২২. সিখীবুদ্ধৱংসো

১. ৱিপস্সিস্স অপৰেন, সম্বুদ্ধো দ্ৱিপদুত্তমো;

সিখিৱ্হযো আসি জিনো, অসমো অপ্পটিপুগ্গলো.

২. মাৰসেনং পমদ্দিত্ৱা, পত্তো সম্বোধিমুত্তমং;

ধম্মচক্কং পৱত্তেসি, অনুকম্পায পাণিনং.

৩. ধম্মচক্কং পৱত্তেন্তে, সিখিম্হি জিনপুঙ্গৱে [মুনিপুঙ্গৱে (সী.)];

কোটিসতসহস্সানং, পঠমাভিসমযো অহু.

৪. অপৰম্পি ধম্মং দেসেন্তে, গণসেট্ঠে নৰুত্তমে;

নৱুতিকোটিসহস্সানং, দুতিযাভিসমযো অহু.

৫. যমকপাটিহাৰিযঞ্চ [যমকং পাটিহীৰঞ্চ (সী.)], দস্সযন্তে সদেৱকে;

অসীতিকোটিসহস্সানং, ততিযাভিসমযো অহু.

৬. সন্নিপাতা তযো আসুং, সিখিস্সাপি মহেসিনো;

খীণাসৱানং ৱিমলানং, সন্তচিত্তান তাদিনং.

৭. ভিক্খুসতসহস্সানং, পঠমো আসি সমাগমো;

অসীতিভিক্খুসহস্সানং, দুতিযো আসি সমাগমো.

৮. সত্ততিভিক্খুসহস্সানং, ততিযো আসি সমাগমো;

অনুপলিত্তো পদুমংৱ, তোযম্হি সম্পৱড্ঢিতং.

৯. অহং তেন সমযেন, অৰিন্দমো নাম খত্তিযো;

সম্বুদ্ধপ্পমুখং সঙ্ঘং, অন্নপানেন তপ্পযিং.

১০. বহুং দুস্সৱৰং দত্ৱা, দুস্সকোটিং অনপ্পকং;

অলঙ্কতং হত্থিযানং, সম্বুদ্ধস্স অদাসহং.

১১. হত্থিযানং নিম্মিনিত্ৱা, কপ্পিযং উপনামযিং;

পূৰযিং মানসং ময্হং, নিচ্চং দড়্হমুপট্ঠিতং.

১২. সোপি মং বুদ্ধো ব্যাকাসি, সিখী লোকগ্গনাযকো;

‘‘একতিংসে ইতো কপ্পে, অযং বুদ্ধো ভৱিস্সতি.

১৩. ‘‘অহু কপিলৱ্হযা ৰম্মা…পে… হেস্সাম সম্মুখা ইমং’’.

১৪. তস্সাহং ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৫. নগৰং অৰুণৱতী নাম, অৰুণো নাম খত্তিযো;

পভাৱতী নাম জনিকা, সিখিস্সাপি মহেসিনো.

১৬. সত্তৱস্সসহস্সানি, অগাৰং অজ্ঝ সো ৱসি;

সুচন্দকো গিৰি ৱসভো [সুচন্দো গিৰিৱহনো (সী.)], তযো পাসাদমুত্তমা.

১৭. চতুৱীসসহস্সানি, নাৰিযো সমলঙ্কতা;

সব্বকামা নাম নাৰী, অতুলো নাম অত্ৰজো.

১৮. নিমিত্তে চতুৰো দিস্ৱা, হত্থিযানেন নিক্খমি;

অট্ঠমাসং পধানচাৰং, অচৰী পুৰিসুত্তমো.

১৯. ব্ৰহ্মুনা যাচিতো সন্তো, সিখী লোকগ্গনাযকো;

ৱত্তি চক্কং মহাৱীৰো, মিগদাযে নৰুত্তমো.

২০. অভিভূ সম্ভৱো চেৱ, অহেসুং অগ্গসাৱকা;

খেমঙ্কৰো নামুপট্ঠাকো, সিখিস্সাপি মহেসিনো.

২১. সখিলা চ পদুমা চ, অহেসুং অগ্গসাৱিকা;

বোধি তস্স ভগৱতো, পুণ্ডৰীকোতি ৱুচ্চতি.

২২. সিৰিৱড্ঢো চ নন্দো চ, অহেসুং অগ্গুপট্ঠকা;

চিত্তা চেৱ সুগুত্তা চ, অহেসুং অগ্গুপট্ঠিকা.

২৩. উচ্চত্তনেন সো বুদ্ধো, সত্ততিহত্থমুগ্গতো;

কঞ্চনগ্ঘিযসঙ্কাসো, দ্ৱত্তিংসৱৰলক্খণো.

২৪. তস্সাপি ব্যামপ্পভা কাযা, দিৱাৰত্তিং নিৰন্তৰং;

দিসোদিসং নিচ্ছৰন্তি, তীণিযোজনসো পভা.

২৫. সত্ততিৱস্সসহস্সানি, আযু তস্স মহেসিনো;

তাৱতা তিট্ঠমানো সো, তাৰেসি জনতং বহুং.

২৬. ধম্মমেঘং পৱস্সেত্ৱা, তেমযিত্ৱা সদেৱকে;

খেমন্তং পাপযিত্ৱান, নিব্বুতো সো সসাৱকো.

২৭. অনুব্যঞ্জনসম্পন্নং, দ্ৱত্তিংসৱৰলক্খণং;

সব্বং তমন্তৰহিতং, ননু ৰিত্তা সব্বসঙ্খাৰা.

২৮. সিখী মুনিৱৰো বুদ্ধো, অস্সাৰামম্হি নিব্বুতো;

তত্থেৱস্স থূপৱৰো, তীণিযোজনমুগ্গতোতি.

সিখিস্স ভগৱতো ৱংসো ৱীসতিমো.