২৪. ককুসন্ধবুদ্ধৱংসো

১. ৱেস্সভুস্স অপৰেন, সম্বুদ্ধো দ্ৱিপদুত্তমো;

ককুসন্ধো নাম নামেন, অপ্পমেয্যো দুৰাসদো.

২. উগ্ঘাটেত্ৱা সব্বভৱং, চৰিযায পাৰমিং গতো;

সীহোৱ পঞ্জৰং ভেত্ৱা, পত্তো সম্বোধিমুত্তমং.

৩. ধম্মচক্কং পৱত্তেন্তে, ককুসন্ধে লোকনাযকে;

চত্তাৰীসকোটিসহস্সানং, ধম্মাভিসমযো অহু.

৪. অন্তলিক্খম্হি আকাসে, যমকং কত্ৱা ৱিকুব্বনং;

তিংসকোটিসহস্সানং, বোধেসি দেৱমানুসে.

৫. নৰদেৱস্স যক্খস্স, চতুসচ্চপ্পকাসনে;

ধম্মাভিসমযো তস্স, গণনাতো অসঙ্খিযো.

৬. ককুসন্ধস্স ভগৱতো, একো আসি সমাগমো;

খীণাসৱানং ৱিমলানং, সন্তচিত্তান তাদিনং.

৭. চত্তালীসসহস্সানং, তদা আসি সমাগমো;

দন্তভূমিমনুপ্পত্তানং, আসৱাৰিগণক্খযা.

৮. অহং তেন সমযেন, খেমো নামাসি খত্তিযো;

তথাগতে জিনপুত্তে, দানং দত্ৱা অনপ্পকং.

৯. পত্তঞ্চ চীৱৰং দত্ৱা, অঞ্জনং মধুলট্ঠিকং;

ইমেতং পত্থিতং সব্বং, পটিযাদেমি ৱৰং ৱৰং.

১০. সোপি মং বুদ্ধো ব্যাকাসি, ককুসন্ধো ৱিনাযকো;

‘‘ইমম্হি ভদ্দকে কপ্পে, অযং বুদ্ধো ভৱিস্সতি.

১১. ‘‘অহু কপিলৱ্হযা ৰম্মা…পে… হেস্সাম সম্মুখা ইমং’’.

১২. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৩. নগৰং খেমাৱতী নাম, খেমো নামাসহং তদা;

সব্বঞ্ঞুতং গৱেসন্তো, পব্বজিং তস্স সন্তিকে.

১৪. ব্ৰাহ্মণো অগ্গিদত্তো চ, আসি বুদ্ধস্স সো পিতা;

ৱিসাখা নাম জনিকা, ককুসন্ধস্স সত্থুনো.

১৫. ৱসতে তত্থ খেমে পুৰে, সম্বুদ্ধস্স মহাকুলং;

নৰানং পৱৰং সেট্ঠং, জাতিমন্তং মহাযসং.

১৬. চতুৱস্সসহস্সানি, অগাৰং অজ্ঝ সো ৱসি;

কাম -কামৱণ্ণ-কামসুদ্ধিনামা [সুচি সুৰুচি ৰতিৱদ্ধননামকা (সী.)], তযো পাসাদমুত্তমা.

১৭. সমতিংসসহস্সানি, নাৰিযো সমলঙ্কতা;

ৰোচিনী নাম সা নাৰী, উত্তৰো নাম অত্ৰজো.

১৮. নিমিত্তে চতুৰো দিস্ৱা, ৰথযানেন নিক্খমি;

অনূনঅট্ঠমাসানি, পধানং পদহী জিনো.

১৯. ব্ৰহ্মুনা যাচিতো সন্তো, ককুসন্ধো ৱিনাযকো;

ৱত্তি চক্কং মহাৱীৰো, মিগদাযে নৰুত্তমো.

২০. ৱিধুৰো চ সঞ্জীৱো চ, অহেসুং অগ্গসাৱকা;

বুদ্ধিজো নামুপট্ঠাকো, ককুসন্ধস্স সত্থুনো.

২১. সামা চ চম্পানামা চ, অহেসুং অগ্গসাৱিকা;

বোধি তস্স ভগৱতো, সিৰীসোতি পৱুচ্চতি.

২২. অচ্চুতো চ সুমনো চ, অহেসুং অগ্গুপট্ঠকা;

নন্দা চেৱ সুনন্দা চ, অহেসুং অগ্গুপট্ঠিকা.

২৩. চত্তালীসৰতনানি, অচ্চুগ্গতো মহামুনি;

কনকপ্পভা নিচ্ছৰতি, সমন্তা দসযোজনং.

২৪. চত্তালীসৱস্সসহস্সানি, আযু তস্স মহেসিনো;

তাৱতা তিট্ঠমানো সো, তাৰেসি জনতং বহুং.

২৫. ধম্মাপণং পসাৰেত্ৱা, নৰনাৰীনং সদেৱকে;

নদিত্ৱা সীহনাদংৱ, নিব্বুতো সো সসাৱকো.

২৬. অট্ঠঙ্গৱচনসম্পন্নো, অচ্ছিদ্দানি নিৰন্তৰং;

সব্বং তমন্তৰহিতং, ননু ৰিত্তা সব্বসঙ্খাৰা.

২৭. ককুসন্ধো জিনৱৰো, খেমাৰামম্হি নিব্বুতো;

তত্থেৱস্স থূপৱৰো, গাৱুতং নভমুগ্গতোতি.

ককুসন্ধস্স ভগৱতো ৱংসো দ্ৱাৱীসতিমো.