২৮. বুদ্ধপকিণ্ণককণ্ডং

১. অপৰিমেয্যিতো কপ্পে, চতুৰো আসুং ৱিনাযকা;

তণ্হঙ্কৰো মেধঙ্কৰো, অথোপি সৰণঙ্কৰো;

দীপঙ্কৰো চ সম্বুদ্ধো, এককপ্পম্হি তে জিনা.

২. দীপঙ্কৰস্স অপৰেন, কোণ্ডঞ্ঞো নাম নাযকো;

একোৱ এককপ্পম্হি, তাৰেসি জনতং বহুং.

৩. দীপঙ্কৰস্স ভগৱতো, কোণ্ডঞ্ঞস্স চ সত্থুনো;

এতেসং অন্তৰা কপ্পা, গণনাতো অসঙ্খিযা.

৪. কোণ্ডঞ্ঞস্স অপৰেন, মঙ্গলো নাম নাযকো;

তেসম্পি অন্তৰা কপ্পা, গণনাতো অসঙ্খিযা.

৫. মঙ্গলো চ সুমনো চ, ৰেৱতো সোভিতো মুনি;

তেপি বুদ্ধা এককপ্পে, চক্খুমন্তো পভঙ্কৰা.

৬. সোভিতস্স অপৰেন, অনোমদস্সী মহাযসো;

তেসম্পি অন্তৰা কপ্পা, গণনাতো অসঙ্খিযা.

৭. অনোমদস্সী পদুমো, নাৰদো চাপি নাযকো;

তেপি বুদ্ধা এককপ্পে, তমন্তকাৰকা মুনী.

৮. নাৰদস্স অপৰেন, পদুমুত্তৰো নাম নাযকো;

এককপ্পম্হি উপ্পন্নো, তাৰেসি জনতং বহুং.

৯. নাৰদস্স ভগৱতো, পদুমুত্তৰস্স সত্থুনো;

তেসম্পি অন্তৰা কপ্পা, গণনাতো অসঙ্খিযা.

১০. কপ্পসতসহস্সম্হি, একো আসি মহামুনি;

পদুমুত্তৰো লোকৱিদূ, আহুতীনং পটিগ্গহো.

১১. তিংসকপ্পসহস্সম্হি, দুৱে আসুং ৱিনাযকা [আসিংসু নাযকা (স্যা. ক.)];

সুমেধো চ সুজাতো চ, ওৰতো পদুমুত্তৰা.

১২. অট্ঠাৰসে কপ্পসতে, তযো আসুং ৱিনাযকা [আসিংসু নাযকা (স্যা. ক.)];

পিযদস্সী অত্থদস্সী, ধম্মদস্সী চ নাযকা.

১৩. ওৰতো চ সুজাতস্স, সম্বুদ্ধা দ্ৱিপদুত্তমা;

এককপ্পম্হি তে বুদ্ধা, লোকে অপ্পটিপুগ্গলা.

১৪. চতুন্নৱুতিতো কপ্পে, একো আসি মহামুনি;

সিদ্ধত্থো সো লোকৱিদূ, সল্লকত্তো অনুত্তৰো.

১৫. দ্ৱেনৱুতে ইতো কপ্পে, দুৱে আসুং ৱিনাযকা;

তিস্সো ফুস্সো চ সম্বুদ্ধা, অসমা অপ্পটিপুগ্গলা.

১৬. একনৱুতিতো কপ্পে, ৱিপস্সী নাম নাযকো;

সোপি বুদ্ধো কাৰুণিকো, সত্তে মোচেসি বন্ধনা.

১৭. একতিংসে ইতো কপ্পে, দুৱে আসুং ৱিনাযকা;

সিখী চ ৱেস্সভূ চেৱ, অসমা অপ্পটিপুগ্গলা.

১৮. ইমম্হি ভদ্দকে কপ্পে, তযো আসুং ৱিনাযকা;

ককুসন্ধো কোণাগমনো, কস্সপো চাপি নাযকো.

১৯. অহমেতৰহি সম্বুদ্ধো, মেত্তেয্যো চাপি হেস্সতি;

এতেপিমে পঞ্চ বুদ্ধা, ধীৰা লোকানুকম্পকা.

২০. এতেসং ধম্মৰাজূনং, অঞ্ঞেসংনেককোটিনং;

আচিক্খিত্ৱান তং মগ্গং, নিব্বুতা তে সসাৱকাতি.

বুদ্ধপকিণ্ণককণ্ডং নিট্ঠিতং.