২৩. ৱেস্সভূবুদ্ধৱংসো

১. তত্থেৱ মণ্ডকপ্পম্হি, অসমো অপ্পটিপুগ্গলো;

ৱেস্সভূ নাম নামেন, লোকে উপ্পজ্জি নাযকো [সো জিনো (স্যা. কং. ক.)].

২. আদিত্তং ৱত ৰাগগ্গি, তণ্হানং ৱিজিতং তদা;

নাগোৱ বন্ধনং ছেত্ৱা, পত্তো সম্বোধিমুত্তমং.

৩. ধম্মচক্কং পৱত্তেন্তে, ৱেস্সভূলোকনাযকে;

অসীতিকোটিসহস্সানং, পঠমাভিসমযো অহু.

৪. পক্কন্তে চাৰিকং ৰট্ঠে, লোকজেট্ঠে নৰাসভে;

সত্ততিকোটিসহস্সানং, দুতিযাভিসমযো অহু.

৫. মহাদিট্ঠিং ৱিনোদেন্তো, পাটিহেৰং কৰোতি সো;

সমাগতা নৰমৰূ, দসসহস্সী সদেৱকে.

৬. মহাঅচ্ছৰিযং দিস্ৱা, অব্ভুতং লোমহংসনং;

দেৱা চেৱ মনুস্সা চ, বুজ্ঝৰে সট্ঠিকোটিযো.

৭. সন্নিপাতা তযো আসুং, ৱেস্সভুস্স মহেসিনো;

খীণাসৱানং ৱিমলানং, সন্তচিত্তান তাদিনং.

৮. অসীতিভিক্খুসহস্সানং, পঠমো আসি সমাগমো;

সত্ততিভিক্খুসহস্সানং, দুতিযো আসি সমাগমো.

৯. সট্ঠিভিক্খুসহস্সানং, ততিযো আসি সমাগমো;

জৰাদিভযভীতানং, ওৰসানং মহেসিনো.

১০. অহং তেন সমযেন, সুদস্সনো নাম খত্তিযো;

নিমন্তেত্ৱা মহাৱীৰং, দানং দত্ৱা মহাৰহং;

অন্নপানেন ৱত্থেন, সসঙ্ঘং জিন পূজযিং.

১১. তস্স বুদ্ধস্স অসমস্স, চক্কং ৱত্তিতমুত্তমং;

সুত্ৱান পণিতং ধম্মং, পব্বজ্জমভিৰোচযিং.

১২. মহাদানং পৱত্তেত্ৱা, ৰত্তিন্দিৱমতন্দিতো;

পব্বজ্জং গুণসম্পন্নং, পব্বজিং জিনসন্তিকে.

১৩. আচাৰগুণসম্পন্নো, ৱত্তসীলসমাহিতো;

সব্বঞ্ঞুতং গৱেসন্তো, ৰমামি জিনসাসনে.

১৪. সদ্ধাপীতিং উপগন্ত্ৱা, বুদ্ধং ৱন্দামি সত্থৰং;

পীতি উপ্পজ্জতি ময্হং, বোধিযাযেৱ কাৰণা.

১৫. অনিৱত্তমানসং ঞত্ৱা, সম্বুদ্ধো এতদব্ৰৱি;

‘‘একতিংসে ইতো কপ্পে, অযং বুদ্ধো ভৱিস্সতি.

১৬. ‘‘অহু কপিলৱ্হযা ৰম্মা…পে… হেস্সাম সম্মুখা ইমং’’.

১৭. তস্সাহং ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৮. অনোমং নাম নগৰং, সুপ্পতীতো নাম খত্তিযো;

মাতা যসৱতী নাম, ৱেস্সভুস্স মহেসিনো.

১৯. ছ চ ৱস্সসহস্সানি, অগাৰং অজ্ঝ সো ৱসি;

ৰুচি সুৰুচি ৰতিৱড্ঢনো, তযো পাসাদমুত্তমা.

২০. অনূনতিংসসহস্সানি, নাৰিযো সমলঙ্কতা;

সুচিত্তা নাম সা নাৰী, সুপ্পবুদ্ধো নাম অত্ৰজো.

২১. নিমিত্তে চতুৰো দিস্ৱা, সিৱিকাযাভিনিক্খমি;

ছমাসং পধানচাৰং, অচৰী পুৰিসুত্তমো.

২২. ব্ৰহ্মুনা যাচিতো সন্তো, ৱেস্সভূলোকনাযকো;

ৱত্তি চক্কং মহাৱীৰো, অৰুণাৰামে নৰুত্তমো.

২৩. সোণো চ উত্তৰো চেৱ, অহেসুং অগ্গসাৱকা;

উপসন্তো নামুপট্ঠাকো, ৱেস্সভুস্স মহেসিনো.

২৪. ৰামা [দামা (সী.)] চেৱ সমালা চ, অহেসুং অগ্গসাৱিকা;

বোধি তস্স ভগৱতো, মহাসালোতি ৱুচ্চতি.

২৫. সোত্থিকো চেৱ ৰম্ভো চ, অহেসুং অগ্গুপট্ঠকা;

গোতমী সিৰিমা চেৱ, অহেসুং অগ্গুপট্ঠিকা.

২৬. সট্ঠিৰতনমুব্বেধো, হেমযূপসমূপমো;

কাযা নিচ্ছৰতি ৰস্মি, ৰত্তিংৱ পব্বতে সিখী.

২৭. সট্ঠিৱস্সসহস্সানি, আযু তস্স মহেসিনো;

তাৱতা তিট্ঠমানো সো, তাৰেসি জনতং বহুং.

২৮. ধম্মং ৱিত্থাৰিকং কত্ৱা, ৱিভজিত্ৱা মহাজনং;

ধম্মনাৱং ঠপেত্ৱান, নিব্বুতো সো সসাৱকো.

২৯. দস্সনেয্যং সব্বজনং, ৱিহাৰং ইৰিযাপথং;

সব্বং তমন্তৰহিতং, ননু ৰিত্তা সব্বসঙ্খাৰা.

৩০. ৱেস্সভূ জিনৱৰো সত্থা, খেমাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

ৱেস্সভুস্স ভগৱতো ৱংসো একৱীসতিমো.