৮. ধজদাযকত্থেৰঅপদানং

৫৭. ‘‘পদুমুত্তৰবুদ্ধস্স, বোধিযা পাদপুত্তমে;

হট্ঠো হট্ঠেন চিত্তেন, ধজমাৰোপযিং অহং.

৫৮. ‘‘পতিতপত্তানি গণ্হিত্ৱা, বহিদ্ধা ছড্ডযিং অহং;

অন্তোসুদ্ধং বহিসুদ্ধং, অধিমুত্তমনাসৱং.

৫৯. ‘‘সম্মুখা ৱিয সম্বুদ্ধং, অৱন্দিং বোধিমুত্তমং;

পদুমুত্তৰো লোকৱিদূ, আহুতীনং পটিগ্গহো.

৬০. ‘‘ভিক্খুসঙ্ঘে ঠিতো সত্থা, ইমা গাথা অভাসথ;

‘‘‘ইমিনা ধজদানেন, উপট্ঠানেন চূভযং.

৬১. ‘‘‘কপ্পানং সতসহস্সং, দুগ্গতিং সো ন গচ্ছতি;

দেৱেসু দেৱসোভগ্যং, অনুভোস্সতিনপ্পকং.

৬২. ‘‘‘অনেকসতক্খত্তুঞ্চ, ৰাজা ৰট্ঠে ভৱিস্সতি;

উগ্গতো নাম নামেন, চক্কৱত্তী ভৱিস্সতি.

৬৩. ‘‘‘সম্পত্তিং অনুভোত্ৱান, সুক্কমূলেন চোদিতো;

গোতমস্স ভগৱতো, সাসনেভিৰমিস্সতি’.

৬৪. ‘‘পধানপহিতত্তোম্হি, উপসন্তো নিৰূপধি;

ধাৰেমি অন্তিমং দেহং, সম্মাসম্বুদ্ধসাসনে.

৬৫. ‘‘একপঞ্ঞাসসহস্সে, কপ্পে উগ্গতসৱ্হযো [সৱ্হযা (স্যা.)];

পঞ্ঞাসসতসহস্সে, খত্তিযো মেঘসৱ্হযো [খত্তিযা খেমসৱ্হযা (স্যা.)].

৬৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধজদাযকো থেৰো ইমা গাথাযো অভাসিত্থাতি.

ধজদাযকত্থেৰস্সাপদানং অট্ঠমং.