২৯. ধাতুভাজনীযকথা

১. মহাগোতমো জিনৱৰো, কুসিনাৰম্হি নিব্বুতো;

ধাতুৱিত্থাৰিকং আসি, তেসু তেসু পদেসতো.

২. একো অজাতসত্তুস্স, একো ৱেসালিযা পুৰে;

একো কপিলৱত্থুস্মিং, একো চ অল্লকপ্পকে.

৩. একো চ ৰামগামম্হি, একো চ ৱেঠদীপকে;

একো পাৱেয্যকে মল্লে, একো চ কোসিনাৰকে.

৪. কুম্ভস্স থূপং কাৰেসি, ব্ৰাহ্মণো দোণসৱ্হযো;

অঙ্গাৰথূপং কাৰেসুং, মোৰিযা তুট্ঠমানসা.

৫. অট্ঠ সাৰীৰিকা থূপা, নৱমো কুম্ভচেতিযো;

অঙ্গাৰথূপো দসমো, তদাযেৱ পতিট্ঠিতো.

৬. উণ্হীসং চতস্সো দাঠা, অক্খকা দ্ৱে চ ধাতুযো;

অসম্ভিন্না ইমা সত্ত, সেসা ভিন্নাৱ ধাতুযো.

৭. মহন্তা মুগ্গমত্তা চ [মুগ্গমাসাৱ (ক.)], মজ্ঝিমা ভিন্নতণ্ডুলা;

খুদ্দকা সাসপমত্তা চ, নানাৱণ্ণা চ ধাতুযো.

৮. মহন্তা সুৱণ্ণৱণ্ণা চ, মুত্তৱণ্ণা চ মজ্ঝিমা;

খুদ্দকা মকুলৱণ্ণা চ, সোড়সদোণমত্তিকা.

৯. মহন্তা পঞ্চ নাড়িযো, নাড়িযো পঞ্চ মজ্ঝিমা;

খুদ্দকা ছ নাড়ী চেৱ, এতা সব্বাপি ধাতুযো.

১০. উণ্হীসং সীহড়ে দীপে, ব্ৰহ্মলোকে চ ৱামকং;

সীহড়ে দক্খিণক্খঞ্চ, সব্বাপেতা পতিট্ঠিতা.

১১. একা দাঠা তিদসপুৰে, একা নাগপুৰে অহু;

একা গন্ধাৰৱিসযে, একা কলিঙ্গৰাজিনো.

১২. চত্তালীসসমা দন্তা, কেসা লোমা চ সব্বসো;

দেৱা হৰিংসু একেকং, চক্কৱাড়পৰম্পৰা.

১৩. ৱজিৰাযং ভগৱতো, পত্তো দণ্ডঞ্চ চীৱৰং;

নিৱাসনং কুলঘৰে, পচ্চত্থৰণং কপিলৱ্হযে [সিলৱ্হযে (স্যা.)].

১৪. পাটলিপুত্তপুৰম্হি, কৰণং কাযবন্ধনং;

চম্পাযুদকসাটিযং, উণ্ণলোমঞ্চ কোসলে.

১৫. কাসাৱং ব্ৰহ্মলোকে চ, ৱেঠনং তিদসে পুৰে;

নিসীদনং অৱন্তীসু, ৰট্ঠে [দেৱৰট্ঠে (স্যা.)] অত্থৰণং তদা.

১৬. অৰণী চ মিথিলাযং, ৱিদেহে পৰিসাৱনং;

ৱাসি সূচিঘৰঞ্চাপি, ইন্দপত্থপুৰে তদা.

১৭. পৰিক্খাৰা অৱসেসা, জনপদে অপৰন্তকে;

পৰিভুত্তানি মুনিনা, অকংসু মনুজা তদা.

১৮. ধাতুৱিত্থাৰিকং আসি, গোতমস্স মহেসিনো;

পাণীনং অনুকম্পায, অহু পোৰাণিকং তদাতি.

ধাতুভাজনীযকথা নিট্ঠিতা.