১৮. সিদ্ধত্থবুদ্ধৱংসো

১. ধম্মদস্সিস্স অপৰেন, সিদ্ধত্থো নাম নাযকো;

নিহনিত্ৱা তমং সব্বং, সূৰিযো অব্ভুগ্গতো যথা.

২. সোপি পত্ৱান সম্বোধিং, সন্তাৰেন্তো সদেৱকং;

অভিৱস্সি ধম্মমেঘেন, নিব্বাপেন্তো সদেৱকং.

৩. তস্সাপি অতুলতেজস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. পুনাপৰং ভীমৰথে [হিমৰট্ঠে (ক.)], যদা আহনি দুন্দুভিং;

তদা নৱুতিকোটীনং, দুতিযাভিসমযো অহু.

৫. যদা বুদ্ধো ধম্মং দেসেসি, ৱেভাৰে সো পুৰুত্তমে;

তদা নৱুতিকোটীনং, ততিযাভিসমযো অহু.

৬. সন্নিপাতা তযো আসুং, তস্মিম্পি দ্ৱিপদুত্তমে;

খীণাসৱানং ৱিমলানং, সন্তচিত্তান তাদিনং.

৭. কোটিসতানং নৱুতীনং [নৱুতিযা (স্যা. কং.)], অসীতিযাপি চ কোটিনং;

এতে আসুং তযো ঠানা, ৱিমলানং সমাগমে.

৮. অহং তেন সমযেন, মঙ্গলো নাম তাপসো;

উগ্গতেজো দুপ্পসহো, অভিঞ্ঞাবলসমাহিতো.

৯. জম্বুতো ফলমানেত্ৱা [ফলমাহত্ৱা (সী. স্যা.)] সিদ্ধত্থস্স অদাসহং;

পটিগ্গহেত্ৱা সম্বুদ্ধো, ইদং ৱচনমব্ৰৱি.

১০. ‘‘পস্সথ ইমং তাপসং, জটিলং উগ্গতাপনং;

চতুন্নৱুতিতো কপ্পে, অযং বুদ্ধো ভৱিস্সতি.

১১. ‘‘পধানং পদহিত্ৱান…পে… হেস্সাম সম্মুখা ইমং’’.

১২. তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা.

১৩. ৱেভাৰং নাম নগৰং, উদেনো নাম খত্তিযো;

সুফস্সা নাম জনিকা, সিদ্ধত্থস্স মহেসিনো.

১৪. দসৱস্সসহস্সানি, অগাৰং অজ্ঝ সো ৱসি;

কোকাসুপ্পলকোকনদা, তযো পাসাদমুত্তমা.

১৫. তিসোড়সসহস্সানি, নাৰিযো সমলঙ্কতা;

সোমনস্সা নাম সা নাৰী, অনুপমো নাম অত্ৰজো.

১৬. নিমিত্তে চতুৰো দিস্ৱা, সিৱিকাযাভিনিক্খমি;

অনূনদসমাসানি, পধানং পদহী জিনো.

১৭. ব্ৰহ্মুনা যাচিতো সন্তো, সিদ্ধত্থো লোকনাযকো;

ৱত্তি চক্কং মহাৱীৰো, মিগদাযে নৰুত্তমো.

১৮. সম্বলো চ সুমিত্তো চ, অহেসুং অগ্গসাৱকা;

ৰেৱতো নামুপট্ঠাকো, সিদ্ধত্থস্স মহেসিনো.

১৯. সীৱলা চ সুৰামা চ, অহেসুং অগ্গসাৱিকা;

বোধি তস্স ভগৱতো, কণিকাৰোতি ৱুচ্চতি.

২০. সুপ্পিযো চ সমুদ্দো চ, অহেসুং অগ্গুপট্ঠকা;

ৰম্মা চেৱ সুৰম্মা চ, অহেসুং অগ্গুপট্ঠিকা.

২১. সো বুদ্ধো সট্ঠিৰতনং, অহোসি নভমুগ্গতো;

কঞ্চনগ্ঘিযসঙ্কাসো, দসসহস্সী ৱিৰোচতি.

২২. সোপি বুদ্ধো অসমসমো, অতুলো অপ্পটিপুগ্গলো;

ৱস্সসতসহস্সানি, লোকে অট্ঠাসি চক্খুমা.

২৩. ৱিপুলং পভং দস্সযিত্ৱা, পুপ্ফাপেত্ৱান সাৱকে;

ৱিলাসেত্ৱা সমাপত্যা, নিব্বুতো সো সসাৱকো.

২৪. সিদ্ধত্থো মুনিৱৰো বুদ্ধো, অনোমাৰামম্হি নিব্বুতো;

তত্থেৱস্স থূপৱৰো, চতুযোজনমুগ্গতোতি.

সিদ্ধত্থস্স ভগৱতো ৱংসো সোড়সমো.