১৯. তিস্সবুদ্ধৱংসো

১. সিদ্ধত্থস্স অপৰেন, অসমো অপ্পটিপুগ্গলো;

অনন্ততেজো অমিতযসো, তিস্সো লোকগ্গনাযকো.

২. তমন্ধকাৰং ৱিধমিত্ৱা, ওভাসেত্ৱা সদেৱকং;

অনুকম্পকো মহাৱীৰো, লোকে উপ্পজ্জি চক্খুমা.

৩. তস্সাপি অতুলা ইদ্ধি, অতুলং সীলং সমাধি চ;

সব্বত্থ পাৰমিং গন্ত্ৱা, ধম্মচক্কং পৱত্তযি.

৪. সো বুদ্ধো দসসহস্সিম্হি, ৱিঞ্ঞাপেসি গিৰং সুচিং;

কোটিসতানি অভিসমিংসু, পঠমে ধম্মদেসনে.

৫. দুতিযো নৱুতিকোটীনং, ততিযো সট্ঠিকোটিযো;

বন্ধনাতো পমোচেসি, সত্তে [সম্পত্তে (ক.)] নৰমৰূ তদা.

৬. সন্নিপাতা তযো আসুং, তিস্সে লোকগ্গনাযকে;

খীণাসৱানং ৱিমলানং, সন্তচিত্তান তাদিনং.

৭. খীণাসৱসতসহস্সানং, পঠমো আসি সমাগমো;

নৱুতিসতসহস্সানং, দুতিযো আসি সমাগমো.

৮. অসীতিসতসহস্সানং, ততিযো আসি সমাগমো;

খীণাসৱানং ৱিমলানং, পুপ্ফিতানং ৱিমুত্তিযা.

৯. অহং তেন সমযেন, সুজাতো নাম খত্তিযো;

মহাভোগং ছড্ডযিত্ৱা, পব্বজিং ইসিপব্বজং.

১০. মযি পব্বজিতে সন্তে, উপ্পজ্জি লোকনাযকো;

বুদ্ধোতি সদ্দং সুত্ৱান, পীতি মে উপপজ্জথ.

১১. দিব্বং মন্দাৰৱং পুপ্ফং, পদুমং পাৰিছত্তকং;

উভো হত্থেহি পগ্গয্হ, ধুনমানো উপাগমিং.

১২. চতুৱণ্ণপৰিৱুতং, তিস্সং লোকগ্গনাযকং;

তমহং পুপ্ফং গহেত্ৱা, মত্থকে ধাৰযিং জিনং.

১৩. সোপি মং বুদ্ধো ব্যাকাসি, জনমজ্ঝে নিসীদিয;

‘‘দ্ৱেনৱুতে ইতো কপ্পে, অযং বুদ্ধো ভৱিস্সতি.

১৪. ‘‘পধানং পদহিত্ৱান…পে… হেস্সাম সম্মুখা ইমং’’.

১৫. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৬. খেমকং নাম নগৰং, জনসন্ধো নাম খত্তিযো;

পদুমা নাম জনিকা, তিস্সস্স চ মহেসিনো.

১৭. সত্তৱস্সসহস্সানি, অগাৰং অজ্ঝ সো ৱসি;

গুহাসেল নাৰিসয নিসভা [কুমুদো নাড়িযো পদুমো (ক.)], তযো পাসাদমুত্তমা.

১৮. সমতিংসসহস্সানি, নাৰিযো সমলঙ্কতা;

সুভদ্দানামিকা নাৰী, আনন্দো নাম অত্ৰজো.

১৯. নিমিত্তে চতুৰো দিস্ৱা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

২০. ব্ৰহ্মুনা যাচিতো সন্তো, তিস্সো লোকগ্গনাযকো;

ৱত্তি চক্কং মহাৱীৰো, যসৱতিযমুত্তমে.

২১. ব্ৰহ্মদেৱো উদযো চ, অহেসুং অগ্গসাৱকা;

সমঙ্গো নামুপট্ঠাকো, তিস্সস্স চ মহেসিনো.

২২. ফুস্সা চেৱ সুদত্তা চ, অহেসুং অগ্গসাৱিকা;

বোধি তস্স ভগৱতো, অসনোতি পৱুচ্চতি.

২৩. সম্বলো চ সিৰিমা চেৱ, অহেসুং অগ্গুপট্ঠকা;

কিসাগোতমী উপসেনা, অহেসুং অগ্গুপট্ঠিকা.

২৪. সো বুদ্ধো সট্ঠিৰতনো, অহু উচ্চত্তনে জিনো;

অনূপমো অসদিসো, হিমৱা ৱিয দিস্সতি.

২৫. তস্সাপি অতুলতেজস্স, আযু আসি অনুত্তৰো;

ৱস্সসতসহস্সানি, লোকে অট্ঠাসি চক্খুমা.

২৬. উত্তমং পৱৰং সেট্ঠং, অনুভোত্ৱা মহাযসং;

জলিত্ৱা অগ্গিক্খন্ধোৱ, নিব্বুতো সো সসাৱকো.

২৭. ৱলাহকোৱ অনিলেন, সূৰিযেন ৱিয উস্সৱো;

অন্ধকাৰোৱ পদীপেন, নিব্বুতো সো সসাৱকো.

২৮. তিস্সো জিনৱৰো বুদ্ধো, নন্দাৰামম্হি নিব্বুতো;

তত্থেৱস্স জিনথূপো, তীণিযোজনমুগ্গতোতি.

তিস্সস্স ভগৱতো ৱংসো সত্তৰসমো.