১০. পুপ্ফচঙ্কোটিযত্থেৰঅপদানং

৬৮. ‘‘অভীতৰূপং সীহংৱ, গৰুড়গ্গংৱ পক্খিনং;

ব্যগ্ঘূসভংৱ পৱৰং, অভিজাতংৱ কেসৰিং.

৬৯. ‘‘সিখিং তিলোকসৰণং, অনেজং অপৰাজিতং;

নিসিন্নং সমণানগ্গং, ভিক্খুসঙ্ঘপুৰক্খতং.

৭০. ‘‘চঙ্কোটকে [চঙ্গোটকে (সী.)] ঠপেত্ৱান, অনোজং পুপ্ফমুত্তমং;

সহ চঙ্কোটকেনেৱ, বুদ্ধসেট্ঠং সমোকিৰিং.

৭১. ‘‘তেন চিত্তপ্পসাদেন, দ্ৱিপদিন্দ নৰাসভ;

পত্তোম্হি অচলং ঠানং, হিত্ৱা জযপৰাজযং.

৭২. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

৭৩. ‘‘সম্পুণ্ণে তিংসকপ্পম্হি, দেৱভূতিসনামকা;

সত্তৰতনসম্পন্না, পঞ্চাসুং চক্কৱত্তিনো.

৭৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফচঙ্কোটিযো থেৰো ইমা গাথাযো অভাসিত্থাতি.

পুপ্ফচঙ্কোটিযত্থেৰস্সাপদানং দসমং.

সকচিন্তনিযৱগ্গো সত্তমো.