২১. ৱিপস্সীবুদ্ধৱংসো

১. ফুস্সস্স চ অপৰেন, সম্বুদ্ধো দ্ৱিপদুত্তমো;

ৱিপস্সী নাম নামেন, লোকে উপ্পজ্জি চক্খুমা.

২. অৱিজ্জং সব্বং পদালেত্ৱা, পত্তো সম্বোধিমুত্তমং;

ধম্মচক্কং পৱত্তেতুং, পক্কামি বন্ধুমতীপুৰং.

৩. ধম্মচক্কং পৱত্তেত্ৱা, উভো বোধেসি নাযকো;

গণনায ন ৱত্তব্বো, পঠমাভিসমযো অহু.

৪. পুনাপৰং অমিতযসো, তত্থ সচ্চং পকাসযি;

চতুৰাসীতিসহস্সানং, দুতিযাভিসমযো অহু.

৫. চতুৰাসীতিসহস্সানি, সম্বুদ্ধং অনুপব্বজুং;

তেসমাৰামপত্তানং, ধম্মং দেসেসি চক্খুমা.

৬. সব্বাকাৰেন ভাসতো, সুত্ৱা উপনিসাদিনো [উপনিস্সা জিনো (স্যা. কং.)];

তেপি ধম্মৱৰং গন্ত্ৱা, ততিযাভিসমযো অহু.

৭. সন্নিপাতা তযো আসুং, ৱিপস্সিস্স মহেসিনো;

খীণাসৱানং ৱিমলানং, সন্তচিত্তান তাদিনং.

৮. অট্ঠসট্ঠিসতসহস্সানং, পঠমো আসি সমাগমো;

ভিক্খুসতসহস্সানং, দুতিযো আসি সমাগমো.

৯. অসীতিভিক্খুসহস্সানং, ততিযো আসি সমাগমো;

তত্থ ভিক্খুগণমজ্ঝে, সম্বুদ্ধো অতিৰোচতি.

১০. অহং তেন সমযেন, নাগৰাজা মহিদ্ধিকো;

অতুলো নাম নামেন, পুঞ্ঞৱন্তো জুতিন্ধৰো.

১১. নেকানং নাগকোটীনং, পৰিৱাৰেত্ৱানহং তদা;

ৱজ্জন্তো দিব্বতুৰিযেহি, লোকজেট্ঠং উপাগমিং.

১২. উপসঙ্কমিত্ৱা সম্বুদ্ধং, ৱিপস্সিং লোকনাযকং;

মণিমুত্তৰতনখচিতং, সব্বাভৰণৱিভূসিতং;

নিমন্তেত্ৱা ধম্মৰাজস্স, সুৱণ্ণপীঠমদাসহং.

১৩. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘একনৱুতিতো কপ্পে, অযং বুদ্ধো ভৱিস্সতি.

১৪. ‘‘অহু কপিলৱ্হযা ৰম্মা, নিক্খমিত্ৱা তথাগতো;

পধানং পদহিত্ৱান, কত্ৱা দুক্কৰকাৰিকং.

১৫. ‘‘অজপালৰুক্খমূলস্মিং, নিসীদিত্ৱা তথাগতো;

তত্থ পাযাসং পগ্গয্হ, নেৰঞ্জৰমুপেহিতি.

১৬. ‘‘নেৰঞ্জৰায তীৰম্হি, পাযাসং অদ সো জিনো;

পটিযত্তৱৰমগ্গেন, বোধিমূলমুপেহিতি.

১৭. ‘‘ততো পদক্খিণং কত্ৱা, বোধিমণ্ডং অনুত্তৰো;

অস্সত্থমূলে সম্বোধিং, বুজ্ঝিস্সতি মহাযসো.

১৮. ‘‘ইমস্স জনিকা মাতা, মাযা নাম ভৱিস্সতি;

পিতা সুদ্ধোদনো নাম, অযং হেস্সতি গোতমো.

১৯. ‘‘অনাসৱা ৱীতৰাগা, সন্তচিত্তা সমাহিতা;

কোলিতো উপতিস্সো চ, অগ্গা হেস্সন্তি সাৱকা;

আনন্দো নামুপট্ঠাকো, উপট্ঠিস্সতিমং জিনং.

২০. ‘‘খেমা উপ্পলৱণ্ণা চ, অগ্গা হেস্সন্তি সাৱিকা;

অনাসৱা ৱীতৰাগা, সন্তচিত্তা সমাহিতা;

বোধি তস্স ভগৱতো, অস্সত্থোতি পৱুচ্চতি.

২১. ‘‘চিত্তো চ হত্থাড়ৱকো, অগ্গা হেস্সন্তুপট্ঠকা;

নন্দমাতা চ উত্তৰা, অগ্গা হেস্সন্তুপট্ঠিকা;

আযু ৱস্সসতং তস্স, গোতমস্স যসস্সিনো.

২২. ‘‘ইদং সুত্ৱান ৱচনং…পে… হেস্সাম সম্মুখা ইমং’’.

২৩. তস্সাহং ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

২৪. নগৰং বন্ধুমতী নাম, বন্ধুমা নাম খত্তিযো;

মাতা বন্ধুমতী নাম, ৱিপস্সিস্স মহেসিনো.

২৫. অট্ঠৱস্সসহস্সানি, অগাৰং অজ্ঝ সো ৱসি;

নন্দো সুনন্দো সিৰিমা, তযো পাসাদমুত্তমা.

২৬. তিচত্তাৰীসসহস্সানি, নাৰিযো সমলঙ্কতা;

সুদস্সনা নাম সা নাৰী, সমৱত্তক্খন্ধো নাম অত্ৰজো.

২৭. নিমিত্তে চতুৰো দিস্ৱা, ৰথযানেন নিক্খমি;

অনূনঅট্ঠমাসানি, পধানং পদহী জিনো.

২৮. ব্ৰহ্মুনা যাচিতো সন্তো, ৱিপস্সী লোকনাযকো;

ৱত্তি চক্কং মহাৱীৰো, মিগদাযে নৰুত্তমো.

২৯. খণ্ডো চ তিস্সনামো চ, অহেসুং অগ্গসাৱকা;

অসোকো নামুপট্ঠাকো, ৱিপস্সিস্স মহেসিনো.

৩০. চন্দা চ চন্দমিত্তা চ, অহেসুং অগ্গসাৱিকা;

বোধি তস্স ভগৱতো, পাটলীতি পৱুচ্চতি.

৩১. পুনব্বসুমিত্তো নাগো চ, অহেসুং অগ্গুপট্ঠকা;

সিৰিমা উত্তৰা চেৱ, অহেসুং অগ্গুপট্ঠিকা.

৩২. অসীতিহত্থমুব্বেধো, ৱিপস্সী লোকনাযকো;

পভা নিদ্ধাৱতি তস্স, সমন্তা সত্তযোজনে.

৩৩. অসীতিৱস্সসহস্সানি, আযু বুদ্ধস্স তাৱদে;

তাৱতা তিট্ঠমানো সো, তাৰেসি জনতং বহুং.

৩৪. বহুদেৱমনুস্সানং, বন্ধনা পৰিমোচযি;

মগ্গামগ্গঞ্চ আচিক্খি, অৱসেসপুথুজ্জনে.

৩৫. আলোকং দস্সযিত্ৱান, দেসেত্ৱা অমতং পদং;

জলিত্ৱা অগ্গিক্খন্ধোৱ, নিব্বুতো সো সসাৱকো.

৩৬. ইদ্ধিৱৰং পুঞ্ঞৱৰং, লক্খণঞ্চ কুসুমিতং;

সব্বং তমন্তৰহিতং, ননু ৰিত্তা সব্বসঙ্খাৰা.

৩৭. ৱিপস্সী জিনৱৰো বুদ্ধো, সুমিত্তাৰামম্হি নিব্বুতো;

তত্থেৱস্স থূপৱৰো, সত্তযোজনমুস্সিতোতি.

ৱিপস্সিস্স ভগৱতো ৱংসো একূনৱীসতিমো.