২০. ফুস্সবুদ্ধৱংসো

১. তত্থেৱ মণ্ডকপ্পম্হি, অহু সত্থা অনুত্তৰো;

অনুপমো অসমসমো, ফুস্সো লোকগ্গনাযকো.

২. সোপি সব্বং তমং হন্ত্ৱা, ৱিজটেত্ৱা মহাজটং;

সদেৱকং তপ্পযন্তো, অভিৱস্সি অমতম্বুনা.

৩. ধম্মচক্কং পৱত্তেন্তে, ফুস্সে নক্খত্তমঙ্গলে;

কোটিসতসহস্সানং, পঠমাভিসমযো অহু.

৪. নৱুতিসতসহস্সানং, দুতিযাভিসমযো অহু;

অসীতিসতসহস্সানং, ততিযাভিসমযো অহু.

৫. সন্নিপাতা তযো আসুং, ফুস্সস্সাপি মহেসিনো;

খীণাসৱানং ৱিমলানং, সন্তচিত্তান তাদিনং.

৬. সট্ঠিসতসহস্সানং, পঠমো আসি সমাগমো;

পঞ্ঞাসসতসহস্সানং, দুতিযো আসি সমাগমো.

৭. চত্তাৰীসসতসহস্সানং, ততিযো আসি সমাগমো;

অনুপাদা ৱিমুত্তানং, ৱোচ্ছিন্নপটিসন্ধিনং.

৮. অহং তেন সমযেন, ৱিজিতাৱী নাম খত্তিযো;

ছড্ডযিত্ৱা মহাৰজ্জং, পব্বজিং তস্স সন্তিকে.

৯. সোপি মং বুদ্ধো ব্যাকাসি, ফুস্সো লোকগ্গনাযকো;

‘‘দ্ৱেনৱুতে ইতো কপ্পে, অযং বুদ্ধো ভৱিস্সতি.

১০. ‘‘পধানং পদহিত্ৱান…পে… হেস্সাম সম্মুখা ইমং’’.

১১. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১২. সুত্তন্তং ৱিনযঞ্চাপি, নৱঙ্গং সত্থুসাসনং;

সব্বং পৰিযাপুণিত্ৱা, সোভযিং জিনসাসনং.

১৩. তত্থপ্পমত্তো ৱিহৰন্তো, ব্ৰহ্মং ভাৱেত্ৱ ভাৱনং;

অভিঞ্ঞাসু পাৰমিং গন্ত্ৱা, ব্ৰহ্মলোকমগঞ্ছহং.

১৪. কাসিকং নাম নগৰং, জযসেনো নাম খত্তিযো;

সিৰিমা নাম জনিকা, ফুস্সস্সাপি মহেসিনো.

১৫. নৱৱস্সসহস্সানি, অগাৰং অজ্ঝ সো ৱসি;

গৰুড়পক্খ হংস সুৱণ্ণভাৰা, তযো পাসাদমুত্তমা.

১৬. তিংসইত্থিসহস্সানি, নাৰিযো সমলঙ্কতা;

কিসাগোতমী নাম নাৰী, অনূপমো নাম অত্ৰজো.

১৭. নিমিত্তে চতুৰো দিস্ৱা, হত্থিযানেন নিক্খমি;

ছমাসং পধানচাৰং, অচৰী পুৰিসুত্তমো.

১৮. ব্ৰহ্মুনা যাচিতো সন্তো, ফুস্সো লোকগ্গনাযকো;

ৱত্তি চক্কং মহাৱীৰো, মিগদাযে নৰুত্তমো.

১৯. সুৰক্খিতো ধম্মসেনো, অহেসুং অগ্গসাৱকা;

সভিযো নামুপট্ঠাকো, ফুস্সস্সাপি মহেসিনো.

২০. চালা চ উপচালা চ, অহেসুং অগ্গসাৱিকা;

বোধি তস্স ভগৱতো, আমণ্ডোতি পৱুচ্চতি.

২১. ধনঞ্চযো ৱিসাখো চ, অহেসুং অগ্গুপট্ঠকা;

পদুমা চেৱ নাগা চ, অহেসুং অগ্গুপট্ঠিকা.

২২. অট্ঠপণ্ণাসৰতনং, সোপি অচ্চুগ্গতো মুনি;

সোভতে সতৰংসীৱ, উড়ুৰাজাৱ পূৰিতো.

২৩. নৱুতিৱস্সসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৪. ওৱদিত্ৱা বহূ সত্তে, সন্তাৰেত্ৱা বহূ জনে;

সোপি সত্থা অতুলযসো, নিব্বুতো সো সসাৱকো.

২৫. ফুস্সো জিনৱৰো সত্থা, সেনাৰামম্হি নিব্বুতো;

ধাতুৱিত্থাৰিকং আসি, তেসু তেসু পদেসতোতি.

ফুস্সস্স ভগৱতো ৱংসো অট্ঠাৰসমো.