৫. ভিসদাযকত্থেৰঅপদানং

২৯. ‘‘ৱেস্সভূ নাম নামেন, ইসীনং ততিযো অহু;

কাননং ৱনমোগয্হ, ৱিহাসি পুৰিসুত্তমো.

৩০. ‘‘ভিসমুড়ালং গণ্হিত্ৱা, অগমং বুদ্ধসন্তিকং;

তঞ্চ বুদ্ধস্স পাদাসিং, পসন্নো সেহি পাণিভি.

৩১. ‘‘কৰেন চ পৰামট্ঠো, ৱেস্সভূৱৰবুদ্ধিনা;

সুখাহং নাভিজানামি, সমং তেন কুতোত্তৰিং.

৩২. ‘‘চৰিমো ৱত্ততে ময্হং, ভৱা সব্বে সমূহতা;

হত্থিনাগেন সন্তেন, কুসলং ৰোপিতং মযা [নাগোৱ বন্ধনং ছেত্ৱা, ৱিহৰামি অনাসৱো (স্যা.)].

৩৩. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, ভিসদানস্সিদং ফলং.

৩৪. ‘‘সমোধানা চ ৰাজানো, সোড়স মনুজাধিপা;

কপ্পম্হি চুদ্দসে [তেৰসে (সী. স্যা.)] আসুং, চক্কৱত্তী মহব্বলা.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভিসদাযকো থেৰো ইমা গাথাযো অভাসিত্থাতি.

ভিসদাযকত্থেৰস্সাপদানং পঞ্চমং.