননু ৰিত্তা সব্বসঙ্খাৰা [সব্বসঙ্খাৰাতি (সব্বত্থ)].

৩১. দীপঙ্কৰো জিনো সত্থা, নন্দাৰামম্হি নিব্বুতো;

তত্থেৱস্স জিনথূপো, ছত্তিংসুব্বেধযোজনোতি.

দীপঙ্কৰস্স ভগৱতো ৱংসো পঠমো.