২৫. কোণাগমনবুদ্ধৱংসো

১. ককুসন্ধস্স অপৰেন, সম্বুদ্ধো দ্ৱিপদুত্তমো;

কোণাগমনো নাম জিনো, লোকজেট্ঠো নৰাসভো.

২. দসধম্মে পূৰযিত্ৱান, কন্তাৰং সমতিক্কমি;

পৱাহিয মলং সব্বং, পত্তো সম্বোধিমুত্তমং.

৩. ধম্মচক্কং পৱত্তেন্তে, কোণাগমননাযকে;

তিংসকোটিসহস্সানং, পঠমাভিসমযো অহু.

৪. পাটিহীৰং কৰোন্তে চ, পৰৱাদপ্পমদ্দনে;

ৱীসতিকোটিসহস্সানং, দুতিযাভিসমযো অহু.

৫. ততো ৱিকুব্বনং কত্ৱা, জিনো দেৱপুৰং গতো;

ৱসতে তত্থ সম্বুদ্ধো, সিলায পণ্ডুকম্বলে.

৬. পকৰণে সত্ত দেসেন্তো, ৱস্সং ৱসতি সো মুনি;

দসকোটিসহস্সানং, ততিযাভিসমযো অহু.

৭. তস্সাপি দেৱদেৱস্স, একো আসি সমাগমো;

খীণাসৱানং ৱিমলানং, সন্তচিত্তান তাদিনং.

৮. তিংসভিক্খুসহস্সানং, তদা আসি সমাগমো;

ওঘানমতিক্কন্তানং, ভিজ্জিতানঞ্চ মচ্চুযা.

৯. অহং তেন সমযেন, পব্বতো নাম খত্তিযো;

মিত্তামচ্চেহি সম্পন্নো, অনন্তবলৱাহনো.

১০. সম্বুদ্ধদস্সনং গন্ত্ৱা, সুত্ৱা ধম্মমনুত্তৰং;

নিমন্তেত্ৱা সজিনসঙ্ঘং, দানং দত্ৱা যদিচ্ছকং.

১১. পট্টুণ্ণং চীনপট্টঞ্চ, কোসেয্যং কম্বলম্পি চ;

সোৱণ্ণপাদুকঞ্চেৱ, অদাসিং সত্থুসাৱকে.

১২. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘ইমম্হি ভদ্দকে কপ্পে, অযং বুদ্ধো ভৱিস্সতি.

১৩. ‘‘অহু কপিলৱ্হযা ৰম্মা…পে… হেস্সাম সম্মুখা ইমং’’.

১৪. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৫. সব্বঞ্ঞুতং গৱেসন্তো, দানং দত্ৱা নৰুত্তমে;

ওহাযাহং মহাৰজ্জং, পব্বজিং জিনসন্তিকে [তস্স সন্তিকে (সী.)].

১৬. নগৰং সোভৱতী নাম, সোভো নামাসি খত্তিযো;

ৱসতে তত্থ নগৰে, সম্বুদ্ধস্স মহাকুলং.

১৭. ব্ৰাহ্মণো যঞ্ঞদত্তো চ, আসি বুদ্ধস্স সো পিতা;

উত্তৰা নাম জনিকা, কোণাগমনস্স সত্থুনো.

১৮. তীণি ৱস্সসহস্সানি, অগাৰং অজ্ঝ সো ৱসি;

তুসিতসন্তুসিতসন্তুট্ঠা, তযো পাসাদমুত্তমা.

১৯. অনূনসোড়সসহস্সানি, নাৰিযো সমলঙ্কতা;

ৰুচিগত্তা নাম নাৰী, সত্থৱাহো নাম অত্ৰজো.

২০. নিমিত্তে চতুৰো দিস্ৱা, হত্থিযানেন নিক্খমি;

ছমাসং পধানচাৰং, অচৰী পুৰিসুত্তমো.

২১. ব্ৰহ্মুনা যাচিতো সন্তো, কোণাগমননাযকো;

ৱত্তি চক্কং মহাৱীৰো, মিগদাযে নৰুত্তমো.

২২. ভিয্যসো উত্তৰো নাম, অহেসুং অগ্গসাৱকা;

সোত্থিজো নামুপট্ঠাকো, কোণাগমনস্স সত্থুনো.

২৩. সমুদ্দা উত্তৰা চেৱ, অহেসুং অগ্গসাৱিকা;

বোধি তস্স ভগৱতো, উদুম্বৰোতি পৱুচ্চতি.

২৪. উগ্গো চ সোমদেৱো চ, অহেসুং অগ্গুপট্ঠকা;

সীৱলা চেৱ সামা চ, অহেসুং অগ্গুপট্ঠিকা.

২৫. উচ্চত্তনেন সো বুদ্ধো, তিংসহত্থসমুগ্গতো;

উক্কামুখে যথা কম্বু, এৱং ৰংসীহি মণ্ডিতো.

২৬. তিংসৱস্সসহস্সানি, আযু বুদ্ধস্স তাৱদে;

তাৱতা তিট্ঠমানো সো, তাৰেসি জনতং বহুং.

২৭. ধম্মচেতিং সমুস্সেত্ৱা, ধম্মদুস্সৱিভূসিতং;

ধম্মপুপ্ফগুড়ং কত্ৱা, নিব্বুতো সো সসাৱকো.

২৮. মহাৱিলাসো তস্স জনো, সিৰিধম্মপ্পকাসনো;

সব্বং তমন্তৰহিতং, ননু ৰিত্তা সব্বসঙ্খাৰা.

২৯. কোণাগমনো সম্বুদ্ধো, পব্বতাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

কোণাগমনস্স ভগৱতো ৱংসো তেৱীসতিমো.